كوشتن وه‌جه‌م عراقیه‌یل

شفق نيوز

تویش عراقیه‌یل، ته‌نیا ئه‌وه‌ بوى كه‌میگ وه‌خت بیه‌مه‌ خوه‌م به‌ڵكوو ئومیدیگ له‌هه‌ڵویست و كاردانه‌وه‌ى سیاسیه‌یل عراق بژنه‌فم ك وه‌ قسه‌ گشت كاریگ  كردیان و له‌وه‌خت جیوه‌جیكردنیش شكه‌ست هاوردن.

هویچ شك وگومانیگ نه‌یاشتیم له‌وه‌ك سیاسیه‌یل گشت پۆست و جیاوازیه‌یلیان خه‌نه‌ كنار له‌وه‌ر خاتر ئه‌وه‌ك نه‌یلن كاركه‌ره‌یل وه‌بى تاوان بكوشیه‌ن له‌وه‌خت چگنیان ئه‌را بان كار له‌سفته‌ى سوو، ك خود سیاسیه‌یل گشت ئى مه‌ویسى و ماڵویرانى و به‌دبه‌ختیه‌ ئه‌نجام دان، وه‌لى چار چه‌س ئىرا ئه‌وانه‌ك تیكه‌یگ نان نه‌یرن بخوه‌نه‌ى یا به‌توویگ نه‌یرن بینه‌ى بان مناڵه‌یلیان، هه‌ر له‌وه‌ر ئه‌وه‌یش گه‌ردنه‌ شوون كار و نوڕن مه‌رگ چه‌وه‌ڕییان ئه‌كا وه‌سه‌یاره‌ى مینڕیژكریاى ك دوینید وه‌ مردن گورجیگ تیه‌ێده‌و ئه‌را لاى خیزانى.

هه‌رچه‌نى جیاوازى سیاسى و زووان گفتوگوو زبره‌و بوود له‌لاى سه‌ركرده‌ى فراكسیۆنه‌یل و نوێنه‌ره‌یلیان، ئه‌وه‌نه‌ مه‌ردم ده‌س نه‌نه‌ بان دڵه‌یلیان و ئاماده‌ن ئه‌را مه‌رگ تر وه‌جه‌م له‌ ده‌مه‌و سوویگ تر به‌غداى دویكه‌ڵان و خه‌مووك.

له‌ئاكام ته‌قینه‌وه‌یل ئى دویاخر په‌نج شه‌ممه‌، ئه‌وه‌ ده‌ركه‌فت ك زوورم سیاسیه‌یل ركابه‌رى یه‌كترى كردیان له‌هه‌وڵداین ئه‌را هاوردنه‌وه‌ى بار سیاسى جویر وه‌رجه‌ ته‌قینه‌وه‌گه‌و هه‌ر له‌وه‌ر ئه‌وه‌یش ئاواز مقه‌یه‌تیكردن له‌شیرازه‌ى نیشتمانى و هاوبه‌شى سیاسى ژنه‌فتیایم و دوباره‌ هاتنه‌وه‌ ئه‌را مسته‌ڵح گونجیان یا ته‌وافق ك تواسیان دویره‌و بكه‌فن له‌لى له‌وه‌خت دامه‌زرانن حكوومه‌ت ئیسه‌یان ك نزیكه‌ى هه‌یشت مانگ دیرژه‌ داشت وه‌بى دیاریكردن وزاره‌ته‌یل، وه‌ل ئه‌وه‌یشا وه‌زیره‌یل خاوه‌ن قسه‌ى خوه‌یان نه‌وین و هه‌ر وه‌رده‌وام بوین له‌بان درووه‌یل و گه‌ناته‌كارى، ئنجا له‌یوا دیاره‌ وه‌رپرسه‌یل فره‌یگ و ته‌نانه‌ت ده‌زگایه‌یل ئه‌منییش هه‌ڵقه‌ى ئى كوشتن وه‌جه‌م و ته‌قینه‌وه‌یله‌ هاوردنه‌وه‌و یه‌یش ده‌رفه‌تیگه‌ ئه‌را وه‌رده‌وامى تاڵانكردن خه‌یره‌یل وڵات و ئستغلال بیده‌نگى ملله‌ت عراق كردنه‌.

له‌یرا وه‌گووره‌ى ئه‌و قه‌یران و تاوانه‌یله‌ ك روى وه‌ڕوى جیگر سه‌رۆك كوومار كریا وه‌ ئه‌وه‌ك ده‌س له‌ترۆر داشتگه‌ تویه‌نیم ده‌سنیشان كه‌سه‌یلیگ بكه‌یم وه‌بى ئه‌وه‌ك ره‌فتار خاسیگ بوود و ئه‌قڵ په‌سه‌نى بكا، یا وه‌بى ئه‌وه‌ك تاوانبار بكریه‌ن یه‌كسه‌ر به‌غداى پایته‌خت هیشتنه‌جى و هه‌یواین ئه‌را شوونه‌یل تر، ك بایه‌س بوى بمه‌ندیان و له‌هه‌مان وه‌خت وه‌گشت متمانه‌یگه‌و روى وه‌ڕوى دادگا بویاتان ئه‌گه‌ر خوه‌یان وه‌ بیتاوان بزانستیان.

مه‌سه‌له‌یگ تر ئه‌وه‌ بوى، ك لیست عراقیه‌ ئعلان خود كیشاننه‌وه‌ دا له‌دانیشتنه‌یل ئه‌نجوومه‌ن نوێنه‌ره‌یل، ك یه‌یش ره‌فتار ناپه‌سه‌نیگ و ده‌گمه‌نیگ بوى له‌مه‌سه‌له‌ى سیاسى، ك یه‌یش به‌شیگ بوى له‌ئاژاوه‌و قه‌یران سیاسى.

هه‌ر له‌وه‌ر ئه‌وه‌یش ئویشیم: ده‌رنه‌كه‌فتن هه‌ر ئۆپۆزسیۆنیگ راسكانى له‌ ئه‌نجوومه‌ن نوێنه‌ره‌یل هووكاریگ ها له‌شوونى و ئامانجى وه‌رده‌وامبوین مردن و كاولكاریه‌ له‌عراق و ته‌نیا مه‌به‌سیان تاڵانكردن و بردن دارایى عراقه‌. وه‌ل ئه‌وه‌یشا ئه‌گه‌ر پرووسه‌یگ سیاسى راسكانى ئه‌نجام نه‌گرێد له‌ى وڵاته‌، ئه‌وه‌ مه‌حاڵه‌ كوشت و كوشتار و تون وتیژى كووتایى وه‌پى باید.

 

سادق ئه‌زره‌قى