به‌خت وه‌ ناڵ ئه‌سپ

شفق نيوز

ئه‌را ئاده‌میزاد، ك وه‌گووره‌ى ئه‌و به‌خته‌ له‌ناو ده‌رفه‌ت خاس و خاسترین ریكه‌فته‌یل له‌ناكاویگ (موفاجئات)ژیه‌یگ. دى وه‌و جووره‌ مه‌ردمان فره‌یگ له‌ژیر سایه‌ى ئه‌و باوه‌ڕه‌ ژیه‌ن.

ئه‌گه‌ر كه‌سیگ له‌كاره‌یلى سه‌ركه‌فتن خاسیگ باریگه‌ده‌س ئه‌وه‌ له‌كومه‌ڵگا وه‌پى ئویشن به‌ختدار، هه‌ر له‌وه‌ر ئه‌وه‌یش تاریفى وه‌ ئه‌وه‌ كریه‌یگ جویر ئه‌وه‌ك په‌ند كورده‌وارى خوه‌مان ئویشیگ (خوه‌ڵ بگریگه‌ ده‌س بووگه‌ ته‌ڵا ئه‌ڕاى)و له‌ هه‌ركوورا بووگ به‌خت ها وه‌لیا. ئه‌و كه‌سیشه‌ ك له‌ رووژگارى سه‌رنیه‌كه‌فیگ له‌ كاره‌یلى وه‌پى ئویشن(بى به‌خت)، وه‌لى له‌ڕاسى باوه‌ڕ یا قه‌ناعه‌ت له‌گشت وه‌ختیگ هووكار خوه‌شى و به‌خته‌وه‌ریه‌ نه‌ك به‌خت.

ئه‌را ئى مه‌سه‌له‌ پیاوه‌یل شه‌رع له‌ى باوه‌ته‌وه‌ باس كه‌ن و ئویشن: به‌خت ئه‌و چشته‌ نیه‌ ك وجوود داشتووگ، به‌ڵكوو گشت چشتیگ وه‌ باوه‌ڕه‌و شایه‌ت خوه‌شى و ته‌نگییش تاقیه‌وكردنیگ بووگ ئه‌را ئاده‌میزاد، چوینكه‌ خوداوه‌ند گه‌ورا هویچ وه‌ختیگ شه‌ڕ وه‌ به‌نه‌ى خوه‌ى نه‌تواسگه‌و نیه‌توایگ ، ئنجا دوینیم كه‌سه‌یل فره‌یگ هه‌ن له‌ى دونیا هه‌میشه‌ به‌خت خوه‌یان تاقیه‌و كه‌ن و له‌گشت كومڵگاو دونیایش ئى چشته‌ باوه‌ ك مه‌ردمان فره‌یگ باوه‌ڕ وه‌ به‌خت دیرن، یا كه‌سه‌یلیگ هه‌ن خوه‌یان وه‌خاوه‌ن به‌خت زانن، له‌هه‌مان وه‌خت كه‌سه‌یلیگ یش هه‌ن هه‌میشه‌ ناڕازیین له‌ چاره‌نویس و ناوچه‌وه‌یل خوه‌یان و هه‌ر ئویشن به‌خت نه‌یریم، هه‌ر له‌وه‌ر ئه‌وه‌یش ئى جووره‌ كه‌سه‌یلیگ فره‌جار ناچارن و په‌نا به‌نه‌ لاى جادوگه‌ره‌یل و فاڵچیه‌یل ئه‌را تاقیه‌وكردن به‌خت خوه‌یان، ك یه‌یش ناجایس و نادروسه‌ وه‌گووره‌ى ده‌ستوور دین. وه‌لى وه‌ل ئه‌وه‌یشا مه‌ردمانیگ هه‌ن نیه‌تویه‌نن دڵنیا بوون له‌وه‌ك به‌خت تاسه‌ر یاوه‌ریانه‌و له‌گشت قوناغه‌یل ژیانیان سه‌ركه‌فتگن.

له‌ فره‌یگ له‌ كلتوور ملله‌ته‌یل جه‌هان ناڵ ئه‌سپ كریه‌یگه‌ هووكار هاوردن به‌خت، ئنجا مه‌ردمان فره‌یگ هان له‌و باوه‌ڕه‌ ئه‌گه‌ر ناڵ ئه‌سپ بكه‌نه‌ دارا له‌قه‌ى قاپى ماڵه‌یلیان، ئه‌وه‌ ڕى نیه‌یگه‌ ڕوحه‌یل خراو یا شه‌یتان بچووگه‌ ناو ماڵه‌یلیان، وه‌ل ئه‌وه‌یشا ئویشن: ئه‌گه‌ر ناڵه‌گه‌ سه‌ره‌و خوار بكریه‌یگه‌ دارا ئه‌و كاریگه‌رى خاسیگ نه‌یریگ و هه‌ر له‌وه‌ر ئه‌وه‌یش بایه‌سه‌ ناڵه‌گه‌ ده‌مه‌و خوار نه‌وگ. ئى باوه‌ڕه‌یل باوه‌ تا ئیسه‌یش له‌ناو كومڵگایه‌یل جوراوجوور هه‌ر وجوود دیریگ جویر ئه‌وه‌ك چوین له‌ناو كومه‌ڵگاى كورده‌وارى خوه‌مان سه‌ر ئاسك كریه‌یگه‌ وه‌ر قاپیا وه‌و ئومیده‌ ك خه‌یر و خوه‌شى تیه‌ریگ و شه‌ڕ دویره‌و خه‌یگ . هه‌ر له‌وه‌ر ئه‌وه‌یش دوینیم ئه‌را ئى باوه‌ته‌ قسه‌و باس ئه‌ڵڵاجه‌وى كریه‌یگ .

مه‌سه‌له‌ى به‌خت له‌ڕاسى تاریخ كویه‌نیگ دیریگ له‌ كومه‌ڵگا، وه‌ل ئه‌وه‌یشا نه‌وه‌ له‌دویاى نه‌وه‌ په‌لكیشى كردنه‌ تاڕه‌سیه‌سه‌ ڕووژ ئمڕوو، وه‌لى وه‌ گووره‌ى زانست و ماریفه‌ت ئه‌وه‌ ئه‌ڕامان ده‌ركه‌فیگ ك گشت چشتیگ جویر ئه‌وه‌ك له‌سه‌ره‌تا ئشاره‌ت وه‌پى كردیم مینیگه‌ بان باوه‌ڕ و قه‌ناعه‌ت ئاده‌میزاد.