ئه‌ڕاچه‌ جایه‌ڵ جوانه‌یل نگه‌رانن له‌ى وڵاته‌؟

شفق نيوز

ئه‌را وه‌كارخستن تواناو به‌شداریكردنیان له‌ مه‌سه‌له‌ى وه‌ڕێه‌وبردن وڵات و كاره‌یل تر له‌وه‌ر خاتر زینگه‌وكردن و بنیاتناین ژیرخان ئابوورى و هاوردنه‌وه‌ى خوه‌شگوزرانى ئه‌را گشت تاكه‌یل كوومه‌ڵگا.

 

 

له‌یره‌ جایه‌ڵ جوانه‌یل ك چینیگ گرنگ كوومه‌ڵگان ئایا ئه‌را چه‌ بایه‌د گرنگى تایبه‌تیگ وه‌پیان نه‌دریه‌ید؟ ئه‌را تائیسه‌ ده‌سه‌ڵات سیاسى نه‌تویه‌نستگه‌ نه‌ف خاسیگ له‌ تواناى جایه‌ڵه‌یل وه‌ربگرید؟ ئه‌راچه‌ ساڵانه‌ هه‌زاران جایه‌ڵ جوان ك زانكۆ و په‌یمانگا ته‌واو كه‌ن بیبه‌شن له‌ دامه‌زرانن؟ ئه‌ڕاچه‌ هه‌زاران جایه‌ڵ له‌وه‌ختیگ ئاواره‌ى وڵاته‌یل تر بوون ئاماده‌ نین گله‌و بخوه‌ن و له‌یره‌ بژیه‌ن؟

 

یه‌یش بیجگه‌ ئه‌وه‌ك هه‌زاران جایه‌ڵ جوانه‌یل تر بیكارن و ئه‌گه‌ر كاریگ رووژانه‌ بكه‌فێده‌ ده‌سیان ناتویه‌نن وه‌پى ئاینده‌یگ رووشن دابین بكه‌ن ئه‌را ژیانیان، یه‌یش بیجگه‌ گرانى و سه‌ختى وه‌یه‌كه‌وه‌ناین ژیان هاوسه‌رى.

 

ئمجا له‌یره‌ جایه‌ڵه‌یل ناهمیبوین وه‌ خوه‌یان دوینن له‌ى عراقه‌ ك ده‌سه‌ڵاتیگ سیاسى ئه‌واده‌ى رێیه‌وه‌و دوینن هویچ دابه‌شكردنیگ دادگه‌رانه‌ نییه‌ له‌و سامان و دارایى وڵاته‌ له‌بان تاكه‌یل ئه‌و كوومه‌ڵگا ك جوانه‌یل له‌تى ژیه‌ن، وه‌ل ئه‌وه‌یشا دوینید فره‌یگ له‌ جایه‌ڵ جوانه‌یلیش هانه‌ پله‌و پایه‌ى تایبه‌ت و مانگانه‌ى خاسیش دیرن و ژیان خاسیگ به‌نه‌ سه‌ر و جیاوازن له‌ جایه‌ڵه‌یل فه‌قیرحاڵ و بیكار، چوینكه‌ كه‌س و كاریان ده‌سه‌ڵاتدارن یا وه‌رپرس سیاسین و كاره‌یلیان دابین كردنه‌.

 

هه‌ر له‌وه‌ر ئه‌وه‌یش جایه‌ڵ جوانه‌یل ئى عراقه‌ له‌ژیانیگ نادیار و فه‌قیرییگ نادادگه‌رانه‌ ژیه‌ن له‌وڵاتیگ ك خاوه‌ن نه‌فت و غاز و بوودجه‌ى فره‌و سه‌رده‌م ئاڵشتكاریه‌یل گورج و شوڕش زانیارى و پێشكه‌فتن بواره‌یل ته‌كنۆلۆجیا تا ڕاده‌یگ ك گشت تاكیگ له‌ هه‌ر كوومه‌ڵگایگ و له‌هه‌ر شوونیگ له‌بان ئى گووشه‌ى زه‌ویه‌ بژیه‌ید تویه‌نێد چركه‌ وه‌ چركه‌ ئاگادار گشت هه‌واڵ و ئاڵشتكاریه‌یل گورج جه‌هان بوود.

 

مه‌سه‌له‌ى گرنگینه‌یاین وه‌ جایه‌ڵ جوانه‌یل یا وه‌كارنه‌خستن توانایه‌یلیان و نه‌ف وه‌رنه‌گرتن له‌ ئه‌زموونه‌یلیان له‌و وڵاته‌یله‌ بویه‌سه‌ مایه‌ى ئه‌وه‌ك ئاینده‌ى خراویگ له‌لى بكه‌فێده‌و.

 

هه‌ر له‌وه‌ر ئه‌وه‌یش ئه‌گه‌ر بخوازیم وه‌ره‌و نوا گام بنه‌یم و بخوازیم وڵات وه‌ره‌و ئاوه‌دانى و ئارامى بووه‌یم و كوومه‌ڵگامان وه‌ره‌و خوه‌شگوزرانى بووه‌یم، بایه‌د گرنگى بیه‌یمنه‌ چین جایه‌ڵ جوانه‌یل و نه‌ف له‌ توانایان وه‌ربگریم و ژیان ئه‌ڕایان ده‌سه‌وه‌ر بكه‌یم، تا ئه‌وانیش ئاسووده‌ بوون له‌ى عراقه‌ ك له‌تى هاتنه‌سه‌ دونیاو له‌تى ژیه‌ن.

 

ئه‌بوبه‌كر گه‌ڵاڵى

 

ج. ا