فه‌یسبوك و شاره‌زایى تاك كورد

شفق نيوز

  جوور ئه‌وه‌ك ئاشكراس ئیسه‌ فه‌یسبوك بویه‌سه‌ یه‌كیگ له‌ گرینگترین تووڕه‌یل كوومه‌ڵایه‌تى ك له‌ جه‌هان ده‌نگ داسه‌وه‌و تویه‌نستگه‌ شوون خوه‌ى دیارى بكا، ئنجا وه‌ گووره‌ى ئامار ساڵ 2010ى فه‌یسبوك نزیكه‌ى 500 ملیۆن كه‌س ئه‌و تووڕه‌ هاورده‌ كار، وه‌لى ئه‌و ڕیژه‌ ئیسه‌ زیاى كردگه‌و حاڵ حازر له‌ 50% وه‌كارهاوره‌یلى نزیكه‌ى یه‌ك جار چنه‌ ناو فه‌یسبوكه‌و.

له‌ زوورم وڵاته‌یل، فه‌یسبوك وه‌ یه‌كه‌م سایت ئه‌یاد، ك فیشترین سه‌ردان دیرید جوور" مه‌كسیك، توركیا، ئه‌رجه‌نتین، مالیزیا"، له‌ وڵاته‌یل جوور" ئه‌مریكا، ئه‌ڵمانیا، فره‌نسا، ئیتالیا"یش دویه‌مین سایته‌ له‌شوون گۆگڵ.

ئیسه‌ فه‌یسبوك بویه‌سه‌ وێب، سایت فراوانیگه‌و لایه‌نه‌یل فریه‌ خاسیش دیرید، ئه‌را نموونه‌: فریه‌یگ له‌ ئیمه‌ شایه‌ت ره‌فیقه‌یل سه‌رده‌م مناڵیمان له‌ناو سایت فه‌یسبوك بوینیمنه‌و، یا چه‌نه‌ها ره‌سم له‌ ئه‌لبووم دوس و ره‌فیقه‌یلمان بوینیم ك هه‌ر وه‌ خه‌یاڵمانیش ناید ئى جووره‌ ره‌سمه‌یلیگ وجوود داشتوون، یا ئه‌را نموونه‌ شایه‌ت نه‌تویه‌نستیمنه‌ رووژیگ سه‌ردان ماڵ ره‌فیقیگمان بكه‌یم، وه‌لى له‌ڕى فه‌یسبوكه‌و تویه‌نستیمنه‌ بوینیمنه‌یان و ئاگادار بویمن له‌گشت هه‌واڵیگیان.

له‌یرا خوازیاریم ئه‌وه‌ بخه‌یمنه‌ روى ك له‌ هه‌رێم كوردستانیش فریه‌كه‌س فه‌یسبوك ئه‌یه‌رنه‌ كار، دى وه‌بى ئاگا له‌وه‌ك له‌پشت ئى تووڕ كوومه‌ڵایه‌تیه‌ چه‌ روى ئه‌یاد، ئنجا له‌یرا پرسیار ئه‌وه‌ كه‌یم و ئویشیم ئایاتا چه‌نیگ تاك كورد شاره‌زایى دیرید له‌ مه‌سه‌له‌ى وه‌كارهاوردن ئى تووڕ كوومه‌ڵایه‌تیه‌؟ ئایا قانجاز وه‌پیمان ره‌سنید یا زه‌ره‌د؟ ئایا رووژانه‌ چه‌نیگ له‌ وه‌خته‌یلمان وه‌ تاڵان ده‌یم؟ ئایا فه‌یسبوك بوود ئه‌را وه‌سه‌ربردن وه‌خت دروس كریاویدو تا دیره‌ وه‌ختیگ له‌شه‌و؟ ئایا چه‌ن مناڵ له‌لاى ئیمه‌ بویه‌سه‌ ئه‌ندام ئه‌و تووڕ كوومه‌ڵایه‌تیه‌ ك ناوه‌گه‌یشى وه‌ته‌واوى نازانیدو دایگ و باوگیش هس وه‌ هویچ وه‌رپرسیارێتییگ ناكه‌ن له‌ وه‌رانوه‌رى؟ ئایا فه‌یسبوك ویستگه‌یگ ئازاده‌ ك هه‌ركه‌س وه‌ ئاره‌زوو خوه‌ى قسه‌ له‌تى بكا؟ ئایا وه‌كارهاوردن ئى تووڕه‌ له‌لاى ئیمه‌ وه‌ به‌رنامه‌س یا وه‌ گۆتره‌س؟ ئایا له‌ كوردستان فریه‌ن ئه‌وانه‌ك له‌ یاساو ده‌ستووره‌یل فه‌یسبوك شاره‌زان یا وه‌ چه‌واشه‌وه‌؟

دویاجاریش ئویشیم ئایا فه‌یسبوك چه‌كیگ ئه‌لكترۆنیه‌؟، چوینكه‌ ئه‌گه‌ر نه‌تویه‌نیم كۆنترۆڵى بكه‌یم، ئه‌وه‌ بیگومان كاره‌سات به‌رپا ئه‌كا له‌ى هه‌رێمه‌ له‌ بواره‌یل زانستى و كوومه‌ڵایه‌تى و سیاسى.

ئارام ئسماعیل

ج . أ