جوانى سه‌رچه‌وه‌ى خه‌یر و خوه‌شه‌ویسیه‌

شفق نيوز

  جوانى یه‌كیگه‌ له‌ دیمه‌نه‌یل و تایبه‌تمه‌ندیه‌یل ژیان، گشت چشتیگ جوانه‌ له‌ى دونیا، چوینكه‌ خواوه‌ند گه‌ورا دروسكه‌ر ئى دونیاى پڕ جوانییه‌سه‌و خوه‌شى له‌ جوانى ئه‌یاد، ئنجا دامه‌زرانن دروسكریاگه‌یل خسته‌سه‌ ژیر په‌یمانه‌سازى تایبه‌ت پڕ دقه‌تیگ و گشت چشتیگ له‌تى وه‌ په‌یمانه‌س داگه‌.

ئه‌فلاتۆن فه‌یله‌سووف یۆنانى وتگه‌: جوانى و خه‌یر و هه‌ق گشتى یه‌ك راسیه‌، ئه‌و چشته‌ جوان نیه‌ ك له‌بان ناهه‌قى بوود، ئنجا هه‌ر له‌وه‌ر ئه‌وه‌یش جوانى ك هه‌میشه‌ هه‌ق و خه‌یره‌، هویچ وه‌ختیگ وه‌ل به‌د و گه‌ناته‌كار یه‌كه‌و ناگرن ك هه‌میشه‌ دڕنده‌ن له‌ گشت كردوه‌یلیان و له‌و زه‌ره‌ده‌یله‌ ك ره‌سننه‌ى مه‌ردم و ملله‌ته‌یل.

په‌یوه‌ندى ئاده‌میزاد وه‌ سروشته‌و، په‌یوه‌ندییگه‌ دووسانه‌، یه‌یش له‌وه‌ختیگ ك سروشت له‌ بنه‌ڕه‌ته‌و جوانى و هه‌ق و خه‌یره‌، ئنجا ئاده‌میزاد هه‌ر له‌ بنه‌ڕه‌ته‌و پیكهاتگه‌ له‌و سروشته‌و هس وه‌ ره‌زامه‌نى ئه‌كا له‌وه‌رده‌م ره‌نگ و شیوه‌ى ئه‌و سروشته‌، دى ئه‌گه‌ر له‌ حاڵه‌تیگیش ئه‌و هسه‌ له‌لاى په‌یا نه‌وى، ئه‌وه‌ بیگومان وه‌ ناته‌واو ته‌ماشا كریه‌ید له‌وه‌ختیگ هس وه‌و گونجیان و ریكخستنه‌ نه‌كا.

بیگومان ئیمه‌ له‌ هه‌ر شوونیگ بژیه‌یم جوانى ها ده‌ورگردمان و تامى كه‌یم و دوینیمنه‌ى له‌ ئاسمان پاك بیگه‌ردو ئه‌و ئاساره‌یل جریوه‌دار و ئه‌و مانگه‌ ك دونیا رووشنه‌و ئه‌كا، تام جوانى له‌ ته‌م و هه‌ور و زه‌ڕینه‌و سیمینه‌ ئه‌كه‌یم، تامى له‌ تكه‌ى واران و تیه‌نگ شكانن خاك ئه‌كه‌یم، تام جوانى له‌ چه‌و ئاسك و زه‌رده‌خه‌نه‌ى مناڵه‌یل و ره‌نگ ماسیه‌یل و كنار ده‌ریایه‌یل و لمه‌یل ته‌ڵایى و باخ و بوسان و گوڵستانه‌یل و گوڵه‌یل نازگ و سه‌وزه‌ڵانى و داره‌یل به‌ردار و به‌رزى داره‌ خورمایه‌یل ئه‌كه‌یم.

وه‌ هه‌ر حاڵ شایه‌ت جوانى په‌یوه‌س بوود وه‌ ئاده‌میزاد یا ئاژه‌ڵ و كوچگ و كویه‌و ده‌ریاو ئاسمان و ته‌نانه‌ت هه‌ور و پیكهاته‌یلى جوور واران و وه‌فروارین، یا گوزاره‌یگ ئنسانى بوود له‌ هونه‌ره‌یل جوراوجوو، یا په‌یوه‌س بوود وه‌ لایه‌ن ماددى یا هسكردن و لایه‌ن ئه‌قڵى و ماریفى، یا په‌یوه‌س بوود وه‌ ئه‌زره‌ت و بیده‌نگى یا په‌یوه‌س بوود وه‌ روخسار جوان و جه‌سه‌ى جوان یا شانۆیگ یا پارچه‌یگ مۆسیقاى جوان یا تابلۆیگ هونه‌رى یا باخچه‌یگ سروشتى ك دویاخریش ده‌س ئاده‌میزاد وه‌پى ره‌سیه‌.

هه‌ر له‌وه‌ر ئه‌وه‌یش تویه‌نیم بویشیم ك جوانى سه‌رچه‌وه‌ى خه‌یر و خوه‌شه‌ویسیه‌و شایه‌ت ئاده‌میزادیش ته‌نیا دروسكریاگیگ بوود ك فیشتر هس وه‌ جوانیه‌یل ئه‌كا وه‌ل ئه‌و هه‌مگه‌ مه‌ینه‌تى و ناخوه‌شیه‌ ك وه‌پیه‌و گوزه‌ر ئه‌كا.

به‌شیر خه‌ڵه‌ف

ج . أ