ده‌م چه‌رمگه‌یل داعش

شفق نيوز

وه‌لێ ڕاسیه‌ تێه‌ڵه‌گان وه‌پێچه‌وانه‌ێ ئه‌وه‌سه‌ ، وه‌رجله‌ هاتن داعش ئه‌رٍا ناو خاك عراق ، سه‌رده‌مداره‌یل فتنه‌ وه‌گشت توانایانه‌وه‌ له‌ دژ ئاسایش و سه‌قامگیری عراق و ئاوه‌دانیی و پێشكه‌فتنێ كار كردنه‌ و بوێنه‌ هاوپه‌یمان به‌عس و شه‌یتان و قاعده‌ ، تا هه‌ر هه‌وڵێگ ئه‌ڕا پێشخستن پروسه‌ى سیاسی و به‌رقه‌رارى ئارامی و ئاسایش په‌ك بخه‌ن و ئه‌ڕا ئى مه‌به‌س نگریسه‌ ده‌س كردنه‌ ئاماده‌ كردنه‌ سه‌یاره‌یل بومب ڕێژ كریاگ و دانان بومب و وه‌كار گردن ئایمه‌یل ئه‌ڕا كوشتن ڕوڵه‌یل ئێ وڵاته‌ و بێجگه‌ ئه‌وه‌یش له‌ مه‌نبه‌ره‌یل ئاینى فتنه‌ێ تایفی نانه‌و تا ملله‌ت عراق یه‌كتری بكوشن و وه‌ى تاوانه‌یل گه‌ورا سه‌دان هه‌زار عراقی له‌ بازاڕه‌یل و شه‌قامه‌یل و له‌ شوونه‌یل عباده‌ت كوشتن و زه‌خمدار كردن و زه‌ره‌ده‌یل ماڵى فراوانێگ دانله‌ وڵات.

خوێن عراقیه‌یل فه‌ره‌ێگ ڕێ گرد له‌ ئه‌نجام تاوانه‌یل ده‌م چه‌رمگه‌یل یا (شیخ)یل ئه‌و پارێزگایه‌یله‌ ك وه‌فادار بوێن ئه‌ڕا سه‌دام تاوانبار و وه‌ێ خاتره‌ ئه‌و پارێزگایه‌یله‌ وه‌ وه‌فادار ناونریان و تاوانباره‌یل ئه‌و پارێزگایه‌یله‌ عگاڵ نانه‌ سه‌ر و شه‌ره‌ف و وجدان له‌وه‌ر كه‌نین و بانده‌یل كوشتن و وێران كردن دروس كردن.
ئه‌و ده‌م چه‌رمگه‌یله‌ نه‌خش وێرانكارى و هانداین مه‌ردم ئه‌ڕا یه‌كتری كوشتن و تونده‌و كردن دوژمناێه‌تى ڕه‌گه‌زی و نه‌ته‌وه‌یی و تایفی بازی كردنه‌ ، چوێن وه‌ جام به‌عس تاوانبار ئاو خواردنه‌ و نه‌ ئاین و نه‌ وجدان دێرن ، وه‌لىِ كاریگه‌رێ دێرن و له‌ لاێه‌ن ئه‌و سیاسیه‌یله‌ پشتگیری كریه‌ن ك وه‌ شێوازه‌یل جور وه‌جور ڕه‌سینه‌سه‌ ده‌سه‌ڵات و په‌رله‌مان و ناوه‌نده‌یل بڕیار.

ئمڕویش دوێاى ئه‌وه‌گ چه‌ته‌گان داعش پا نانه‌ عراق ، دوێنیم ئه‌و شیخ عه‌شره‌ته‌یله‌ وه‌ده‌و ده‌وان چنه‌ پیرى خه‌لیفه‌ێ داعش تا به‌یعه‌ت به‌نه‌پێ و ده‌سه‌یل و كه‌وشه‌یلى ماچ بكه‌ن ئه‌ڕا چه‌ن درهمێگ بێ قیمه‌ت و وه‌رجله‌ ئه‌وه‌یش كڕنوش ئه‌ڕا چه‌ن درهمێگ بردن ك له‌ لاێه‌ن ئه‌مریكیه‌یله‌وه‌ خستیانه‌ێ وه‌ریان و یه‌كتری له‌ بان ئه‌و درهه‌مه‌یله‌ كوشتن و بوێنه‌ دارده‌س بێگانه‌یل و سیماى تیروتاریان ئاشكراوه‌ بوێ و وه‌شێوه‌ێ ده‌سه‌ ده‌سه‌ به‌یعه‌ت كردنه‌ داعش و خه‌لیفه‌گه‌ێ.
ئێ زله‌ته‌ له‌ لاێه‌ن ده‌م چه‌رمگه‌یل و شیخ عه‌شره‌ته‌یل موسل و سه‌لاحدین قه‌بول كریا و ئمڕویش شیخ عه‌شره‌ته‌یل ئه‌نباریش هه‌مان سیناریو دواره‌وه‌ كه‌ن وه‌ختێگ له‌ 20/4/2015 له‌ ده‌ور یه‌كترى گرده‌و بوێن و به‌یاننامه‌ێگ ده‌ركردن و به‌یعه‌ت كردنه‌ داعش و چه‌كداره‌یل ئه‌و ڕێكخراو تروریستیه‌ وه‌براى خوه‌یان له‌ قه‌ڵه‌مدان و دوژمناێه‌تى خوه‌یان وه‌ل جه‌یش عراقى و حه‌شد شه‌عبی ڕاگه‌یاندن.
كه‌ێ ئێ وڵاته‌ له‌ له‌وس ئێ كه‌سه‌یله‌ پاكه‌و كرێه‌ێ ك شه‌ره‌ف خوه‌یان هه‌ڕاج و ئه‌رزان فروش كردنه‌؟ هه‌ركه‌سێگ بچوگه‌ ڕز داعش شه‌ره‌ف نه‌ێرێ و هه‌ر كه‌سێگ به‌یعه‌ت بكه‌ێگه‌ پێ ئاین نه‌ێرى و هه‌ر كه‌سێگیش پابنه‌ێگه‌ ركاب داعش قیمه‌ت نه‌ێرێ ، چوین یانه‌ پیلان ئه‌ڕا عراق و عراقیه‌یل دروس كه‌ن و كار ئه‌ڕا رژانن خوێن عراقیه‌یل كه‌ن ، وه‌ێ خاتره‌ ته‌نیا داوامان له‌ جه‌یش عراقی ئه‌وه‌سه‌ ، ئه‌و كه‌له‌یل پوێگه‌ له‌ ملیان جیاوه‌ بكه‌ن و ماوایان وێران بكه‌ن ، نه‌باێه‌د هوێچ گوفتوگو و نه‌رمیێگ له‌ وه‌راوه‌ر ئه‌و شیخه‌یله‌ نیشان بدرێه‌ێ ك خوه‌یان فروشتنه‌سه‌ بكوشه‌یل ملله‌ت عراق و نه‌باێه‌د هوێچ ئاشتییگ وه‌ل ئه‌و كه‌سه‌یله‌ بكریه‌ی ك له‌ شوون ساڵ 2003 تائیسه‌ نیشتنه‌ تیشه‌ ده‌ن له‌ ڕیشه‌ى ئسلام و وه‌رجله‌ ئه‌وه‌یش فدائى سه‌دام بوێنه‌.   


عه‌بدولزهره‌ تاله‌قانی

ج ك