ژن گوڵدان نییه‌ به‌ڵكوو ئاده‌میزاده‌

شفق نيوز

 

له‌ رووژگاریگ جوور ئمڕوو هه‌رچه‌ن ژن له‌گشت بواره‌یل ژیان فاكته‌ر فره‌ گرنگیگه‌ و ئه‌را نموونه‌ جوور مامۆستاو پزیشك و ئه‌ندازیار ..هتد نه‌خش گه‌ورایگ نیشان داگه‌و كاره‌یل رووژانه‌ى دام و ده‌زگایه‌یل نیمه‌ى وه‌ ژن چووده‌ رێیه‌و ك یه‌یش خاسترین به‌ڵگه‌ى ئسباتكردن و ناسین تواناى ژنه‌یله‌، وه‌لى ئه‌وه‌ك جى داخ و سه‌رسڕمه‌نینه‌ ئه‌وه‌سه‌ ك ژنه‌یل له‌بوار سیاسه‌ت و رووژنامه‌گه‌رى و هونه‌رى هێمان كه‌من و هه‌ر له‌وه‌ر ئه‌وه‌یش كوشك ژنه‌یلیش به‌رزه‌و نادێ، چوینكه‌ چه‌ن پایه‌یگى كه‌مه‌و له‌هه‌ر به‌رزه‌وبوینیگ وه‌لایگا رمیه‌ێد و ناهاوسه‌نگییش له‌ى باوه‌ته‌و ئاشكراس.

بێجگه‌ ئه‌وه‌یش له‌یره‌ جه‌خت له‌بان سیاسه‌ت كه‌یم ك ده‌روازه‌یگه‌ ئه‌را وه‌ره‌و نوابردن كه‌سایه‌تى و خود ئسیاتكردن، ئمجا ژنه‌یلیش نادێ روى بكه‌نه‌ ده‌م ناحه‌زه‌یل و گووش له‌ ره‌خنه‌ى نه‌زانه‌یل بگرن، هه‌ر له‌وه‌ر ئه‌وه‌یش بایه‌سه‌ خوه‌یان له‌مه‌یدان پێشكه‌فتن بچه‌سپنن.

له‌ وڵاته‌یل ده‌یشت هویچ چشتیگ نییه‌ وه‌ناو هه‌ق ژن، چوینكه‌ ئه‌وان له‌و قوناغه‌ په‌ڕینه‌سه‌و و ژنه‌یلیش جوور پیاوه‌یل هێزدارن و خه‌بات خوه‌یان كه‌ن و چه‌وه‌ڕێ ده‌س كه‌س ناكه‌ن و خوه‌یان كاره‌یلیان ره‌سننه‌ ئه‌نجام، له‌ سیاسه‌ت جوور پیاوه‌یل نه‌خش دیرن نه‌ك جوور عراق ك ته‌نیا ئه‌را جوانكردن كورسیه‌یل و ڕازاننه‌وه‌ى لاپه‌ڕه‌ى ره‌ساننه‌یل تیه‌ریه‌نه‌ كار.

ئه‌وه‌ك له‌یره‌ شایسته‌ى باسكردنه‌، ئه‌وه‌سه‌ ك ژن بایه‌سه‌ وه‌ته‌واوى له‌ مه‌یدان سیاسه‌ت كار بكاو بایه‌سه‌ قسه‌و گفتیشى بژنه‌فیه‌ێد و فه‌رمانه‌یلى جیوه‌جى بكریه‌ێد، وه‌گه‌رنه‌ ئه‌گه‌ر وه‌ى جووره‌ نه‌ود ئه‌وه‌ بێگومان ته‌نیا روخساره‌و بێ قه‌دركردن ژنه‌یله‌.

ئه‌را نموونه‌ ئه‌گه‌ر ژنیگ بووده‌ سه‌رۆك كوماریش، وه‌لى كه‌س ده‌نگى نه‌ژنه‌فێد و فه‌رمانه‌یلى له‌شوون خوه‌ى مۆمیا بكریه‌ێد، ئه‌وه‌ ماناى زوڵم و سته‌مه‌ له‌ ژنه‌یل و ماناى له‌ سێداره‌داین هه‌قه‌یله‌، ژنیش ك دویرگره‌ له‌ بوار سیاسه‌ت هووكاره‌گه‌ى ئه‌را ئه‌وه‌ چووده‌و ك خوازێد وه‌ چه‌و ئنسانى و هاوسه‌نگى ته‌ماشا بكریه‌ن نه‌ك وه‌ چه‌ویگ خود ده‌رخستن جوور ئه‌وه‌ك بویشید ملله‌تیگ پێشكه‌فتگیم و ژنه‌یل فره‌یگ دیریم له‌ هۆڵه‌یل سیاسه‌ت.

ماناى ئه‌وه‌سه‌ له‌یره‌ داواكارى ژنه‌یل دیاره‌و بانگه‌واز ئه‌وه‌ كه‌ن ك نادێ ژنه‌یل جوور گوڵدان ته‌نیا ئه‌را جوانكردن دابنریه‌ن، به‌ڵكوو بایه‌سه‌ نه‌خش راسكانى داشتوون و گووش له‌ هویر وڕایه‌یلیان بگیریه‌ێد.

شیلان بیبانى

ج . أ