په‌رله‌مان وه‌ى زوى بڕیاره‌یل "ئه‌نجوومه‌ن سه‌ركردایه‌تى شووڕش هه‌ڵوه‌شیاى" هه‌ڵوه‌شنێد

شفق نيوز

یه‌ى جار ده‌نگده‌ید ئه‌را هه‌ڵوه‌شانن گشت بڕیاره‌یل ئه‌نجوومه‌ن سه‌ركردایه‌تى شووڕش هه‌ڵوه‌شیاى، و ئه‌وه‌یشه‌ ڕووشنه‌وكردن ك ده‌نگداین له‌ بان هه‌ڵوه‌شانن ئى بڕیاره‌یله‌ وه‌و میكانیزمه‌ ك له‌ى وه‌خته‌ ئه‌نجوومه‌نه‌گه‌ له‌بانى ڕى كه‌ید، وه‌خت فره‌یگ وه‌پى چوود و كاره‌یل تره‌ك په‌ك خه‌ید.

ئه‌شواق جاف ئه‌ندام لوجنه‌ى ماف ئاده‌میزاد په‌رله‌مانى له‌ قسه‌یلى ئه‌را شه‌فه‌ق له‌ى باوه‌ته‌ وت:"پیشنیاریگ له‌ ناو ئه‌نجوومه‌ن نوێنه‌ره‌یل هه‌س له‌باوه‌ت وه‌ یه‌كجار ده‌نگداین له‌بان گشت بڕیاره‌یل ئه‌نجوومه‌ن سه‌ركردایه‌تى شووڕش هه‌ڵوه‌شیاى". و ئه‌وه‌یشه‌ ڕووشنه‌وكرد ك:"ئه‌نجوومه‌ن نوێنه‌ره‌یل خه‌ریكه‌ ئه‌و بڕیاره‌یله‌ هه‌ڵوه‌شنید ك هاودژن وه‌ل مافه‌یل ئاده‌میزاد".

و وتیش ك:"لوجنه‌یگ بویچگه‌وكریاى دروسكریاس ئه‌را له‌یه‌كه‌وداین بڕیاره‌یل ئه‌نجوومه‌ن سه‌ركردایه‌تى شووڕش هه‌ڵوه‌شیاى ك وه‌ل ماف ئاده‌میزاده‌و نیه‌گونجیه‌ن جوور دوچه‌وه‌كى كردن له‌ناوبه‌ین هاوڵاتیه‌یل و ده‌سناین وه‌بان دارایى و ماڵ و موڵك ك ئه‌وله‌ویه‌ت دیرن له‌ى باوه‌ته‌".

له‌بان ئه‌وه‌یشه‌ جه‌خت كرد ك:"ئه‌نجوومه‌ن نوێنه‌ره‌یل ده‌س كه‌یده‌ نویسانن قانوونه‌یلیگ ئه‌را قه‌ره‌بووكردن هاوڵاتیه‌یل له‌و زه‌ره‌ده‌یله‌ ك له‌و بڕیاره‌یله‌ تویشیان هاتیه‌".

له‌لاى خوه‌یه‌و موحسن سه‌عدون ئه‌ندام لوجنه‌ى قانوونى له‌ ئه‌نجوومه‌ن نوێنه‌ره‌یل له‌ په‌یوه‌ندییگى وه‌ل ماڵپه‌ڕ شه‌فه‌ق، هه‌واڵ دامه‌زرانن ئه‌و لوجنه‌ى بویچگه‌وكریایه‌ پشتڕاسه‌وكرد و ئاماژه‌یش وه‌وه‌دا ك:"ئى لوجنه‌ كار ئه‌را ئه‌وه‌ كه‌ید ك پرس بكه‌یده‌ وه‌زاره‌ته‌یل و فه‌رمانگه‌یل ناپه‌یوه‌س وه‌ وه‌زاره‌تیگ ئه‌گه‌ر بۆشایى قانوونییگ بكه‌فیده‌وه‌ له‌ئان هه‌ڵوه‌شانن ئى بڕیاره‌یله‌، ئه‌وانیش تویه‌نن قانوون ئه‌را خوه‌یان بنویسنن".

ئه‌وه‌یشه‌ ڕووشنه‌وكرد ك:"ئه‌نجوومه‌ن نوێنه‌ره‌یل وه‌ یه‌ك جار ده‌نگ ده‌ید ئه‌را هه‌ڵوه‌شانن ئى بڕیاره‌یله‌ ك شماره‌یان فره‌فره‌س و ئه‌گه‌ر ئه‌نجوومه‌ن نوێنه‌ره‌یل وه‌و میكانیزمه‌ كار بكه‌ید ك ئیسه‌ په‌یڕه‌ویى كه‌ید له‌ ده‌نگداین ئه‌را هه‌ڵوه‌شاننیان؛ وه‌خت فره‌یگ كیشى و كاره‌یل تره‌ك ئه‌نجوومه‌نه‌گه‌ په‌ك خه‌ید".

زیاتریش وت:"زوورمى بڕیاره‌یل ئه‌نجوومه‌ن سه‌ركردایه‌تى شووڕش هه‌ڵوه‌شیاى ئمڕوو وه‌ هه‌ڵوه‌شیاى دریه‌نه‌ قه‌ڵه‌م وه‌گووره‌ى ده‌ستوور و قانوونه‌یل حازرى، وه‌لى ئه‌یانه‌ هه‌وه‌جه‌یان هاوه‌ دوباره‌ ته‌ماشاكردن تاگه‌ر له‌ قانوونه‌یل و ته‌شریعه‌یلمان تویش بۆشایى قانوونى نایمن ".

شایان باسه‌ ك ئه‌نجوومه‌ن نوێنه‌ره‌یل له‌ نیشتنه‌گه‌ى ڕووژ سێشه‌ممه‌ى وه‌رین وه‌زوورینه‌ى ده‌نگ  ده‌نگدا ئه‌را هه‌ڵوه‌شانن دو بڕیار ئه‌نجوومه‌ن سه‌ركردایه‌تى شووڕش هه‌ڵوه‌شیاى ك له‌ ساڵه‌یل 91 و 95 سه‌ده‌ى وه‌رین ده‌رچوینه‌".

یه‌كم بڕیاریان ده‌سڵات ئه‌وه‌ ده‌یده‌ سه‌رۆك كۆمار هه‌ر كه‌سى په‌سه‌ن كه‌ید له‌ پۆست وه‌زیر یا وه‌پله‌ى وه‌زیر دامه‌رزنیده‌ى، بى ئه‌وه‌گ مه‌رج بوود ئه‌و پۆسته‌ یا ئه‌و پله‌ له‌ ده‌زگاى په‌یوه‌ندیدار وجوود داشتوود".

دویمیانیش فرووشتن موڵك ده‌وڵه‌ت وه‌و كه‌سه‌یله‌ ڕه‌وا كه‌ید ك نیشان و میدالیاى جه‌نگه‌یل و میدالیاى ئازایى دیرن و دووسه‌یل سه‌رۆك ڕژیم وه‌رینن(أصدقا‌و الرئیس).

ئا: یاسر عماد

ت:ماجد سوره‌مێرى