ئه‌‌و وه‌‌خته‌‌گ كورد، كه‌ركووك له‌‌ ده‌‌س ده‌‌ێد‌!

شفق نيوز

خانه‌‌قین كریا، منیش هه‌‌م له‌‌ نوو له‌‌ سه‌‌رێ بنویسم، كورد وه‌‌ته‌‌نى وه‌‌ردیه‌‌ بیه‌‌م و له‌‌ نوو وه‌‌ر بووڕم. وه‌‌لى ئه‌‌وه‌‌گ دیم برده‌مه‌‌و ناو فكر وه‌‌ختێگ نیشتویمه‌‌ پاى یه‌‌كیگ له‌‌ كه‌‌ناڵه‌‌یل‌ كوردى و داشتم هاڵ و خه‌‌وه‌‌ر ژنه‌‌فتم. منیش چوى هه‌‌ر كوردێگ تا ناو كه‌ركووك و ناوچه‌‌ داوڕیایه‌‌یل تیه‌ێد، گووشه‌‌ قولاخه‌‌و بویم تا بزانم هه‌‌م چ باسێگ له‌‌ سه‌‌ر كه‌ركووك هه‌‌س!. ئیجاره‌‌ باس به‌‌ێداخ و په‌‌رچه‌‌م بوى ك گوایا برایل توركمانمان له‌‌ سه‌‌ر باره‌‌گا و جێیه‌‌یل خوه‌‌یان به‌‌یداخ‌ خوه‌‌یان ئه‌‌ڵداینه‌‌و به‌‌یداخه‌‌گه‌ى ئیمه‌ى كورد... نیه‌‌توام فره‌‌ دریژییه‌‌و بكه‌‌م، ئه‌‌وه‌‌ ئه‌‌را م هویچ گرنگى نه‌‌یاشت ك ئاڵاى توركمان چه‌‌س و چه‌‌ نیه‌... منیش وه‌‌تم یانه‌‌یش برامانن هه‌‌ ئه‌‌و جووره‌‌گ گه‌ورایل سیاسیمان ئویشن!. له‌‌ى وه‌‌خته‌‌ په‌‌یامنێر تلفزیۆنه‌‌گه‌ وه‌‌ر كرده‌‌ ناو مه‌‌ردماو له‌‌ چه‌‌ن جایڵ كورد پرسى ك هویریان له‌‌ سه‌‌ر به‌‌ێداخ چه‌‌س؟ ئه‌‌وانیش جوواو دان: ئیمه‌‌ نیه‌‌توایمن له‌‌ سه‌‌ر په‌‌ڕووێگ ژیانمان وه‌‌ل برایل عه‌‌ره‌‌ب و توركمانمان له‌‌ ناو كه‌ركووك له‌‌ یه‌‌ك بشێوێد و ئه‌‌رامان هویچ گرنگ نیه‌‌ ئه‌‌ی په‌‌ڕووه‌‌ بوود یا نه‌‌ود!.

منیش وه‌‌ختێگ یه‌‌ ژنه‌‌فتم وه‌‌ ئاخه‌‌و هه‌‌ناسه‌‌ى له‌‌ بن دڵ كیشام و خاس هویره‌‌و كردم، ئایا ئه‌‌ى جایڵه‌‌یل كورده‌‌ ئه‌‌را له‌‌یوا ئویشن!؟. كه‌‌موكوڕى ها له‌‌ كوو!؟.

له‌‌یره‌‌ م دى نیه‌‌تیه‌‌م ته‌‌نیا حزبه‌‌یل ده‌‌سڵاتدار بكه‌‌مه‌‌ تاوانبار و منیش بویشم ئا، یه‌‌ یان نكردنه‌‌سه‌‌ى و ئه‌‌را ره‌‌سین وه‌‌ به‌‌رژوه‌‌ندییگ یا هه‌‌ر‌ ئامانجێگ تر منیش به‌‌مه‌‌و داڵده‌‌ى ئه‌‌وانه‌‌گ توان چشتێگ بارنه‌‌ ده‌‌س!.

له‌‌یره‌‌ ئیمه‌‌ بایه‌‌د گشتمان هویره‌‌و بكه‌‌یمن و بزانیم ئه‌‌را جایه‌‌ڵه‌‌یل ئیمه‌‌ى كورد چێشتێگ له‌‌یوا تێرنه‌‌ زووان و به‌‌ێداخێگ ك ئه‌‌و‌ هه‌‌مگه‌ خوینه‌‌ ئه‌‌راى ڕشیا و  جینۆساید و ماڵویرانى ئه‌‌راى كیشیایه‌‌و هێمان ئه‌‌رای پسا گیان فدا كریه‌‌ێد، وه‌‌ پى بویشێد په‌‌ڕوو!؟. له‌‌ ته‌‌مام دونیا هه‌‌ر نه‌‌سه‌‌وه‌‌ێ یا چینێگ یا ته‌‌نانه‌‌ت تیمیگ وه‌‌رزشیش یا بگر كۆمپانیاێگیش ئاڵاى خوه‌‌ى دێرێد و هویچ كه‌‌س له‌‌و كه‌‌سه‌‌یله‌‌گ ئه‌‌و ئاڵا هن خوه‌‌یانه‌ و هانه‌‌ ژێر ساێڕكى ئه‌‌ى ئاڵا‌ وه‌‌ پێ نیه‌‌وشن په‌‌ڕوو و بێ رێزى وه‌‌ پێ نیه‌‌كه‌‌ن. خوو له‌‌یره‌‌ ئه‌‌ى جایڵه‌‌یله‌‌گ له‌‌یوا ئویشن، دیاره‌‌ كه‌‌موكوڕییگ له‌‌ ته‌‌مام حزبه‌‌یل و بگره‌‌ ڕێكخریایه‌‌یل و ده‌‌زگایلیگ ك كار فه‌‌رهه‌‌‌نگى و ڕووشنهویرى و هووشیارى نه‌‌سه‌‌وه‌‌یى گرتنه‌‌ سه‌‌ وه‌‌ر خوه‌‌یان هه‌‌س، یانه‌‌ نه‌‌تویه‌‌نستنه‌‌ خوراك هویریگ نه‌‌سه‌‌وه‌‌یى به‌‌نه‌‌ ئه‌‌ی جایڵ كورده‌‌ تا ئه‌‌ویش وه‌‌ ئاڵاگه‌ى خوه‌ى شاقزى بكه‌‌ێد و چوى ئه‌‌و‌ برایل توركمانه‌‌گ خوه‌‌ى ناویان به‌‌ێد ئه‌‌را ئاڵاگه‌ى ك نیشانه‌‌یگه‌ له‌‌ نه‌‌سه‌‌وه‌‌گه‌ى، گیان بنه‌‌ێده‌‌‌ مویشكه‌‌وه‌‌.

ئمجا له‌‌یره‌‌ چشت تره‌‌كیش هه‌‌س ك گشتمان بایه‌‌د له‌‌ ورایوه‌‌رى شان بخه‌‌فنیم و  ده‌‌س بیه‌‌یمه‌‌و ناو ده‌‌س یه‌‌كتر و فكرێگ ئه‌‌راى بكه‌‌یم!. وه‌‌ختێگ ئیمه‌‌ له‌‌یوا چشتێگ له‌‌ ناو كه‌‌ركووك دوینیمن و گشت زانیمن هاڵ كه‌ركووك چوینه‌‌ و هێمان هایمنه‌‌ جه‌‌ڕمه‌‌جه‌‌ت وه‌‌ل برایل عه‌ره‌‌بمان‌ له‌‌ به‌‌غدا ئه‌‌را ئه‌‌ڵگه‌ردانن كه‌ركووك و به‌‌شه‌‌یل تره‌‌ك ئه‌‌را بان خاك كوردستان و له‌‌ لاى تریشه‌‌و سه‌‌ران و گه‌ورایل سیاسى ئیمه‌‌یش باس له‌‌ یه‌ ‌كه‌‌ن: چاره‌‌نویس كه‌ركووك ها وه‌‌ ده‌‌س مه‌‌ردم كه‌ركووك!. وه‌‌ختێگ له‌‌یوا وه‌‌تن، له‌‌ یه‌‌ دڵنیا بوین ك ته‌‌مام كورده‌‌یل ئه‌ى ناوچه‌‌یل و ته‌‌نانه‌‌تیش ئه‌‌وانه‌‌گ له‌‌ نه‌‌سه‌‌وه‌‌یل تره‌‌كن هان وه‌‌لیانا، ئه‌‌ی كورده‌‌یله‌‌ قازانجیان كه‌‌ن تا له‌‌ ڕێ رفراندۆمه‌‌و ده‌‌نگ بیه‌‌نه‌‌ كورد بوین ئه‌‌ی ناوچه‌‌یله‌‌ و له‌‌یوا كه‌ركووك ئه‌‌ڵگه‌ر‌دننه‌‌و باوش كوردستان و دى هه‌‌وه‌‌جه‌‌ى وه‌‌ شه‌‌ڕا‌ شه‌‌ڕ و ده‌‌ناده‌‌نگ تفه‌‌نگ نه‌‌كه‌‌فێد‌!. وه‌‌لى ئێرنگه‌ وه‌‌ختێگ یه‌‌ دوینیمن، بایه‌‌د وه‌‌رجله‌‌ یه‌‌گ چه‌‌قوو بڕه‌‌سێده‌‌ سخان و مه‌‌ینه‌‌تى تره‌‌ك بكه‌‌فێده‌‌و وه‌‌رمان و له‌‌ باڵ تریشه‌‌و نه‌‌یلیمن ئه‌‌ى چین تازه‌‌ تویش قه‌‌یران ناید و وه‌‌ نه‌‌سه‌‌وه‌ى خوه‌‌ى شاقزى بكه‌‌ێد و هه‌‌ له‌‌ برایل توركمان و عه‌‌ره‌‌بمان ئه‌‌راى نموونه‌‌ باریمن و هووكاره‌‌ى بكه‌‌یم یاێ بگرێد ك ئاڵا په‌‌ڕوو نیه‌‌و نیشانه‌‌یگه‌ ك نیشانده‌‌ر نه‌‌سه‌‌وه‌‌گه‌یه‌‌ و كورد بوینێ وه‌‌ ئه‌‌وه‌‌ دیاره‌ هه‌‌ ئه‌‌و جووره‌‌گ ئه‌‌را برایل توركمان نه‌‌سه‌‌وه‌‌ بوینێ وه‌‌ ئه‌‌وه‌‌ نیشان ده‌‌ێد‌. له‌‌ باڵ تركیشه‌‌و، ئیمه‌‌ بایه‌‌د له‌‌ یه‌‌ هویرده‌‌و بویمن و له‌‌ سه‌‌رێ كار بكه‌‌یمن تا ئه‌‌ى جایڵه‌‌یلمانه‌‌ وه‌‌ره‌‌و هویر كورد بوین بكیشیمان و نه‌‌یلیمن له‌‌یوا هویره‌‌و بكه‌‌ن و باوه‌‌ڕ وه‌‌ پێیان بكه‌‌یم و باوه‌‌ڕ و هویر كورد بوین به‌‌یمنه‌ پێیان و وه‌‌و‌ جووره‌‌ په‌‌روه‌‌رده‌‌یان بكه‌‌یمن تا له‌‌ دویاڕووژ خاونه‌‌یل وه‌‌ تواناێگ ئه‌‌را نه‌‌سه‌‌وه‌‌گه‌ى خوه‌‌یان بوون و هووشیاریانه‌‌و بكه‌‌یمن ‌تا بزانن وه‌‌ى جووره‌‌ هویره‌‌وكردنێگ گه‌نه‌‌ و له‌‌ ناویان به‌‌ێد و دى چشتێگ وه‌‌ ناو كورد ك خوه‌‌ى له‌‌ لیانه‌‌و و وه‌‌ زووانه‌‌گه‌ى قسیه‌‌ كه‌‌ێد نیه‌‌منیه‌‌ێد.‌‌

 

شۆڕش شاواز