من فه‌يلى و ئه‌نفال وه‌رده‌وام!

شفق نيوز

وه‌ تايبه‌ت له‌ كوردستان ده‌نگ ئه‌و چنه‌ى ك خوه‌م دوس داشتم بژنه‌فم، نه‌ژنه‌فيم!.

 

وه‌ هه‌ر شێوه‌، وه‌ل ساڵياد ئه‌ى كاره‌ساته‌، چشته‌يل تازه‌گيش رويدان، له‌وانه‌ هه‌ڕه‌شه‌ كردن له‌ كورده‌يل نيشته‌جى له‌ ده‌يشت هه‌رێم وه‌ تايبه‌ت ئه‌وانه‌ ك هانه‌ به‌غداو ناوچه‌ى باشوورعيراق، ئه‌وه‌گ دياره‌ يه‌سه‌ ئه‌ى هه‌ڕه‌شه هه‌م پاى ئيمه‌ى كوردفه‌يلى گرێد.

هێمان نه ‌قه‌وه‌ريل جه‌وانه‌يلمان دياره‌، نه‌ ژماره‌ى كووچوه‌رمان، نه‌ ناسنامه‌ى عيراقيمان و نه‌ شه‌هيدانه‌ى ئه‌ى تاوان گه‌وار ك له‌ هه‌قمان كريايه‌ دياره‌!. ژيانمان ها له‌ ناو گێژاو ئاسياوێ و نيه‌زانێم وه‌ره‌و كو به‌يده‌مان!.

فره‌ وه‌رده‌و دايم وه‌رده‌و بڕينم و هه‌ هێمان له‌ بان نه‌هامه‌تى و به‌دبه‌ختى كوردفه‌يلى ك خوه‌مانيم نويسيمن، وه‌لى وه‌ راسى دى ئه‌ى باسه‌ ره‌سيه‌سه‌ ئه‌و جيه‌، كه‌ ته‌نيا نويسن چاره‌ى ناكا. ئيمه‌ هه‌ وانگ ئه‌ڵاليم و باس له‌ ئازار خوه‌مان كه‌يم، وه‌لى وه‌ داخه‌و كه‌س ناڵه‌و ژان ئيمه‌ ناژنه‌فێ يا ئه‌گه‌ر ژنه‌فێ خوه‌ى له‌لێ كه‌ڕ ئه‌كاو زامه‌يل ئيمه‌ بێ سارێژ مه‌ننه‌و ته‌مامێان بوينه‌سه‌ ده‌مڵ.

وه‌ باوه‌ڕم دى چه‌وقۆ ديرێد ره‌سێده‌ سوخان، هناى ك كابرا هه‌ڕه‌شه‌ ئه‌كاو  ئويشێ كورده‌يل ده‌يشت له‌ هه‌رێم بايه‌د له‌ ماوه‌ى يه‌ هه‌فته‌ به‌غداو باشوور عيراق چوڵ بكه‌ن و... دوياى وه‌...!.

ئه‌ى په‌يامه‌ ئه‌را كيه‌، بێجگه‌ له‌وه‌سه‌ ك‌ ته‌نيا كورده‌يل فه‌يلى به‌دبه‌خت ك له‌ى ناوچه‌يل نيشتنه‌ هه‌م كه‌فنه‌ وه‌ر لافاو تازه‌ى تر ك ئه‌وسا وه‌تن حزب به‌عس و ئيرنگه‌ برايل عه‌روه‌مان ك ئه‌را ئيمه‌ يه‌ ده‌ركه‌فتيه‌ ك عه‌ره‌و وه‌ هه‌ر باوه‌ڕێ له‌ دموكراتيه‌ترين شێوه‌ وه‌ چه‌واشه‌ى ئه‌وه‌ ك ئيمه‌ وه‌پيان ئويشم برايل عه‌ره‌وه، هه‌و ئه‌وانه‌ن ك وه‌ سه‌رچه‌وه‌ گرتن له‌ قورئان و سوره‌ى ئه‌نفال كوشتنمان و ماڵ وێرانمان كردن و وتن يانه‌ بايه‌د بچنه‌ دوزه‌خ و كافرن و ته‌كفيرمان كردن.

م له‌يره‌ يه‌ پرسم: عه‌ره‌و له‌ كه‌لتوور خوه‌ى چشتێ و ناو تاڵان ديرێدو مێژوو دويردرێژێ له‌ى باوه‌ته‌ هاوه‌ليانا، هه‌م دگان ئه‌رامان تێژ كردنه‌ تا ئه‌ى جاره‌گه‌ دى هه‌ له‌ ناومان بوه‌ن و دى ئه‌را هه‌ميشه‌ له‌ ده‌س كوردفه‌يلى خوه‌يان رزگار بكه‌ن و دى مه‌سه‌ڵه‌ى وه‌ ناو كورد فه‌يلى له‌ ناوچه‌ى مه‌ڵوه‌ن و باشوور عيراق نياشتوون.

هه‌ر چه‌ن ديمن ك سه‌رۆك وه‌زيره‌يل له‌ جوواو ئه‌ى هاوليستگه‌ى، به‌يانێ دا، وه‌لى ئايا ئيمه‌ چوى كورد(باس له‌ سه‌ركردايه‌تى سياسى ئه‌كه‌م)، دى هێمان ياد نه‌گرتيمه‌ ك مالكى چه‌نێ وه‌ل ئيمه‌ راسگۆه‌و، گۆفتار سياسى له‌ى چه‌ن ساڵه‌ دپێه‌كه‌و نه‌كرديمه‌ ك چه‌نێ راسه‌و چه‌ ها له‌ پشتێ!.

خوو ئه‌را راس و درو بوينيش، ديمن ك ئه‌را پشت راسه‌و كردن ئه‌ى هه‌ڕه‌شه‌، يه‌كم له‌ هه‌ردو پارت كورد(يه‌كێتى و پارتى) ده‌س وه‌ پێ كردن و دى له‌يره، خاس ئه‌را‌مان ديار كردن ك‌ هه‌ڕه‌شه‌گه‌ راسگانيه‌و ئه‌نجامێ ده‌ن. له‌يره‌ دى ده‌ر ديپلۆماسى سياسيش داخريا. ئمجا هه‌ر ئه‌وچنه‌ ك له‌ خوه‌رهه‌ڵات ناوراس ره‌سمه‌، له‌ سياسه‌تێ ك وه‌ل يه‌ك كه‌ن له‌ وه‌رايوه‌ر يه‌ك خه‌نسن سياسه‌تمه‌داره‌يل و خه‌نجه‌ر له‌ پشته‌ودان جار تره‌ك دوپاته‌و ئه‌دێ. ئايا يه‌ فشارێ نيه‌ ئه‌را ميواندارى ئه‌خلاقى كورد له‌ هاشمى و ئه‌ى دو باوه‌ته‌ چه‌نێ په‌يوه‌ندى وه‌ل يه‌كا ديرن!؟. ئه‌گه‌ر په‌يوه‌نديش وه‌ل يه‌كا داشتوون،  سه‌ركرده‌يل سياسى كورد يه‌كێ له‌ برايل وان چوى مێوان رێ دانه‌سه‌ ماڵ خوه‌يان، خوو هه‌ وه‌ قسێه‌ جه‌ناب سه‌رۆك وه‌زيريل هه‌ چوى ئه‌و مێوانه‌گ خوه‌ى ناو ناويده‌ سه‌رمان وه‌لمان ره‌فتار بكا، دى ئه‌را وه‌ كوشتن و بڕێن!؟.

خوو ئمجا يه‌ يه‌ك باڵێ، باڵ ترێ بايمن ئيچنه‌ هويره‌و بكه‌يم ك ده‌وڵه‌ت قانوون ئه‌خوازێ نوا له‌ى قڕانه‌ بگرێدو وه‌ل ئيمه‌ى كورد سداقه‌ت ‌ديرێ!. خوو ئمجا له‌ى عيراقه‌ ك ته‌مام لايه‌نه‌يل وه‌ شێوه‌ى(جيا له‌ لايه‌ن كوردى) ده‌س له‌ كاره‌يل ترۆريستى داشتنه‌و هه‌ركاميان كه‌چه‌وبه‌چه‌ى خوه‌يان ديرن، بتوان له‌ى مه‌فه‌ره‌(ده‌رفه‌ته‌) ك كه‌فتيه‌، قازانجێ ئه‌را ره‌سين وه‌ ئارمانجه‌يل خوه‌يان هه‌ له‌ سياسى تا...تد هه‌رچێ عه‌قڵ خوه‌يان بڕى، ده‌س بكه‌نه‌ كوشتار وه‌ ئه‌و شێوه‌ ك دو كادر سياسى كوشتن، له‌ يه‌ بانه‌و خوارترو ده‌س بكه‌ن كوشتن مردم ئاسايى، ئمجا ئه‌و وه‌خته‌ چه‌ بكريه‌يد!.

تا ئه‌وره‌ ك م زانم و ديمه‌، خوو كوردفه‌يلى نه‌هامه‌تى كێش، جى نه‌يرێد خوه‌ وه‌پێ په‌نا بوه‌يد له‌ هه‌ردولا وه‌ قه‌وڵ كوردى له‌ خه‌سويران رانياى و له‌ باوان بێ جيه‌، ئمجا ئيجاره‌ بچوود ئه‌را كوو!.

يه‌ له‌ هاڵێگه‌ ك عه‌ره‌وه‌يل ئيجاره‌ خاس هساو خوه‌يان كردنه‌و دى نيه‌يلن كوردفه‌يلى له‌ قه‌پيان ده‌ر چوودو ئيجاره‌گه‌ دى كارێ وه‌ پێمان كه‌ن تا ئه‌را هه‌ميشه‌ چشتێ وه‌ ناو كوردفه‌يلى هه‌نه‌وده‌ى و له‌ لاپه‌ڕه‌يل مێژوو له‌ شوونمان بگردن. خوو له‌ى لايشه‌و زانيمن ك خوه‌مان ئويشيمن: كاسه‌ى به‌ش م له‌تێ نه‌ود، توام رووژێ سێ ‌جار وه‌رێ بووده‌و‌ خوار.

ئمجا خوو ئيمه‌ى كورد فه‌يلى چ قازانجێ له‌ دۆسيه‌ى فه‌يلى ك له‌ دادگا حوكم له‌ سه‌رێ درياو په‌رله‌مان وه‌ رسه‌مى ناسيه‌ى، برديمه‌ تا له‌ى قڕانه‌ ك ها له‌ نوامان بويمن. باس راسى ها له‌يره‌ هناى من فه‌يلى مه‌نمه‌و ژيان كه‌م هه‌ڵاكه‌رێ نيه‌ بره‌سێده‌ دادم، ئمجا دوياى نه‌مه‌ننم هه‌ ئه‌رام شين بكه‌. ئمجا خوو شين كردن له‌ سه‌ر دۆسيه‌ كوردفه‌يلى و ئه‌نفالێ ك وه‌ سه‌رێ هات نه‌ره‌سى ك ئه‌و هه‌مگه‌ قه‌ڵوقام و ده‌روه‌ده‌رى كيشا، ، ئمجا ئيجاره‌گه‌ وه‌ هاناى ئه‌ره‌سێد...!؟!.

شوڕش شاواز