ئنتما ئه‌را نيشتمان

شفق نيوز

پابه‌ندى ئه‌را خاك و ئنتما ئه‌را نيشتمان ئحساسيگ سورشتيانه‌س لاى هه‌ر تاكيگ وه‌رانوه‌ر زێد و ماواى خوه‌ى، هه‌ر وه‌و خاتريشه‌ له‌ هه‌ر وه‌ختيگ ك خاك نيشتمان روى وه‌ڕوى مه‌ترسى بدێد دى مه‌ردمه‌گه‌ى گشت هه‌وڵيگ ئه‌يه‌ن ئه‌را مقه‌يه‌تيكردنى، چوينكه‌ مقه‌يتيكردن نيشتمان ماناى مقه‌يتيكردن تاكه‌يل و ده‌سكه‌فتن ژيانيگ پڕ له‌ ئاسايش و گه‌وراييه‌.

ئه‌گه‌ر ناسنامه‌ى نيشتمان مه‌رزيگ دياريكرياگ جوگرافى بدێ ك وه‌ شيوه‌يگ جيگير له‌تى ژيه‌يم و په‌يوه‌سيگ فه‌رهه‌نگى مێژوويى سياسى ئابوورى كومه‌ڵايه‌تى وه‌پيه‌و گريه‌مان بيه‌يد، ئه‌وه‌ له‌ڕوى مه‌عنه‌ويه‌و نيشتمان ئه‌و شوونه‌ نيه‌ ك له‌تى ژيه‌يم، به‌ڵكوو ئه‌و شوونه‌سه‌ ك له‌و فكر و هوير و خه‌ياڵمانه‌ ژيه‌يد.

يه‌يش سفه‌ته‌ روحيه‌گه‌ى پابه‌نديمانه‌ ئه‌را نيشتمان جيا له‌ په‌يوه‌س فيزيكى و جوگرافى، نيشتمان وزه‌ى گيانى ئاده‌ميزاده‌و خوه‌شه‌ويسيه‌گه‌يشى دايگ گشت خوه‌شه‌ويسيه‌يله‌.

نه‌ته‌وه‌ى كورد وه‌ گووره‌ى سه‌رچه‌وه‌يل مێژوويى و راسى لۆژيكيه‌و نيشتمان تايبه‌ت وه‌خوه‌ى ديريد ك ئه‌ويش كوردستانه‌، تاك كورد له‌ تاك زوورم ملله‌ته‌يل تر فيشتر ئاشق نيشتمان و نه‌ته‌وه‌ى خوه‌يه‌و خوه‌شى توايد، چوينكه‌ جوور ئه‌وه‌ك ئويشن نيشتمانپه‌روه‌رى ئحساسيگه‌ تا ژانه‌يل نيشتمان گه‌وراتر بوون و مه‌ينه‌تيه‌يلى فيشتر بوون ئه‌ويش زياتر په‌ره‌ ئه‌سينيد.

وه‌ دريژايى مێژوو نه‌ته‌وه‌ى كورد هه‌وڵ ئه‌وه‌ داگه‌ وه‌ ئاشتى و ئازادى بژيه‌يد له‌بان خاكه‌گه‌ى خوه‌ى، يه‌يش بيجگه‌ گشت ئه‌و په‌لاماره‌يل داگيركاريه‌و ئه‌و مه‌ترسيه‌يل يه‌ك له‌شوون يه‌كه‌ ك هاته‌سه‌ تويش ئى خاك و نه‌ته‌وه‌، ك وه‌خته‌يليگيش ره‌سيه‌سه‌ ئاست هه‌وڵداين ئه‌را پاكسازيكردن ئى نه‌ته‌وه‌و له‌ناوبردن وه‌يه‌كجارى ك ئه‌يانه‌يش له‌ قوناغه‌يل جياجياو له‌ به‌رزترين ئاست جينوسايد بويه‌.

ئيسه‌يش نه‌ته‌وه‌ى كورد و خاك كوردستان روى وه‌ڕوى تون وتيژترين و سه‌ختترين په‌لامار داگيركارى بويه‌سه‌و، ك ئه‌ويش په‌لامار ترۆريسته‌يل داعشه‌و هه‌رچى كرده‌وه‌يگ دڕندانه‌س پياده‌ ئه‌كه‌ن و بته‌وترين جه‌نگ ده‌روينى ئه‌يه‌رنه‌ كار و پيكهاتگه‌ له‌ رخه‌وبردن و نيشانداين دڵڕه‌قى.

خاك كوردستان جوور ئه‌وه‌ك زويتر شوون په‌لاماره‌يل گه‌وراهيزه‌يل جه‌هانى بويه‌، ئيسه‌يش ترۆريسته‌يل وه‌گشت توانايگه‌و قورسايى جه‌نگه‌يان و گشت ئه‌و مه‌ترسيه‌يله‌ ك ئى ريكخرياگه‌ له‌خوه‌ى گرته‌سه‌ى ئاراسته‌ى هه‌رێم كوردستان كردنه‌سه‌ى و ئيسه‌يش ئه‌را ماوه‌ى چه‌ن مانگيگه‌ په‌لامار ترۆريسته‌يل وه‌رده‌وامه‌و ئازايى و قوربانيداين پێشمه‌رگه‌ ئه‌را روى وه‌ڕوى بوينه‌وه‌ى ترۆريسته‌يل جوور سووز و وه‌فاداريه‌ ئه‌را نيشتمانه‌گه‌يان.

ئيسه‌يش خاك كوردستان و ئارامى و ئاسايشه‌گه‌ى جى گرينگداين ناوده‌وڵه‌تيه‌، هه‌ر وه‌و خاتريشه‌ ئى حاڵه‌ته‌يله‌و چه‌نه‌ها حاڵه‌يل تر وه‌رچه‌رخان گه‌وران له‌ مێژوو ملله‌ت كورد ك بايه‌سه‌ هه‌ڵويست له‌بانيان بكريه‌يد ئه‌را فيشتر بته‌وكردن ئنتماى تاك ئه‌را نيشتمان ك ئيسه‌ پا ناسه‌ قوناغ تازه‌و قاپيه‌يل فريه‌يگ له‌وه‌رده‌مى واز كرياگه‌ ك زويتر به‌سياويد.

د. ڤيان سليمان

ج . أ