٢١شووبات..رووژ سڕينه‌وه‌ی ناسنامه‌ی كورده‌يل فه‌يلی

شفق نيوز

هه‌ر مه‌ردمانيگ هه‌نای وه‌ زووانيگ هاوبه‌ش قسه‌ بكه‌ن له‌ يه‌كتری ئه‌ڕه‌سنه‌و، ك يه‌يش له‌ كومه‌ڵگا وه‌پی ئويشن ته‌واوكه‌ر و نه‌وه‌ له‌ دويای نه‌وه‌ له‌ناونی خوه‌يان جيوازی كردنه‌، ئمجا ناوه‌رده‌وامی زووان مانای وسانن جموجويل كومه‌ڵايه‌تيه‌ وه‌ ئه‌وه‌ك سه‌رمايه‌يگ رووشنهويريه‌و هه‌ر وه‌ختيگيش بگه‌رديمنه‌ شوون ئه‌و لايه‌نه‌يله‌ ك مقه‌يه‌تی له‌ رووشنهويری كومه‌ڵگا ئه‌كاو هيز و وه‌رده‌وامی ئه‌ياده‌ پی و گوزه‌يشته‌ی په‌يوه‌س ئه‌كاده‌ ئيسه‌ی، ئه‌وه‌ بيگومان هه‌وه‌جه‌ وه‌ زووان ديريم و بيبه‌شبوين نه‌ته‌وه‌ يا مه‌ردمانيگيش له‌ زووانيان يا شيوه‌زووانيان ئاكامه‌گه‌ی مه‌ترسی فه‌وتيان په‌يوه‌ندی ئنسانی له‌ناونی خوه‌يان له‌لی ئه‌كه‌فيده‌و.

فريه‌يگ له‌ فه‌يليه‌يل دوينيم ك توانای قسه‌كردن وه‌ چه‌ن زووانيگ ديرن، وه‌لی جی داخه‌ به‌ش كه‌ميگ له‌ نه‌وه‌يل ئيسه‌ توانای ئه‌وه‌ ديرن وه‌ زووان داڵگی خوه‌يان قسه‌ بكه‌ن، ك وه‌باوه‌ڕمن هووكار ئی مه‌سه‌له‌يشه‌ ئه‌چێده‌و ئه‌را ئه‌و زوڵم و سته‌مه‌ ك هاته‌ تويش كورده‌يل فه‌يلی له‌ سه‌رده‌مه‌يل وه‌رين وه‌ل دريغی ئاشكرايگ له‌لايه‌ن باوگ وداڵگه‌يليان ك ناڵانيان وه‌ده‌س مه‌ترسی بيده‌نگی و گومكردن ئاسايش هاووڵاتيبوين و شاردنه‌وه‌ی حاشاكردن شيوه‌زووان، ك وه‌ بوونه‌ی سياسه‌ته‌يل شۆفێنيه‌و زووانيش جوورهووكاريگ بوی ئه‌را مه‌ندنه‌وه‌.

ته‌نانه‌ت نه‌ته‌وه‌يل يه‌كگرتگ و ريكخرياگه‌يل مافه‌يل ئاده‌ميزاديش كورده‌يل فه‌يلی وه‌ پيكهاته‌يگ بی نيشتمان تاريف ئه‌كه‌ن، ك يه‌يش زويتر ئاماژه‌ وه‌پی كردمه‌و ئيمه‌ی پيكهاته‌يگيم له‌ ملله‌تيگ زينگ و له‌ شوونيگ مردگ ژيايمه‌و ئه‌ژيه‌يم له‌ناو خاكه‌يليگ ك وه‌پی ئويشن باشوور كوردستان يا خوه‌رهه‌ڵات دجله‌، چوينكه‌ خاوه‌ن ئی شيوه‌زووانه‌ واز له‌لی هاورياو شوونه‌گه‌يشی فه‌راموش كريا، ك بايه‌سه‌ له‌ بانمان مه‌زڵوميه‌ت خوه‌مان له‌ مه‌سه‌له‌ی بيسه‌روشوونی هه‌زاران له‌ جايه‌ڵ جوانه‌يلمان و ده‌ركردن سه‌دان هه‌زار و داگيركردن خاكه‌يلمان نه‌وينيمنه‌و، به‌ڵكوو بايه‌سه‌ ئاگاداری ئه‌وه‌ بيه‌يم ك ئيمه‌ بی داڵگ مه‌نديمنه‌و يه‌تيميم وه‌ بوونه‌ی گومكردن شيوه‌زووانه‌گه‌مان و پيشكه‌فتنه‌يل دوياكه‌فتتنمان.

گشت جاريگ په‌نديگ هيدغر فه‌يله‌سووف ئه‌ڵمانی ئه‌ياده‌ هويرم له‌وه‌ختيگ ئويشيد: زووان داڵگی دڵ ئحساس و ئاراميه‌ ئه‌را ئاده‌ميزاد، ئه‌وانه‌كيش زووان داڵگی فه‌رامووش ئه‌كه‌ن يا فه‌وتننه‌ی ئه‌وانه‌ جه‌نگ وه‌ل قويلترين لايه‌نيگ له‌ ناسنامه‌ی ئنسانی ئه‌كه‌ن.

هه‌ر وه‌و خاتريشه‌ رووژ زووان داڵگی ئه‌را فريه‌يگ له‌ فه‌يليه‌يل ساڵياد تيه‌ڵ و پڕ ژانيگه‌ له‌ هه‌مان وه‌خت، چوينكه‌ نازانن وه‌پی گوزارش له‌ فكره‌يليان بكه‌ن و مايه‌ی شه‌رمه‌زارييشه‌ ئه‌را كه‌سه‌يليگيش ك كه‌م زانن وه‌پی قسه‌ بكه‌ن و بيجگه‌ ئه‌وه‌گ دگانيش وه‌پيا نانه‌ن.

له‌يرا ئه‌خوازم ئاماژه‌ وه‌ ئه‌وه‌ بكه‌م ك ئيمه‌ شانازی وه‌ ئه‌وه‌ ئه‌كه‌يم ك گوايا به‌غدا ته‌نيا نه‌ك هه‌ر پايته‌خت عراق، به‌ڵكوو پايته‌ختيگ سياسی و رووشنهويری و ئابووری و كومه‌ڵايه‌تيه‌ ئه‌را فه‌يليه‌يل، ئمجا هه‌رچه‌نی ئيزگه‌يش له‌تی وجوود ديريد ئه‌را ماوه‌ی فيشتر له‌ ده‌ ساڵه‌ به‌رنامه‌يلی بڵاو ئه‌كا، ك ئه‌ويش(راديۆی شه‌فه‌ق)ه‌و ته‌نيا هووكاريگه‌ ئه‌را ئی پيكهاته‌ وه‌خاتر په‌يوه‌ندی وه‌رده‌وام له‌ناو ماڵه‌يل رووڵه‌يلی، وه‌لی جی داخه‌ به‌ه‌شداری رووڵه‌يل پيكهاته‌گه‌مان له‌ به‌رنامه‌يل عه‌ره‌بی فيشتر بوی له‌و به‌رنامه‌يله‌ ك وه‌ زووان داڵگی ئاماده‌ ئه‌كريه‌يد.

ئمجا ئيمه‌ چه‌نيگ هه‌وڵ ئه‌وه‌ ديايم وه‌گشت شيوازيگ ئه‌و ترس و شه‌رمه‌زاريه‌ بشكنيم له‌ مه‌سه‌له‌ی قسه‌كردن وه‌ شيوه‌زووانه‌گه‌و له‌ شانيه‌تی به‌رزه‌و بكه‌يم، وه‌لی بی ئوميد مه‌نديم له‌و پشتگووشخستن و نه‌ڕه‌سينه‌وه‌ی ، ك هه‌ر له‌وه‌ر ئه‌وه‌يش دوينيم له‌ ئاست پيكهاته‌يگ سه‌ره‌كی و گرينگ كيشه‌گه‌مان گوم بوی له‌ناونی تايفه‌گه‌ری و تونڕه‌وی و هووزايه‌تی و نوچه‌گه‌رايی.

وه‌ل ئه‌وه‌يشا كورده‌يل فه‌يلی له‌گشت مه‌ردمانيگ فيشتر شكايه‌ت و ناڕه‌زايتی نيشان ئه‌يه‌ن ك نوێنه‌ر نه‌يرن له‌ناو وازی سياسی و پۆست وه‌رگرتن و كه‌سيگيش نيه‌ له‌ليمان بويشيد بی داڵگ مه‌نيمه‌ له‌ڕووی شيوه‌زووانه‌گه‌مان، ئمجا له‌ڕاسی ئه‌گه‌ر مه‌رجيگ دابنريه‌يد ئه‌را ئه‌وانه‌ك وه‌ زووان داڵگی قسه‌ ئه‌كه‌ن شان وه‌شان زووانه‌يل تر ك شانازی وه‌پيه‌و ئه‌كه‌ن، ئه‌وه‌ له‌ی حاڵه‌ته‌ فريه‌يگ له‌ليان دوينيم له‌ حاڵ حازر و پيشبينی ئه‌وه‌يش ناكه‌يم رووژ جه‌هانی زووان داڵگی ك ٢١ شووباته‌ بدێده‌ رووژ خوه‌ش و به‌خته‌وه‌رييگ ئه‌را ئه‌وانه‌ك رووڵه‌يليان نازانن وه‌پی قسه‌ بكه‌ن، به‌ڵكوو وه‌ كووتايی ناسنامه‌ زاننه‌ی.

عه‌لی حسێن فه‌يلی

ج . أ