كورد و عبادی

شفق نيوز

 

وه‌ هه‌ر حاڵ ئيسه‌ هه‌ليگ تر هاته‌سه‌ وه‌رده‌م كورد ك وه‌رجه‌ گشت چشتيگ گورز گه‌ورايگ له‌ خواست ديكتاتۆريانه‌ی مالكی وه‌شان و په‌ياميگ كلكرد ئه‌را گشت عراقيه‌يل وه‌ ئه‌وه‌ك هه‌ر وه‌ختيگ خواست دژايه‌تيكردن و چه‌وسيان كورد هاته‌ وجوود ئه‌وه‌ كورد گشتی وه‌ يه‌كده‌نگ و يه‌كهه‌ڵويست روی وه‌ڕوی هه‌ر ئه‌گه‌ريگ دوشمنكارانه‌ ئه‌دێ.

ئيسه‌يش قوناغيگ تازه‌ی ده‌سڵات له‌ عراق په‌يا بويه‌، ك ئه‌ويش قوناغ حوكمڕانی عباديه‌، ئمجا ئايا كورد بايه‌سه‌ چوين ده‌س وپه‌نجه‌ وه‌ل خواست و داواكاريه‌يل خوه‌ی و هه‌ڵويسته‌يل عبادی نه‌رم بكا؟ ئايا كورد وه‌هه‌مان شايسته‌يی گوزه‌يشت له‌ پرووسه‌ی سياسی وه‌رده‌وام ئه‌دێ يا خوازيار فيشتره‌؟

كورد له‌ قوناغ يه‌كه‌م هاتن عبادی بايه‌سه‌ له‌ نواوه‌ مه‌رج داشتوود، چوينكه‌ وه‌بی وجوود مه‌رج دروس نيه‌ دانيشتن وه‌ل عبادی بكريه‌يد، شايه‌ت عبادی جوور شيعه‌يگ و جوور نه‌ته‌وه‌يگ عه‌ره‌ب له‌ مه‌سه‌له‌ی خواست و داواكاريه‌يلی هويچی كه‌متر نه‌ود له‌ خواست و ئامانجه‌يل مالكی، ئمجا ئه‌وه‌ك چه‌ن ساڵێگه‌ كورد وه‌ده‌س مالكيه‌و تامی كردگه‌ زه‌حمه‌ته‌ جاريگتر جاده‌ی كوردستانی بيده‌نگ بوود له‌ئاست دانيشتن نوێنه‌ره‌يل كورد له‌ به‌غدا، هه‌ر وه‌و خاتريشه‌ هه‌وه‌جه‌ وه‌ ئه‌وه‌ ئه‌كريه‌يد ئيجاريشه‌ وه‌ مه‌رج بته‌وه‌و بچيمنه‌ ناو دانيشتنه‌يل، چوينكه‌ ئيمه‌ ئه‌زموون تيه‌ڵ ديريم له‌ وه‌كارناوردن و سزانن كارته‌يلمان و بايه‌سه‌ ئه‌وه‌يش بزانيم ك كورد ئيجاره‌ پشتگيری فيشتر ناوده‌وڵه‌تی ديريد و ئه‌تويه‌نيد وه‌ هيزه‌و كارت خوه‌ی باريده‌ كار.

ئيسه‌ ئيمه‌ هايمنه‌ بار جياوازيگ، مه‌رزه‌يل هه‌رێم فراوانتر بوينه‌و كه‌ركووكيش كه‌فته‌سه‌ ژير ده‌سڵات هه‌رێم، ك بايه‌سه‌ هه‌رچی زويتره‌ له‌ڕی ئه‌نجوومه‌ن پاريزگای كه‌ركووكه‌و خواست گله‌وخواردن كه‌ركووك ئه‌را بان هه‌رێم بكه‌يمنه‌ كاريگ ياسايی و كووتايی وه‌و گه‌مه‌ی سياسيه‌ باريم ك به‌غدا له‌ڕی مادده‌ی ١٤٠ وه‌ل كورد ئه‌كاده‌ی، بايه‌سه‌ بويشيمنه‌ به‌غدا مه‌سه‌له‌ی مووچه‌و بودجه‌ چشتيگ نيه‌ ئيوه‌ بتويه‌نين بكه‌ينه‌ی كارت فشار، بايه‌سه‌ وه‌رجه‌ هه‌ر دانيشتنيگ قه‌رزه‌يل هه‌رێم كله‌و بكه‌ن و مووچه‌ی فه‌رمانبه‌ره‌يل وه‌ ته‌مامی كله‌و بكه‌ن ئه‌را هه‌رێم و بايه‌سه‌ وه‌ به‌ڵگه‌يليگ ناوده‌وڵه‌تيه‌و دگان وه‌ مه‌رز تازه‌ی هه‌رێم بكه‌ن و فيدراڵيه‌گه‌يش گاميگ بچووده‌ نواوه‌و ده‌سڵات فيشتر بدريه‌يده‌ هه‌رێم و ناچار نه‌ويمن گشت رووژيگ له‌بان نه‌فت و بودجه‌ بكه‌فيمنه‌ جه‌نگه‌ قسه‌ وه‌ل فه‌تلاويه‌يل. ئمجا ئه‌گه‌ر به‌غدا وه‌و داواكاريه‌يله‌ رازی بوی، ئه‌وه‌ با ده‌س بكريه‌يده‌ دانيشتنه‌يل، وه‌لی ئه‌گه‌ر نه‌ ئه‌وه‌ هه‌رچشتيگ بكه‌ن دويای دو مانگ له‌لی په‌شيمانه‌و بوون، هه‌ر له‌وه‌ر ئه‌وه‌يش يا بايه‌سه‌ نوێنه‌ره‌يلمان نه‌چنه‌ به‌غدا يا بايه‌سه‌ وه‌ده‌س پڕ گله‌و بخوه‌ن.

باڵا هاوار

ج . أ