گشت په‌نيگ په‌نكوور مه‌كه‌!!

شفق نيوز

 

پيشينه‌يل وتنه‌"گه‌ن وه‌ گه‌نيێ مه‌نووڕ وه‌ دويزمه‌ی بنووڕ"، هه‌ر له‌وه‌ر ئه‌وه‌يش بايه‌سه‌ بزانيد ك"پای په‌تی له‌ پێڵای ته‌نگ خاستره‌" و نه‌يليد كيشه‌و گرفت زه‌فه‌ر له‌ليد باريدو هه‌وڵ ئه‌وه‌ بيه‌يد گه‌رمايگه‌رم هوير له‌ چاره‌سه‌ر بكه‌يدو"تا ته‌نوير داخه‌ نان خوه‌د بيه‌يده‌ پيه‌و"، چوينكه‌ ئه‌گه‌ر هات و"كار له‌ كار ترازيا" دی ئه‌وسا مه‌ر بويشيد"نك ناهمی و هه‌ناسه‌ی سه‌رد"و دی گشت هه‌وڵيگيش بی هووده‌س.

ئمڕوو له‌ی ژيانه‌ هه‌ر خيزانيگ ره‌فتار و هه‌ڵسووكه‌فت روڵه‌يلی زانيدو ئاگادارن له‌ليان ك رووژانه‌ چ كرده‌وه‌يليگ ئه‌نجام ئه‌يه‌ن، وه‌لی نوڕيد داڵگ وباوگه‌يليگ هه‌ن گه‌نڕه‌فتاری ئه‌و رووڵه‌يليانه‌ په‌نكوور ئه‌كه‌ن، يه‌يش له‌وه‌ختيگ زه‌ره‌ديش ره‌سننه‌ كه‌سه‌يل تر و ئه‌و باوگ و داڵگه‌ بيده‌نگن له‌و كاولكاری و ماڵويرانيه‌ ك رووڵه‌گه‌يان ده‌رهه‌ق هاوكوڕ و كه‌س وكار و خيزانه‌يل تر ئه‌نجامی ئه‌ياد، وه‌ختيگيش باس خراوی و به‌دڕه‌فتاری رووڵه‌يليان ئه‌كه‌يد له‌لايان يه‌كسه‌ر كه‌نه‌ی"ده‌وريش خه‌ڵوه‌تنشين"و"سه‌يد سامه‌ڕا"له‌لاد، جوور ئه‌وه‌گ نه‌ناسيده‌ی و تازه‌ تاريفی ئه‌راد بكه‌ن.

دی نازانيم له‌وه‌رچه‌ مه‌ردمانيگ هه‌ن"ئه‌سپ مه‌ردم زوی پا له‌لی تيه‌رنه‌و"ه‌و ئه‌سپ خوه‌يان وڵه‌كه‌ت ناكه‌ن و هه‌ميشه‌ گه‌نی مه‌ردم له‌لايان"خورماو روينه‌و"گه‌نی خوه‌يان و رووڵه‌يليان سڕپوو ئه‌كريه‌يدو شاريه‌يده‌و!!

جی داخه‌ ئمڕوو دووسه‌يليگ هه‌ن له‌ دوشمن به‌ترن، وه‌لی دوينيد ژير وه‌ژير مه‌رام پيس دڵه‌يليان له‌بان كه‌سه‌يل تر جيوه‌جی ئه‌كه‌ن وه‌بی ئه‌وه‌گ خوه‌يان ئاشكرا بكه‌ن، بيگومان متمانه‌داين وه‌ی جووره‌ كه‌سه‌يليشه‌ گه‌وراترين زه‌ره‌ده‌ له‌ژيان و ئه‌يانه‌ دوشمن راسكانی و ماڵويرانكه‌رن و هويچ وه‌ختيگ ده‌سوه‌ردار كاره‌يل زشت خوه‌يان نيه‌ون و نيه‌ونه‌ خه‌مخوه‌رد، چوينكه‌ پيشينه‌يل وتنه‌"ئه‌گه‌ر كه‌له‌ بووده‌ پووس، دوشمن نيه‌وده‌ دووس" و"ئی داره‌گ ئی وا شه‌كنێده‌ی گه‌ن ها له‌ بنی"و ئه‌و باوه‌ڕه‌ ك وه‌پی داشتيده‌ له‌ جی خوه‌ی نه‌ويه‌و ابه‌يد وه‌ ته‌مای ئه‌وه‌ نه‌ويد له‌ كاره‌يل به‌دڕفتاری خاس بكه‌يده‌وه‌و ئاشكراس ك"بار چه‌فت ئه‌و ميلكان ناڕه‌سيد".

وه‌لی له‌يرا گه‌وراترين وه‌رپرسيارێتی ئه‌كه‌فيده‌ بان ئه‌و داڵگ و باوگه‌ ك په‌نكوور كرده‌وه‌يل نائنسانی ئه‌و رووڵه‌يانه‌ ئه‌كه‌ن و هيلن دويكه‌ڵی كه‌سه‌يل تر بگريده‌و، چوينكه‌"گشت په‌نيگ په‌نكوور ناكريه‌يد"و بايه‌سه‌ بزانن ك سڕپووكردن و شاردنه‌وه‌ی كاره‌يل تاوانبار‌انه‌ی رووڵه‌گه‌يان ئاقبه‌ت خراويگ له‌لی ئه‌كه‌فيده‌وه‌و خاستر ئه‌وه‌سه‌ په‌نكووری نه‌كه‌ن و بگه‌ردنه‌ شوون چاره‌سه‌ريگ ئه‌رای و له‌ هه‌مان وه‌خت نه‌بايه‌د"تير بخه‌ن و كه‌وان بشارنه‌و"،‌چوينكه‌ ديار و ئاشكراس ك"تێشه گوم بوود پێشه گوم نیه‌ود"و بايه‌سه‌ يه‌يش بزانن ئمڕوو ك"ئه‌وان قليان كيشن مه‌ردمان تر‌ قوڕقوڕه‌گه‌ی ئه‌ژنه‌فن"و نه‌بايه‌د دڵ وه‌وه‌ خوه‌ش بكه‌ن ك مه‌ردم بيئاگان له‌ په‌ن و كرده‌وه‌ى رووڵه‌يليان.

ئمجا ئه‌و داڵگ وباوگه‌يله‌ ك خوازيارن كه‌رامه‌ت خوه‌يان بپاريزن و كرده‌وه‌ی رووڵه‌ گه‌نڕه‌فتاره‌گه‌يان په‌نكوور بكه‌ن، بايه‌سه‌ ئه‌وه‌يش بزانن ك هه‌ر له‌ بنه‌ڕه‌ته‌و په‌روه‌ركردن ئه‌و رووڵه‌يانه‌ نادروس بويه‌و"ئاسياو بی ئاويگ نانه‌سه‌و". بيگومان يه‌يش وه‌ سووك وئاسان رفوو نيه‌ودو خاستر ئه‌وه‌سه‌ شه‌رمه‌زار دونياو ئاخره‌ت نه‌ون و له‌وه‌ر خاتر په‌نكووركردن كار زشت ك زه‌ره‌د گه‌ورا ره‌سنيده‌ مه‌ردم تر خوه‌يان نه‌خه‌نه‌ وه‌ر سزای په‌روه‌ردگار و ئه‌وه‌يش بزانن ك" ئاسن سويه‌ر وه‌ پف سه‌رده‌و نيه‌ود" ئه‌گه‌ر نه‌خشه‌ی خاسيگ ئه‌رای نه‌سازيد.

جه‌ماڵ ئه‌ركه‌وازی