له‌یل و مه‌جنون راسكانى كییه‌..؟

شفق نيوز

  ئاشقبوین گه‌وراترین هووكاره‌ ئه‌را دروسكردن پرووسه‌ى هاوسه‌رگیرى و له‌ هه‌مان وه‌خت مه‌ترسیدارترین هووكاریشه‌ ئه‌را بڕیارداین له‌بانى. ئه‌گه‌ر هات و ئشق هووكاره‌یل جوور جیاوازى كلتوورى، ئابوورى، عومر، خوه‌نین، كه‌سایه‌تى و...هتد له‌وه‌رچه‌و نه‌گریدو جوور ئاشق سه‌ره‌ڕى بوود، ئه‌وه‌ له‌ى حاڵه‌ته‌ خاستر ئه‌وه‌سه‌ هه‌ر ئاشق نه‌ود و هویچ كاریگ ئه‌را هاوسه‌رگیرى ئه‌نجام نه‌یه‌ید.

له‌ ئشقه‌یل ئاگرین ك یه‌ك لایه‌ن له‌تى ده‌ركه‌فیدو ئشقه‌گه‌ یه‌كلاینه‌و كه‌س وه‌رانوه‌ر ئاگادار نیه‌ له‌ سزیان كه‌س وه‌رانوه‌ر، نوڕید یه‌ى وه‌ راده‌یگ نزیكه‌و بویه‌و چیه‌سه‌ ناو قویلایى مه‌سه‌له‌گه‌و دى بیئاگاس له‌ یه‌كلایه‌نى وجوود خوه‌ى و گشت چشته‌یل گرانقیمه‌تى هه‌ڕاجفرووش ئه‌كا.

توانایایه‌یل ئاشقبوین ئاده‌میزاد بڕیگ هووكار گرته‌سه‌ خوه‌ى، جوور ئه‌وه‌ك گشت چشته‌یلى له‌ سه‌رده‌میگه‌و ئه‌را سه‌رده‌میگ تر ئاڵشتكارى ئه‌یاده‌ بانى، ئشق وجوودیگه‌ له‌ناو هس ئاده‌میزاد، له‌یوا ئه‌یاده‌ خه‌یاڵى ك ئه‌و چه‌وى كه‌فته‌سه‌ كه‌س وه‌رانوه‌ر، وه‌لى ئه‌و خوه‌ى له‌لى شاردیاده‌و ك ته‌نیا له‌وه‌خت ئاسایى جوور یادگارییگ هاتیاده‌ وه‌رچه‌وى، ئنجا له‌یوا هس كه‌ید ك زویتر چه‌ود كه‌فته‌سه‌ ئى كه‌سه‌، ك یه‌یش ئه‌و هسه‌سه‌ ك له‌ناو خه‌یاڵد دروس بویه‌ جوور گووشگرتن له‌ مۆسیقا یا دوینستن كه‌سیگ یا چشتیگ ك زویتر ئه‌و ره‌سمیه‌ وه‌ته‌واوى دروس نه‌ویه‌، تا رووژیگ ك رویداگ ئشق روى ئه‌یادو ئه‌و كه‌سه‌ ك چه‌ن ساڵ گه‌ردیایده‌ شوونى ئه‌یاده‌ وه‌رچه‌ود و له‌وه‌رانوه‌رد وسیه‌یدو ئه‌وسا ئویشید ئه‌یه‌ خوه‌یه‌، ئه‌یه‌ ئه‌و كه‌سه‌سه‌ ك ساڵه‌یلیگه‌ من له‌ شوونى گه‌ردم و سایه‌كیه‌گه‌ى له‌وه‌رچه‌وم بوى و ئیسه‌ دیمه‌وه‌ى.

ئنجا ئویشیده‌ خوه‌د ئایا وه‌ راسى ئه‌یه‌ ئه‌و كه‌سه‌سه‌ ك من ساڵه‌یلیگه‌ له‌ شوونى گه‌ردم یا ته‌نیا كه‌سیگ دعایه‌چیه‌و به‌س، ئنجا ئه‌گه‌ر كه‌میگ ئاقڵ بوید موڵه‌ت وه‌ خوه‌د نایه‌ید تا له‌و په‌یكه‌ریگ دروس بكه‌ید ئه‌را ئه‌وه‌ك بپه‌رسیده‌ى.

بایه‌سه‌ ئه‌وه‌یش بزانید ك ئشق ماناو مه‌رامیگ فراوانتر دیرید له‌وه‌ك بخوازید وه‌ هه‌ركه‌سیگ یا هه‌ر چشتیگ وه‌ شیوه‌ى ته‌واویگ نسبه‌ت وه‌پى بیه‌یم، بیگومان ئه‌گه‌ر ئه‌وه‌نه‌ سه‌ر چه‌مانوید ئه‌وه‌ ئاشق نیید.

ئنجا له‌ى حاڵه‌ته‌ هه‌ڵه‌په‌ڵه‌ مه‌كه‌و ئارام بگر تا كه‌میگ چه‌ود رووشنه‌و بوودو چشتیگ له‌لى بفامید، وه‌نا ئه‌گه‌ر له‌یوا نه‌ود، دویاخر وه‌ مه‌رام دڵ ناشكیه‌یده‌و، وه‌لى ئه‌گه‌ر وه‌رچه‌و رووشنه‌و بوى و نه‌ف له‌ ئه‌زموون كه‌سه‌یل تر وه‌ربگریدو پشت وه‌ خودا بووه‌سیدو گشت رووژه‌یلد وه‌ناو ئه‌وه‌و ده‌س وه‌پى بكه‌یدو داواى ده‌سمیه‌ت و چه‌و رووشنى له‌لى كردید، ئه‌وه‌ له‌ى حاڵه‌ته‌ سه‌ركه‌فتگ بوید له‌و ئشقه‌و بایه‌سه‌ قه‌درى بزانید و ئاگادارى بویدو خوه‌دیش ئاماده‌ بكه‌ید ئه‌را چشت خاس تا بایده‌ تویشد.

نه‌جاح هه‌ورامى

ج . أ