ئاسوو ره‌سانن كورده‌یل فه‌یلى

شفق نيوز

 

ره‌سانن ده‌زگایگه‌ كاراو دید جه‌هان وه‌ره‌و لاى ئه‌و ده‌وڵه‌ته‌ كیشێد له‌ڕێ هووكاره‌یل وه‌كارهاوریاگى، وه‌ل ئه‌وه‌یشا ره‌سانن كوردى یه‌كێگه‌ له‌و هووكاره‌یل تازه‌ ك تیه‌ریه‌یده‌ كار و له‌ناونیانیش رووژنامه‌گه‌رى جوور وه‌سیله‌یگ ئه‌را ئاشناكردن خوه‌ى وه‌ جه‌هان و هه‌ر له‌وه‌ر ئه‌وه‌یش وه‌رجه‌ 115 ساڵ رووژنامه‌ى"كوردستان" ده‌رچى و رووژنامه‌یگ بوى نه‌خش فره‌یگ داشت ك هه‌رچه‌نى له‌ساى بار سه‌ختیگ بوى و ئازاداى و مه‌ینه‌تیه‌یلى دیار بوى، وه‌لى وه‌ل ئه‌وه‌یشا تویه‌نست خوه‌ى ده‌ربخا وه‌شیوه‌یگ خاستر له‌ رووژنامه‌یل تر له‌ڕێ قه‌ڵه‌م ده‌سه‌یگ له‌ كورده‌یل خه‌یرومه‌ن و نه‌خش كاریگه‌ریگ داشت تا ره‌سیه‌ ئه‌وه‌ك رووژنامه‌ى كوردستانى په‌ره‌ سه‌ند و شماره‌ى فره‌یگ له‌ رووژنامه‌یل رووژانه‌و گووڤار هه‌فتانه‌و مانگانه‌ ده‌ركریه‌ێد و خزمه‌ت ره‌سنێده‌ گشت پێكهاته‌یل كوومه‌ڵگا وه‌تایبه‌ت جایه‌ڵ جوانه‌یل و هه‌واڵه‌یل گه‌رم سیاسى وه‌پیان ره‌سنێد بیجگه‌ هونه‌ر و مۆسیقاو ئه‌ده‌ب و فكر و فه‌لسه‌فه‌و باوه‌ته‌یل كوومه‌ڵایه‌تى وه‌تایبه‌ت باوه‌ته‌یلیگ ك په‌یوه‌سه‌ن وه‌ مه‌سه‌له‌ى ژن و ماڵ و ئاینده‌.

وه‌لى به‌ش كورده‌یل فه‌یلى له‌ ره‌سانن له‌چه‌و ره‌سانن پێكهاته‌یل تر له‌ كوومه‌ڵگایه‌یل ئه‌وسا كه‌م بوى و په‌نا بردیانه‌ وه‌ر هه‌ر رووژنامه‌یلیگ ك باس له‌ هه‌قه‌یلیان بكردیاد، هه‌ر له‌وه‌ر ئه‌وه‌یش بڕێگ له‌ رێكخریاگه‌یل كوومه‌ڵگاى مه‌ده‌نى كورده‌یل فه‌یلى و كه‌سه‌یلیگ خودبه‌خش وه‌ى خاتره‌ ده‌ركه‌فت و له‌ ده‌یشت عراق رووژنامه‌ ده‌ركردن له‌ سه‌رده‌م رژیم رمیاگ ك نواگیرى له‌ ئازادى كرد وه‌تایبه‌ت له‌ كورده‌یل فه‌یلى و كووچ وه‌پیكردن زووره‌ملى و مه‌ینه‌تیه‌یل فره‌یگ هاورده‌ تویشیان، هه‌ر له‌وه‌ر ئه‌وه‌یش تواناى ده‌ركردن رووژنامه‌ نه‌یاشتن وه‌ زووان خوه‌یان تا دید مه‌ردم رووشنهویر و سیاسیه‌یل جه‌هان و لایه‌نگره‌یل دیمۆكراسى وه‌ره‌و لاى كێشه‌و چاره‌نویسیان بكیشن.

دویاى ئه‌وه‌یش كاره‌یل نائنسانى رژیم وه‌رین ده‌رهه‌ق كورد فه‌یلى و له‌ناوبردن وه‌جه‌م دژ ئنسانیه‌ت ئیچنه‌ كرد له‌شوون رمیانى له‌ 9-4-2003 كورده‌یل فه‌یلى ده‌س بكه‌نه‌ چالاكى و به‌شدارى بكه‌ن له‌ جمشت ره‌سانن، ئه‌ویش وه‌گووره‌ى به‌شداریكردن كاراو سه‌ره‌تاى ئه‌وه‌یش دامه‌زرانن ده‌زگاى رووشنهویرى و ره‌سانن كورده‌یل فه‌یلى شه‌فه‌ق بوى، ك كاره‌یل كه‌موینه‌یگ ئه‌نجامداو یه‌كه‌مین ده‌زگایگه‌ له‌ بوار ره‌سانن ئه‌ڕایان و ته‌نیا ده‌زگایگه‌ ك رووشنایى ئه‌خاده‌ بان كێشه‌و گرفته‌یلیان و ده‌سكرده‌ هه‌وڵداین وه‌ل ده‌سڵات عراقى ئه‌را جیوه‌جیكردن هه‌قه‌یلیان جوور هاوردنه‌وه‌ى هه‌قه‌یلیان له‌ ناسنامه‌و ماڵ و موڵك و قه‌ره‌بووكردنیان، ك ئه‌یانه‌یش له‌ڕێ رادیۆى شه‌فه‌ق و رووژنامه‌ى ئافاق كورد و گووڤار فه‌یلى و گووڤار ئاراو گووڤار گوڵ سوو، یه‌یش بیجگه‌ له‌ سمینار و كۆنگره‌یل و باس ئه‌و كێشه‌یل گرنگه‌ ك ئه‌نجامى ئه‌یاد و په‌یوه‌سه‌ وه‌ چاره‌نویسیان.

له‌یره‌ بایه‌د ئاماژه‌ وه‌ ئه‌وه‌ بكه‌یم ك رادیۆى شه‌فه‌ق ته‌نیا رادیۆیگه‌ هه‌واڵه‌یلى وه‌ شیوه‌زووان فه‌یلى په‌خش ئه‌كا، ك یه‌یش چشت كه‌میگ نییه‌و نیشانه‌ى ئه‌وه‌سه‌ ك كورده‌یل فه‌یلى مه‌شق چالاكى و تواناى خوه‌یان كه‌ن و پابه‌ندن وه‌ چالاكیه‌یلیان و هه‌رچه‌ن تویش ده‌رده‌سه‌رى و مه‌ینه‌تى هاتنه‌، وه‌لى هێمان باوه‌ڕ وه‌دادگه‌رى كێشه‌گه‌یان دیرن و راسگووانه‌ و دڵسووزانه‌ كار كه‌ن وه‌ گووره‌ى ئه‌خلاقیه‌ت و ئنتمایان ئه‌را نیشتمانه‌گه‌یان و هسكردنیان وه‌ وه‌رپرسیارێتى.

بیگومان ده‌زگاى شه‌فه‌ق وه‌گشت كه‌ره‌سته‌یل ره‌ساننه‌گه‌ى جوور هه‌ڵقه‌یگ په‌یوه‌س بویه‌ له‌ناونى خوه‌ى و مه‌ردم كورد فه‌یلى، چوینكه‌ گوزارش له‌ كێشه‌و ئاره‌زووه‌یلیان ئه‌كا، وه‌تایبه‌ت ك ئیمه‌ له‌ى سه‌رده‌م ئازادى و رووشنایى دیمۆكراسیه‌ ژیه‌یم و باوه‌ڕ وه‌ هه‌ق بڕیار چاره‌نویس ملله‌ته‌یل دیریم، هه‌ر له‌وه‌ر ئه‌وه‌یش ئومیده‌واریم ره‌سانن كورده‌یل فه‌یلى گامه‌یل فراوانتر بگرێده‌وه‌ر ئه‌را خزمه‌تكردن وه‌ى پێكهاته‌ى عراقى ره‌سه‌نه‌ له‌ڕێ وه‌ده‌سهاوردن ده‌سكه‌فت فێشتر و هه‌وڵداینى ئه‌را یه‌كلاكردنه‌وه‌ى كێشه‌یلیان ك هێمان فره‌یگ له‌لى چه‌وه‌ڕێ چاره‌سه‌ر و جیوه‌جیكردنه‌.

محه‌مه‌د عه‌لى سه‌ماوى

ج . أ