فه‌یلیه‌یل زیاتر زه‌ره‌دمه‌نن

شفق نيوز

نیه‌ت پاكیگ  ئه‌ڕاى ناوریاسه‌ كار  له‌لایه‌ن وه‌رپرسه‌یله‌وه‌ له‌وه‌ر خاتر كووتاییهاوردن وه‌ى كیشه‌و مه‌ینه‌تیه‌ ك دوچار كورده‌یل فه‌یلى بویه‌ . چوینكه‌ ته‌نیا چینیگ  سته‌مدیده‌س له‌بان ئى گووشه‌ى زه‌ویه‌و گشت مه‌ردم له‌مه‌سه‌له‌گه‌یان زانن ، ك وه‌قسه‌ى خود وه‌رپرسه‌یل ئه‌و چینه‌سه‌ ك زیاتر له‌پیكهاته‌یل تر كوومه‌ڵگاى عراقى زه‌ره‌دمه‌ن بوینه‌ وه‌ دریژایى سه‌ده‌ى وه‌رین تا رووژ ئمڕوومان ، ك پاڵنه‌ر یا دافعیگ  له‌پشتى بویه‌و به‌عزیگ  له‌لى مه‌به‌س له‌تى داشتنه‌و به‌عزیگیشى بى مه‌به‌س.

ئى جووره‌ چینیگ  زوڵملیكریاگ بایه‌سه‌ گشت وه‌ختیگ  بڕیگ  پویل بیاتانه‌ وه‌زیفه‌كاره‌یل ده‌وڵه‌ت ئه‌را ئه‌وه‌ك كاریان بخه‌یگه‌ڕى و گرفت ئه‌ڕایان دروس نه‌وگ ، چوینكه‌ گشت چشتیگیان وه‌ ناقانوونى دریا قه‌ڵه‌م و ئمجا وه‌سه‌به‌ب به‌عزیگ  نه‌فسیه‌ت نزمه‌وه‌ گشت وه‌ختیگ  بایه‌سه‌ وه‌پویل كاروباریان ئه‌نجام بیاتان ، ئه‌و نه‌فسیه‌ت نزمه‌ ك له‌خوداى خوه‌یان و هساو ئاخره‌ت ڕخیان نه‌چى و زه‌ڕه‌مسقاڵیگ   وژدان نه‌یاشتن ، وه‌ڕه‌فتار ناشرین و ناپه‌سه‌نیان ناچار كورده‌یل فه‌یلى كردیان وه‌ زوور پویل كاره‌یلیان ئه‌نجام بیه‌ن له‌هه‌ر ده‌زگاو دایره‌یگ  حكوومى .

جویر ئه‌وه‌ك گشتمان زانیم ، ك گرینگترین یا موهمترین كیشه‌ى كورده‌یل فه‌یلى ، مه‌سه‌له‌و كیشه‌ى شوناسنامه‌و ماڵ و موڵك و ته‌رم نادیار روڵه‌یلیانه‌ له‌ زندانه‌یل سه‌دام دكتاتۆر و خوینمژ ك خودا كرده‌ى په‌ن له‌ى دونیا وه‌رجه‌ ئاخره‌ت تا بووگه‌ په‌ندیگ  ئه‌را ئه‌وه‌ك پشت له‌خوداوه‌ند گه‌ورا كه‌ن و هه‌ق مه‌ردمان بیتاوان فه‌وتنن و زوڵم له‌ ئنسانیه‌ت كه‌ن . ئمجا ئه‌گه‌ر بتوایم قسه‌ له‌بان شوناسنامه‌ بكه‌یم و بزانیم چه‌ له‌باوه‌تیه‌وه‌ ڕویده‌یگ  وه‌ئاشكراو ژیر وه‌ژیر  ئه‌را وه‌ده‌سهاوردن ماڵ حه‌رام و تیكه‌ى حه‌رام و غه‌دركردن له‌ى چاره‌نویس ئى چین زوڵملیكریاگه‌ ، ئه‌وه‌ بیگومان چشته‌یل ئه‌ڵڵاجه‌وییگ  دوینیم له‌ڕفتارو هه‌ڵسووكه‌فت ك وه‌جووریگ  نه‌ ئه‌قڵ هه‌ڵیگریگ  نه‌ مایه‌ى باوه‌ڕكردنه‌ ،  دوینیم كیشه‌ى لاوردن قه‌ید شایه‌ت وه‌شیوه‌ى ئاسانیگ  چاره‌سه‌ر بووگ و هویچ گرفتیگ  روى نه‌یه‌یگ  و هاووڵاتییش ئه‌وه‌نه‌ نه‌چووگه‌ ناو زه‌رد هاتوچووكردن و پویلداین و گرفت ده‌روینى ، ئمجا بابزانیم ئه‌گه‌ر هات و ئه‌و قه‌یده‌ لاوریا وه‌گووره‌ى زنجیره‌یگ  مراجعه‌تكردن و بڕیگ  پویلداین و ڕشبه‌ت ، ئایا نه‌بایه‌د له‌بان گشت ئه‌ندامه‌یل خیزانه‌گه‌ ئه‌ڵگریه‌یگ  جویر یه‌ك ؟ ئایا بووگ باقى ئه‌ندامه‌یل خیزانه‌گه‌ هه‌مان جوور بناڵنن و هه‌مان رشبه‌ت و پویل بیه‌ن ؟ ئایا ناو ئى حاڵه‌ته‌ بنه‌یم چه‌ ك مه‌سه‌له‌یگ  په‌سه‌ن و قانوونیه‌ ؟ یه‌یش له‌وه‌ختیگ  ك دوینیم كاروبار مه‌ردمان تر وه‌ئاسایى چووگه‌ ڕییه‌وه‌و هویچ كیشه‌و گرفتیگ  نه‌یرن له‌ڕوى سه‌ندن و فرووشتن و هاوسه‌رگیرى و پاسه‌پۆرت سه‌فه‌ر و چشته‌یل تر ك شایه‌ت وه‌ پۆست یا به‌رید و له‌ڕیگه‌ى پاریزه‌ر (محامى)ه‌وه‌ جى وه‌جى بكریه‌ن وه‌بى ئه‌وه‌ك هاووڵاتى شه‌كه‌تى وه‌پیه‌و بكیشیگ  . ئیمه‌ له‌یرا پسیار ئه‌وه‌ كه‌یم ئایا تاكه‌ى ئى ئستغلالكردن و ئى حاڵه‌ته‌ وه‌رده‌وامه‌ ؟ چوینكه‌ جویر ئه‌وه‌ك ئاشكراس هه‌رچشتیگ  بایگه‌ تویش كورده‌یل فه‌یلیه‌وه‌ سه‌به‌بى وه‌رپرسه‌یلن ك زوڵم له‌ هه‌ق ئنسانیه‌ت و نیشتمانیه‌ت كه‌ن .