تا ئیره‌و به‌س

شفق نيوز

ئه‌را نه‌ویه‌ خاوه‌ن ده‌وڵه‌ت سه‌روه‌خوه‌یى؟ ئه‌را كه‌فته‌ ناونى وڵاته‌یلیگ یه‌ك له‌یه‌ك به‌تر خوسه‌یان له‌لى تیه‌ێد؟ ئه‌را ئه‌نفال و كیمیاواران كریان؟ ئه‌یانه‌ چه‌نه‌ها ئه‌ڕاى تر ك شایسته‌ى باسكردن و جواون.

 

بیگومان هووكار به‌دبه‌ختى و بار سه‌خت كورد وه‌ دریژایى ساڵه‌یل فره‌یگ ئه‌گه‌ر بكه‌یمنه‌ دو به‌شه‌و، به‌شیگى كه‌فیده‌ گه‌ردن بیگانه‌و ئه‌و به‌شه‌گه‌یشى خود خوه‌مان له‌لى وه‌رپرسیم، هه‌ڵبه‌ته‌ به‌شه‌ فره‌گه‌یشى كه‌فێده‌ وه‌ر ملله‌ت كورد! ئیمه‌ ئه‌گه‌ر باس سه‌رده‌م ئسلامى و داگیركارى بكه‌یم و خاڵه‌یل كز ئه‌وساى سه‌ركرده‌یل كورد بخه‌یمنه‌ڕوى، ئه‌وه‌ بیگومان له‌و سه‌رده‌مه‌ هویچ ئومیدیگ ئه‌را نه‌وه‌یل ئاینده‌ له‌وه‌رچه‌و نه‌گیریاگه‌و ژیان و ده‌سڵاتداریه‌تى و هیز كورد له‌وه‌ر خاتر پڕه‌وكردن تاریخ بیگانه‌ هاوریاسه‌ كار وه‌ناو سه‌رخستن و وه‌رگیریكردن له‌ دین ئسلام.

 

راسه‌ دین پیرووز ئسلام تاج سه‌ر گشت موسڵمانیگه‌و هویچ گومانیگ له‌ى ڕویه‌و نه‌یریم، وه‌لى ئه‌و پیچاوپیچه‌ ك كورد وه‌پیا گوزه‌ر كرد له‌و كه‌ندڕه‌یل سه‌خته‌ شوون پایگ  ئه‌را خوه‌ى له‌تى دیارى نه‌كرد خوه‌ى له‌گرفت داگیركارى و ته‌ماى دوشمنه‌یل قورتار بكا، هه‌میشه‌ له‌گشت په‌لاماریگ خودبه‌خش و قوربانیده‌ر بویه‌ ئه‌را پشتگیریكردن له‌ بیگانه‌و گشت سه‌ركه‌فتنیگیش وه‌ هیز ئه‌یان بویه‌، وه‌لى وه‌ناو بیگانه‌یله‌و تومار كریاس.

 

كورد ملله‌تیگ كویه‌نه‌و خاوه‌ن سروشت پاكیگ بویه‌، وه‌لى زوى خه‌ڵه‌تیانه‌، ئه‌گه‌ر بچمنه‌و ئه‌را سه‌رده‌م سه‌ڵاحه‌دین یه‌كسه‌ر هویر له‌وه‌ كه‌یم و ئویشیم ئایا مه‌سه‌له‌ى كوردایه‌تى له‌لاى ئى ناودار كورده‌ تا چه‌نیگ وجوود داشتگه‌ له‌ساى رووژگار وه‌رگیریكردن له‌موسڵمان، ئایا ئه‌و هیزو ده‌سڵات كوردیه‌ له‌وه‌ختیگ موسڵمان سه‌رخست شاسته‌ى ئه‌و نه‌ویه‌ نه‌ته‌وه‌ى كوردیش له‌ساى سه‌روه‌خوه‌یى هه‌قه‌یلى دیارى بویاتاد، ئه‌و قودسه‌ ك وه‌هویچ په‌لاماریگ ئازاد نه‌وى ته‌نیا وه‌په‌لامار كورد كه‌فته‌ ژیر ساى ئازادى، كورد چ پاداشیگ له‌و سه‌ركه‌فتنه‌ وه‌رگرت!؟ ماناى ئه‌وه‌سه‌ كورد له‌وساوه‌ تائیسه‌ هس وه‌ ئه‌وه‌ كردگه‌ ك نه‌ته‌وه‌یگ جیاوازه‌و له‌وه‌خت ته‌نگى په‌نا وه‌پى بڕیه‌ێدو له‌وه‌خت خوه‌شى پشت له‌لى كریه‌ێد.

 

جموجویل ئازادیخواز كورد له‌ زویه‌و ده‌س وه‌پیكرد، وه‌لى دیار نیه‌ تا كوورا ره‌سێد، هویچ نه‌ته‌وه‌گه‌یش له‌ناو ناچێد ئه‌گه‌ر خاوه‌ن خاك و زووان و كلتوور و تاریخ بوود، وه‌لى مه‌سه‌له‌ى یه‌كنه‌گرتن و جیاوازى ناونى لایه‌نه‌یل كوردى و هویره‌ونه‌كردنیان له‌دویا ڕووژ نه‌وه‌یل ره‌سانه‌مان ئه‌وه‌ك دوشمن وه‌پى شاد بوودو نه‌ف له‌ موسیبه‌تمان وه‌ربگرن و هیز خوه‌یان له‌بانمان زاڵ بكه‌ن، چوینكه‌ له‌ئیمه‌ به‌دبه‌خت تر هه‌س وه‌لى له‌ ئیمه‌ سه‌ركه‌فتگتر بوین و سه‌روه‌خوه‌یى خوه‌یان وه‌رگرتن. ئیمه‌ى كورد بایه‌سه‌ ئه‌وه‌ بزانیم ك گشت وه‌ختیگ شۆفینیه‌یل عه‌ره‌ب ئه‌گه‌ر بتویه‌نن پاماڵ هه‌قه‌یلمان كه‌ن و هویچ متمانه‌یگ وه‌پیمان نه‌یرن و دووسایه‌تى ئیمه‌ ئه‌را ئه‌وان وه‌ختیه‌و هه‌رچى ئه‌ڕایانیش بكه‌یم وه‌ قه‌درمان نازانن، ئنجا هه‌ر وه‌ختى له‌لیمان تویڕه‌ بوون وه‌ یاخى ناومان به‌ن و هه‌ر وه‌ختیگیش دووس وه‌لمانا بكه‌ن ئویشن"اخواننا الاكراد". ئنجا ئیسه‌ وه‌خت ئه‌وه‌ هاتگه‌ گشت لایه‌نه‌یل كوردى جیاوازى و ناكویه‌یلیان بخه‌نه‌ كنار له‌وه‌ر خاتر سه‌رخستن كیشه‌ى كورد، چوینكه‌ كورده‌گه‌ گوشته‌گه‌د بخوا سقانه‌گه‌د ناشكنێدو هه‌ر كورده‌و له‌خوه‌ده‌، وه‌لى شۆفینیه‌یل عه‌ره‌ب ئه‌وه‌سه‌ وه‌ئاشكرا له‌عراق تازه‌یش دوشمانیه‌تى وه‌لمانا كه‌ن و له‌ریڕه‌و و ستم دیموكراسیه‌و دویرن و توان جاریگ تر خاكمان داگیر بكه‌ن و باوه‌ گوڕگوڕ ك دڵ كوردستانه‌ جاریگ تر له‌كوردستان داوڕنه‌ى و سه‌ردان ئى دویاخر نورى مالكى سه‌رۆك وه‌زیره‌یل ئسپات ئه‌و نیه‌ت ناپاك شۆفینیه‌یله‌سه‌ ك په‌یامیگ ئاشكرا بوى ئه‌را كورد، هه‌ر له‌وه‌ر ئه‌ویشیم تا ئیره‌و دى به‌سه‌ ئه‌ى كورد ڕزه‌یلیدان یه‌كه‌و بخه‌ن و مقه‌یه‌تى له‌ خاك پڕ به‌ره‌كه‌ت و سامانه‌یل سروشتى خوه‌دان بكه‌ن و هه‌ل ته‌ڵایى له‌ده‌س مه‌یه‌ن با جاریگتر نه‌كه‌فیمنه‌ وه‌ر په‌لامار دڕنده‌ى بیگانه‌و سته‌مكار، با مقه‌یه‌تى له‌و ده‌سكه‌فته‌یله‌ بكه‌یم ك وه‌خوین روڵه‌یمان هاتنه‌سه‌ ده‌س، با گشتمان وه‌ دڵسوزیه‌و پشت بووه‌سیم وه‌ره‌و سه‌روه‌خوه‌یى، با جاریگتر ئه‌نفال و كیمیاواران نه‌كریه‌یم و ره‌ِنج چه‌ن ساڵه‌ى خه‌باتمان نه‌چوود وه‌زاى، وه‌ یه‌كه‌وگرتن دوشمنمان بپه‌زنیم و ناوچه‌یل داوڕیاگمان باریمنه‌و ئه‌را بان خاك هه‌رێم كوردستان، من فه‌یلى و تن سۆرانى و هه‌ورامى و بادینى گشتمان هه‌ر كوردیم و له‌نه‌وه‌ى كورد، با وه‌ یه‌ك ده‌نگ داواى هه‌قه‌یلمان بكه‌یم.

 

جه‌ماڵ ئه‌ركه‌وزاى