ئايا داعش وه‌ جه‌نگ كووتايی وه‌پی ئه‌يه‌ێد؟

شفق نيوز

داعش دوير نيه‌ وه‌ جووريگ تر بايده‌ بان شانۆ، گشتمان ئاگاداريم له‌وه‌ك قاعيده‌ وجوود داشت، وه‌لی ئيسه‌ داعش وجوود ديريد و له‌ هه‌مان وه‌خت شايه‌ت وه‌ نه‌مه‌ندن داعشيش گرووپيگ تر په‌يا بدێ، چوينكه‌ سه‌رچه‌وه‌يگ پان و وه‌رفراوان هه‌س ئه‌را ئی گرووپه‌يله‌، ك هه‌ر وه‌ختيگ بخوازن ئه‌تويه‌نن لايه‌نگر له‌لی په‌يا بكه‌ن.

هه‌ر وه‌و خاتريشه‌ من ئويشم وه‌ ته‌نيا وه‌ جه‌نگ و چه‌ك و جبه‌خانه‌يل كووتايی يه‌كجاره‌ وه‌ داعش نايه‌يد، به‌ڵكوو بايه‌سه‌ ئاو ئه‌و سه‌رچه‌وه‌يله‌ وشكه‌و بكريه‌يدو دی نه‌تويه‌نن هوير و ئه‌رای چوين له‌و سه‌رچه‌وه‌يله‌و وه‌ربگرن، ك ئه‌ويش وه‌ پله‌ی يه‌كه‌م وه‌ هوشياركردنه‌وه‌ی مه‌ردم ئه‌نجام ئه‌دريه‌يد و بايه‌سه‌ له‌ به‌رنامه‌يل خوه‌ندن سه‌ره‌تاييه‌و ده‌س وه‌پی بكريه‌يد، چوينكه‌ زوورم فريه‌ی وڵاته‌يل ئسلامی په‌روه‌رده‌ی چه‌فتيگ ديرن ئه‌را خوه‌ندكاره‌يل ناو خوه‌ندنگايه‌يل و بڕيگ له‌ مه‌لاو زانايه‌يل ئاينييش جی داخه‌ له‌ مزگفته‌يله‌و رووژانه‌و ساڵ دوانزه‌ مانگ وه‌ ئاره‌زوو خوه‌يان تون وتيژی له‌و ئايينه‌ ئه‌خه‌نه‌ڕوی، ك يه‌يش ئه‌رك گرينگ ده‌سڵات سياسيه‌ ك بايه‌سه‌ له‌ڕی په‌رله‌مانه‌و گشت ئه‌و به‌رنامه‌يل نه‌گونجياگه‌ وه‌ل جه‌هان ديموكراسی له‌ پرۆگرام خوه‌ندن هه‌ڵگرن و باس كوشت و كوشتار و كافر و خه‌بات له‌وه‌ر ئه‌و ئايينه‌يله‌ لاوه‌ن ئه‌را ئه‌وه‌ك نه‌وه‌يگ تازه‌ وه‌ هوير ژيان ديموكراسی و يه‌كتر قه‌بولكردن په‌روه‌رده‌ بكريه‌يد ك له‌ ئاينده‌ فريه‌ وه‌ئاسانی كوومه‌ڵگای مه‌ده‌نی و خه‌بات ئه‌را ديموكراسی و وه‌خشين و هوير وڕای جياواز قه‌بول بكا.

مامۆستايه‌يل ئاينييش له‌ی قوناغه‌ بايه‌سه‌ پشت بكه‌نه‌ ئه‌و به‌رنامه‌يل كافركردن و قڕكردن مه‌ردم و داگيركردن وڵاته‌يل و رواكانن ئافره‌ته‌ له‌ژير هه‌ر مه‌هانه‌و ده‌سپيچگيگ و له‌جيای ئه‌وه‌ كرده‌وه‌يله‌ باس يه‌كتر قه‌بولكردن و وه‌خشين و ئاشتی بكه‌ن له‌ وتار هه‌فتانه‌.

ئمجا ئه‌يانه‌ تا له‌سه‌رچه‌وه‌ جوور ميكرۆب و فايرۆس بنبڕ نه‌كريه‌ن، ئه‌وه‌ بيگومان جوور ئه‌و گيانله‌وه‌ره‌يل زه‌ره‌دبه‌خشه‌ هه‌ر دوباره‌ بوونه‌وه‌و خوه‌يان تازه‌وه‌ ئه‌كه‌ن وه‌ هه‌ر جوور و شيوازيگ بويه‌.

له‌ كووتاييش ئويشم: دی بايه‌سه‌ ده‌وڵه‌ته‌يليش واز له‌ پشتگيريكردن ئيچنه‌ گرووپه‌يله‌ بارن و ئه‌را دژايه‌تی يه‌كتری و ده‌سكه‌فت سياسی نارنه‌ی كار، چوينكه‌ ئه‌يه‌ چشت گڵاويگه‌و دوياخريش روی له‌ خوه‌يان ئه‌كا.
سه‌لام عه‌بدوڵڵا

ج . أ