هه‌رێمه‌گه‌ى خوه‌مان و چه‌ن خاڵیگ

شفق نيوز

به‌راورد یا مقارنه‌ى وه‌ل چه‌ن ساڵ وه‌رجه‌ ئیسه‌یا بكا یه‌كسه‌ر هس وه‌ چه‌نه‌ها جیاوازى ئه‌كا له‌ڕوى ئاوه‌دانى و گه‌شه‌كردن ئابوورى و سیاسى و فه‌رهه‌نگى، ئنجا ئه‌وانه‌ك تیه‌نه‌ عراق و سه‌ردان كوردستانیش كه‌ن یه‌كسه‌ر وڵاتیگ جیاوازتر دوینن. ئى حاڵه‌ت هه‌رێم كوردستانه‌ له‌ناوه‌ند سیاسى و میدیایه‌یل ناوچه‌گه‌و جه‌هانیش ره‌نگه‌و داگه‌. وه‌لى ئه‌گه‌ر جویر تاكیگ هوشیار و دقه‌تكه‌ر ته‌ماشاى هه‌رێم كوردستان بكه‌یم، شایه‌ت چه‌نه‌ها كه‌م وكوڕى و ناته‌واوى ده‌سنیشان بكه‌یم ك بایه‌س بوى نه‌ویاتان یا بنیات بنریان ئه‌را ئه‌وه‌ك له‌ئیسه‌و گام گه‌وراتر ئه‌ڵگرتایم یا هه‌رێمه‌گه‌مان زیاتر مایه‌ى دڵنیایى و زامنكه‌ر گشت ئومیدو ئامانجه‌یل نه‌ته‌وه‌گه‌مان بویاتاد. ئه‌وه‌ك ئیسه‌ كه‌فێده‌ وه‌رچه‌و، ئه‌وه‌سه‌ ك له‌عراق چه‌نه‌ها كیشه‌و قه‌یران سیاسى و سه‌ربازى و ئه‌منى وجوود دیرێد. سوپاى وڵاته‌یل یه‌كگرتگ ئه‌مریكا وه‌گووره‌ى ریككه‌فتننامه‌ى وه‌ل حكوومه‌ت عراق ئه‌وه‌سه‌ كووتایى وه‌ وجوود خوه‌ى هاورد له‌ ئه‌ركه‌یل سه‌ربازى له‌ كوومار عراق. سوپاى ئه‌مریكا له‌وه‌ختى ئى وڵاته‌ هیلنه‌ جى چه‌نه‌ها كیشه‌ى سیاسى و ده‌ستوورى و ئابوورى چاره‌سه‌ر نه‌كریا. هه‌ر یه‌یش له‌یوا كردگه‌ پیكهاته‌یل سیاسى وڵات له‌وه‌رانوه‌ر یه‌كترى جیاوازى و كینه‌ت نیشان بیه‌ن. گشت كرده‌وه‌یل مه‌یدان سیاسى عراق له‌یوا نیشانده‌ن ك ئاشتى و سه‌قامگیرى په‌یا نه‌ود، له‌ى حاڵه‌تیشه‌ هه‌رێم كوردستان به‌شیگه‌ له‌ هاوكیشه‌یل سیاسى و ئه‌منى و ئابوورى عراق ك زه‌حمه‌ته‌ وه‌ئاسانى خوه‌ى له‌لى ده‌ركاو بیلایه‌نى خوه‌ى نیشان بیه‌ێد. هووكار سه‌ره‌كى ئى هویروڕایشه‌ ئه‌وه‌سه‌ ك تائیسه‌ ناوچه‌یل داوڕیاگمان ناتنه‌سه‌و ئه‌را بان هه‌رێم كوردستان له‌وانه‌ك خریانه‌سه‌ چوارچیوه‌ى مادده‌ى 140 ده‌ستوور هه‌میشه‌یى عراق، چوینكه‌ به‌ش فره‌یگ خاك كوردستان و مه‌ردم نه‌ته‌وه‌گه‌مان كه‌فتنه‌سه‌ ئى ناوچه‌یل داوڕیاگه‌. ئنجا ئه‌وه‌ك له‌ى باوه‌ته‌ توایم بخه‌یمنه‌ى ڕوى ئه‌ویش چه‌ن خاڵیگه‌ ك بایه‌س بوى له‌بان هه‌رێم كوردستان گام ئه‌ڕاى ئه‌ڵگردیاد، چوینكه‌ ئییسه‌ دوینیك عراق بووده‌ وڵاتیگ خاوه‌ن سه‌روه‌رى خوه‌ى و شایه‌ت گشت ده‌سڵاته‌یل ده‌وڵه‌ت له‌ده‌س بكه‌فێده‌ ده‌س یه‌ك پیمهاته‌، له‌وه‌ر ئه‌وه‌ هه‌رێم كوردستانیش وه‌ك به‌شیگ له‌عراق چووده‌ ناو قه‌یرانه‌گه‌و تویه‌نستیایم خاستر هه‌رێمه‌گه‌مان ریك بخستیایم و له‌وانه‌یش: هیزیگ خوه‌مانى ك وه‌گووره‌ى ده‌ستوور عراق ئیمه‌ تویه‌نیم بویمنه‌ خاوه‌ن هیزیگ خوه‌مانى و له‌ئاست هه‌وه‌جه‌یل مقه‌یه‌تیكردن هه‌رێم بویاتاد. وه‌ل ئه‌وه‌یشا یه‌كخستن گشت دامه‌زریاگه‌یل دارایى و ئابوورى حكوومه‌ت هه‌رێم هیمان وه‌ته‌واوى ئه‌نجام نه‌دریاگه‌و چه‌نه‌ها كه‌م وكوڕى له‌تى دیاره‌و بیجگه‌ ئه‌وه‌یش یه‌كنه‌گرتن دام و ده‌زگایه‌یل ئه‌منى و ناوخوه‌یى تا ئیسه‌ ره‌نگ حزبى وه‌پیانه‌و دیاره‌و دویاى ئه‌وه‌یش ئاوه‌دان نه‌كردنه‌وه‌ى گشت ئاوایه‌یل كوردستان وه‌شیوه‌ى خواستیگ  جویر به‌شیگ له‌ بنیاتناین و له‌هه‌مان وه‌خت ئاشكرا نه‌كردن و جیگیر نه‌كردن ده‌ستوور هه‌رێم ك وه‌گووره‌ى ده‌ستوور هه‌میشه‌یى عراق هه‌رێم كوردستانیش بایه‌س بوى ده‌ستوور تایبه‌ت وه‌خوه‌ى بیاشتاد، هه‌ر له‌وه‌ر ئه‌وه‌یش هه‌ق وه‌ زویترین وه‌خت هه‌رێم ده‌ستووریگ بنه‌ڕه‌تى هاوچه‌رخانه‌ى پشكه‌فتگ ئاشكرا بكا و بخه‌ێده‌ى ده‌نگداین تا گشت تاكیگ ئى هه‌رێمه‌ هس وه‌ وجوود نیشتمان نه‌ته‌وه‌یى خوه‌ى بكاو گیان یه‌كتر قه‌بولكردن و ئاشتى و كوومه‌ڵایه‌تى وه‌گووره‌ى ئى ده‌ستووره‌ ده‌سه‌وه‌ر بكریه‌ێد.

 

شادمان مه‌لا حه‌سه‌ن