ئه‌ى لایه‌نگره‌یل نه‌ته‌وه‌و مه‌زه‌و بیلا ئاشتى بكه‌یم

شفق نيوز


 
ئێمه‌ى فه‌یلیه‌یل دویاى له‌ناوچگن سه‌رده‌م به‌عس و وه‌بوونه‌ى ناكووكیه‌یل فكرى ‌و رینمایه‌یل سیاسى چویچیاگ و تونڕه‌و و له‌هه‌مان وه‌خت وه‌بوونه‌ى ویرانكاریه یل  دژایه‌تى ناونى سه‌لیقه‌یل و هویر و فكرمان ترس له‌ تاویانه‌وه‌ دیریم و زاورمان چیه‌ بكه‌فیمنه‌ چوارچیوه‌ى یه‌كگرتگى ك گشتمان وه‌ناو پیكهاته‌ گرده‌و بكا، ئى دیارده‌یشه‌ شیوازیگ دوباره ‌كریاگه‌ ئه‌را ئه‌و رویداگه‌یل تیه‌ڵ و ئه‌زموونه‌یل ناسه‌ركه‌فتگه‌ ك زبرى هاورده‌ به‌رهه‌م له‌ قسه‌و نویساننمان، ك هه‌ر یه‌یش پیشكه‌شى ئه‌كاده‌ جایه‌ڵ جوانه‌یلمان.‌
له‌یرایش بایه‌سه‌ چشته‌یلیگ هه‌ن ئاشكرا بكریه‌ن:
یه‌كه‌م: ئیمه‌ى خیزان"شه‌فه‌ق"گه‌وراترین زه‌رده‌مه‌نیم ك چویچیایم و دویره‌وكه‌فتیم له‌ئاكام ئه‌و بار سه‌خته‌ ك هاته‌ تویشمان، وه‌ل ئه‌وه‌یشا ئیمه‌ نگه‌رانیم له‌وه‌گ له‌ هه‌ر وه‌ختیگ جوور ئى ئه‌زموون ئیمه‌ دوباره‌وه‌ بدێ ك جوور خواستیگه‌و پڕ هه‌وه‌جه‌یگه‌ ك بایه‌سه‌ ئه‌را ئایه‌نده‌ دابین ئه‌رامان بكریه‌ید.
 
دویه‌م: ئیمه‌ هه‌میشه‌ وتیایم ك یاخیبوین ویه‌یگه‌رى و ناڕه‌زایه‌تى بڕێگ له‌ كورده‌یل فه‌یلى له‌گشت ئه‌و نه‌خشه‌یله‌ ك ئیمه‌یش به‌شیگ بویم له‌لى و له‌ساى بى خه‌مى شماره‌ى فریه‌یگیش له‌ دانایه‌یل و روینه‌كردن له‌ تازه‌گه‌رى و ئالشتكارى له‌ناونى خوه‌مان ده‌رفه‌تیگ نه‌هیشت ئه‌را پیكهاتگه‌مان تا وه‌ئاسانى له‌ساى بتویه‌نستان له‌بان مێزیگ دابنیشن و گردیانه‌و بكا وه‌خاتر ره‌سین ئه‌را دید دروسیگ له‌وه‌ر وازكردن ئه‌و ئابڵوقه‌و ته‌نگه‌وه‌ریه‌ ك چه‌سپیا له‌بانمان چ وه‌ئاشكرا یا ژیر وه‌ژیر.
 
سێیه‌م: ره‌سینه‌وه‌و گونجیان له‌باوه‌ت سه‌لیقه‌تمان وه‌ ره‌ته‌وكردن و حاشاكردنمان له‌ یه‌كترى جیوه‌جى ناكریه‌یدو بنگه‌یل رووشنهویرى و كومه‌ڵایه‌تى وته‌نانه‌ت سیاسیمانیش بایه‌س هه‌وڵ ره‌سین بیاتان ئه‌را شیوازیگ له‌ گونجیان وه‌خاتر دانیشتن وگفتگوو و مه‌زه‌نه‌كردن توانایه‌یلیان ئه‌را جیگیركردن بنه‌ماى دروس تازه‌گه‌رى و ئاڵشتكارى و جیوازكردن ئه‌زموونه‌یل خاس و ده‌گمه‌ن، ئمجا ئه‌یانه‌یش وه‌خت ته‌مامیگ ئه‌راى نه‌یریم و ئه‌گه‌ریش ته‌ماشاى ساڵه‌یل گوزه‌یشته‌مان بكه‌یم، دوینیم له‌گشت وه‌خت و رووژگاریگ له‌ڕوى نه‌زه‌ریه‌و ئیمه‌ وه‌ل یه‌كا بویمنه‌، وه‌لى له‌ كار و ئه‌زموون له‌بان ئاساییترین مه‌سه‌له‌یگ ناكووك بویمنه‌ .
 
چواره‌م: دویاى نه‌مه‌ندن به‌عس ده‌رفه‌تیگ ته‌ڵایى ئه‌رامان هه‌ڵكه‌فت توانامان ده‌ربخه‌یم، وه‌لى نه‌ف وه‌رنه‌گرتیم له‌و ده‌رفه‌ته‌ و‌ دویاى وه‌سه‌رچگن فیشتر له‌ ده‌یه‌یگ هیمان میرات ئه‌و خوسه‌وكینه‌ته‌ له‌ سه‌رده‌م حزبایه‌تى مه‌ندگه‌و دیاره‌ وه‌پیمانه‌و.
 
په‌نجه‌م: هه‌ر بایه‌سه‌ بڕه‌سیمنه‌ شیه‌وكردن تازه‌یگ له‌باوه‌ت گوزاره‌ى ئنتماى نه‌ته‌وه‌یى و پابه‌ندبوین مه‌زه‌وى، چوینكه‌ ئه‌یانه‌ دژ یه‌كترى نین تا ناڕه‌زایى نیشان بیه‌ن ك ئه‌ویش له‌وه‌ر ئه‌وه‌گ ته‌نیا بنه‌ماى ئه‌خلاقى زه‌مانتكه‌ره‌ ئه‌را گرده‌وكردنمان وه‌ شیوازیگ تازه‌.
 
شه‌شه‌م: فیشتره‌ له‌ ده‌یه‌یگ مه‌ردم فه‌یلى باوه‌ڕ وه‌ بار تازه‌ى عراق دیرن وه‌ گووره‌ى به‌شبه‌شه‌وبوین نه‌ته‌وایه‌تى و تایفى و هه‌وڵ ئه‌وه‌ داس وه‌لیا بگونجیه‌ید، وه‌لى ناكووكى ك هویچ ئه‌نجامیگ نه‌یرید له‌ناونى لایه‌نگره‌یل فكر نه‌ته‌وه‌یى و مه‌زه‌وى جى داخه‌ ده‌نگى به‌رزتره‌ له‌ هه‌ر هه‌وڵیگ تر ئه‌را ره‌سین و نزیكه‌وبوین له‌ناونى خوه‌مان.
 
هه‌فته‌م: عه‌یب نیه‌ وه‌ زووان خوه‌مان داواى دابینكردن پشتگیرى بكه‌یم چ ماددى یا مه‌عنه‌وى له‌ پرووژه‌یگ ك تایبه‌ته‌ وه‌ پیكهاته‌گه‌مان،  وه‌تایبه‌ت له‌ رووڵه‌یل په‌یوه‌ندیدار وه‌ كیشه‌گه‌، ك یه‌یش نادیده‌ منه‌ت یا به‌زه‌یى له‌لیان، به‌ڵكوو مه‌سه‌له‌یگ ئاساییه‌و زویتر ئه‌زموون له‌تى داشتیمنه‌ وه‌تایبه‌ت له‌و رووژگاره‌یله‌ ك له‌تى گه‌نجینه‌ بویمنه‌ ئه‌را جمشته‌یل نیشتمانى و ئازادیخواز.
 
دویاخریش جوور ئه‌وه‌گ دوینمینه‌ى، حزبه‌یل و خاوه‌ن بریاره‌یل سیاسییش له‌ هه‌ردوگ لایه‌ن نه‌ته‌وه‌یى و مه‌زه‌ویه‌و له‌ روخساره‌و مایه‌ى جیاوازى و دژ وه‌ یه‌كتریین ، وه‌لى له‌ناونى هه‌چانیگ  ئه‌را هه‌چانێگ تر  ره‌سنه‌ ریككه‌فتنیگ ئاسایى و به‌رژه‌وه‌ندیانه‌، ك وه‌و خاتریشه‌ ئه‌تویه‌نیم بویشیم  مه‌ردمان سته‌مدیده‌ مان بوینه‌سه‌ لایه‌نگر ئه‌و دو لایه‌نه‌ ك هانه‌ كیشمه‌كیش وه‌ گووره‌ى په‌یوه‌ندیه‌یل ناونیان، ئمجا  ئیمه‌یش باوه‌ڕمان ئه‌وه‌سه‌ پیكهاته‌گه‌مان وه‌ گشت جورئه‌تیگه‌و بایه‌سه‌ بڕه‌سیده‌ قوناغیگ ك بتوه نید شیوه‌یگ له‌ چاره‌سه‌ر ئه‌را دویره‌وخستن ئه‌و كیشمه‌كیشه‌ بوینیده‌و له‌ناونى ئه‌و سفه‌ت دژ یه‌كتریه‌ وه‌شیوه‌یگ ك پابه‌ندبوین وه‌ نه‌ته‌وه‌ هه‌ڵوژنید له‌جیاى قه‌ومیه‌تچێتى و خوه‌شه‌ویسى مه‌زه‌و له‌جیاى تایفى.
 
وه‌ل ئه‌وه‌یشا بایه‌سه‌ یه‌یش له‌ هویرمان نه‌چێد ك جیاوازى ناونیمان جوور به‌نه‌ى خودا ئه‌وه‌سه‌ ك ته‌نیا وه‌ غه‌ڵه‌ته‌یل بویچگیگ گشت خاسییگ له‌هویره‌و ئه‌وه‌یم، وه‌لى چه‌واشه‌ى یه‌ خودا له‌گشت خراوه‌یگ گوزه‌یشت ئه‌كا وه‌ختێگ  بویچگترین خاسییگ پیشكه‌ش بكریه‌ید.
 
عه‌لى حسێن فه‌یلى

ج . أ