ئاھەنگ یاد ھەفت ساڵەی دامەزرانن راديو شەفەق

شفق نيوز

وەڕیەوبردن ئەنجوومەن وەڕیەوبردن دەزگای ڕووشنھویری و ڕەسانن کوردەیل فەیلی (شەفەق) و کارمەندەیل دەزگاگە و بژاردەیگ لە گووشتەکنەیل وھەوادارەیل و دووسەیل ڕادیۆ و دەزگای شەفەق و کەناڵەیل ڕەسانن، و وەبوونەی داگیرسانن مووم ھەیشتم دامەزرانن دەزگاگە، و وەل ئاھەنگ گورانی و مۆسیقا و ھەڵپەرکەی کوردی ، ئاھەنگیگ تایبەت سازدریا.

عەلی حوسێن فەیلی لە وتەیگ وەخەیرھاتن گەرم لە ئامادەبویەیل کرد و ئاماژەیش وەوەدا ک شەفەق ماڵ گشت مەردم شار بەغدایە وەگشت نەتەوە و پیکھاتەیلیەو، تەنیا ئەوە نیە ک دەنگ پیھاتەیگ دیاریکریای بوود ھەرچەنی ک کوردەیل فەیلی تایبەتمەندی ناونیشان دەزگاگە ھاپیەو تەنیا لەوەر تایبەتمەندی ئەزموونەسەختەگەیانە لەی وڵاتە ک گشت چشتیگ کردنە قوربانی و ھویچ چشتیگ لەتی وەپیان نەکەفت.

فەیلی داوا لە ئامادەبویەیل کرد ھەرکەسی وەگوورەی توانای خوەی ھاوخەمی و بەشداری وەل ئەو ھاوکێشەیل نیشتمانیە بکەید ک لە رادیۆ شەفەق و بەشەیل ڕووژنامەنویسی دەزگاگە خریەیدە ڕوی و ھەمیشە تەرکیز لە خاڵەیل ھاوبەش بکەیمن ئەرا زیای کردنیان و دویرەوکەفتن لە خاڵەیل ناکووکی لە تاواننیان.

جەواد کازم فەیلی بەرێوەبەر ڕادیۆ شەفەق  لە وتەگەی ھەمیش وەخەیرھاتن گەرم ئامادەبویەیل کرد و ئاماژە وەو کێشە و گیروگرفتەیلە دا ک لە ئان کارکردن تویشیان تیەید و داوا لە ئامادەبویەیل گووشتەکنەیل کرد ک ھاوکار بوون لە کەمەوکردنیان و جەختکردن لە بان قەبوول کردن وە ڕا و ڕای وەرانوەر .

ھەر لەی ئاھەنگە سوندس میرزا بەرێوەبەر بەرھەمەیل ڕادیۆگە و بێژەر یا موزیعەیل و پێشکەشکەرەیل بەرنامەیل ڕادیۆ شەفەق خوەیان وە ئامادە بویەیل ناسانن و لەو لایشەو ئامادەبویەیلیش خوەیان وەیەکتری ناسانن و لە کەش و ھەوایگ پڕ لە سووز خوەشەویسی وەل ئاھەنگ مۆسیقا و گورانی کوردی و خواردن شام ئیوارە، تا وەختیگ درەنگ دریژە دریا ئاھەنگەگە وە ئومید پیشکەفتن زیاتریگ ئەرا دەزگا و ڕادیۆ شەفەق.