شه‌فه‌ق ها كنار كووتايى

شفق نيوز

له‌سه‌ره‌تاى قه‌يران سياسى و دارايى ناونى هه‌رێم و حكومه‌ت به‌غدا ئاكامه‌يل خراوى راسه‌وخۆ كاريگه‌رى له‌ بانمان داشت، چوينكه‌ شه‌فه‌ق له‌ سه‌ره‌تاى دامه‌زراننى له‌لايه‌ن حكومه‌ت هه‌رێمه‌و پشتگيرى كريا له‌ڕى به‌خشينيگ جوور باقى ده‌زگايه‌يل تر رووشنهويرى ك نوێنه‌رايه‌تى پيكهاته‌يل تر ئه‌كه‌ن له‌ كومه‌ڵگاو تايبه‌تمه‌ندى ديرن جوور ئه‌وه‌گ پيكهاته‌گه‌ى ئيمه‌يش ديرێده‌ى.

شايه‌ت بريگ له‌ ده‌زگايه‌يل ره‌سانن حزبى ده‌روازه‌يليگ تر داشتوون له‌ وه‌رده‌وامى له‌ كاره‌يلى، وه‌لى ده‌زگاى شه‌فه‌ق جوور باقى ده‌زگايه‌يل تر ئه‌هلى ئوميديگ ئه‌ڕاى نيه‌ وه‌ بوونه‌ى نه‌وين داهات زاتى يا پشتگيرى ده‌ره‌كى يا ريكلام و چشته‌يل تر.

ده‌زگاگه‌مان هه‌ر له‌سه‌ره‌تاى دامه‌زراننى له‌ 2004 حكومه‌ت به‌غدا له‌وساوه‌ تا رووژ ئمڕوو هويچ ده‌سميه‌تيگى نه‌ياگه‌، به‌ڵكوو وه‌چه‌واشه‌وه‌ گشت شيوازه‌يليگ ئدارييش هاورده‌ كار ئه‌را فه‌رزكردن گشت جووره‌ باجه‌يليگ له‌بانمان وه‌ شيوه‌يل جوراوجوور، هه‌ر له‌وه‌ر ئه‌وه‌يش پيشبينى ئه‌وه‌ له‌ حكومه‌ت نه‌كرديم ك گاميگ يا برياريگ له‌ به‌رژوه‌ندى له‌يوا ده‌زگايه‌يل بيه‌يد و وه‌ چه‌واشه‌ى ئه‌و ئه‌وه‌گ ك گوايا پشتگيرى كه‌مينه‌يل و پيكهاته‌يل و سته‌مديده‌يل كردياد.

نزيكه‌ى ده‌يه‌يگ وه‌رده‌وام بويمن له‌ كار، وه‌ل سه‌ره‌تاى ده‌يه‌ى دويه‌ميش ئاره‌زوو ئه‌وه‌ كرديايم كاره‌گه‌ فراوانتر و پيشكه‌فتگتر بكه‌يم جوور وازكردن كه‌ناڵيگ ته‌له‌فزيۆنى يا كاره‌يل تر له‌ ئه‌زه‌ره‌يل فراوان، وه‌لى ئيسه‌ گشت خه‌م و هه‌وڵه‌يلمان له‌ چوينێتى وه‌رده‌وامى كار ماڵپه‌ڕ ئاژانس شه‌فه‌ق نيوزه‌، وه‌ل گشت ئه‌و مه‌ينه‌تى و هووكاره‌يليشه‌ ك به‌رائه‌ت كووتايى كاره‌گه‌ ئه‌كه‌ن، وه‌لى وه‌ نيشانه‌ى باوه‌ڕمان و فشار دڵسووزه‌يل و ئه‌وانه‌گ په‌يوه‌سن وه‌ كيشه‌گه‌مان و له‌ ڕوى وه‌رپرسيارێتيه‌و نه‌وه‌سايمنه‌ى، ك هه‌رچه‌نى به‌ساننى كووتايى وه‌پيمان ئه‌يه‌رێد له‌ باقى پابه‌نديه‌يل دارايى و ئدارى و چشته‌يل تر، چوينگه‌ هايم له‌و باوه‌ڕه‌ ك فه‌يليه‌يل ئيسه‌ له‌گشت وه‌ختيگ فيشتر هه‌وه‌جه‌ وه‌ ده‌زگايگ ره‌سانن ديرن رووژانه‌ كيشه‌يليان بخاده‌ ڕوى و وه‌رده‌وام وجوود داشتوود وه‌تايبه‌ت له‌ساى نه‌وين ئاشكرامان له‌ گشت بواره‌يل.

ئمڕوو وه‌ل گشت هه‌وڵه‌يليگ ئه‌را قورتاركردن ئه‌وه‌گ مه‌ندگه‌ وه‌بوونه‌ى وه‌رده‌وامى قه‌يرانه‌يل و نه‌ڕه‌سين هويچ هاوكارى يا ده‌سميه‌تيگ وه‌ل ئه‌و هه‌مگه‌ هه‌وڵه‌يل فريه‌ى خيزان شه‌فه‌قه‌و ئه‌و كاره‌يله‌ ك وه‌شيوه‌ى قه‌رز ئه‌كريه‌يد ئه‌را نزيكه‌ى دو ساڵه‌ و ته‌نانه‌ت وه‌ل فريه‌يگ له‌ هه‌وڵه‌يل خوه‌يبه‌خشى، وه‌لى رووشناييگ له‌ناو ئى تونێل تيه‌ريكه‌ وه‌دى ناكه‌يم.

پيكهاته‌يل كومه‌ڵگا له‌و كه‌مينه‌يله‌ ك جيهاد له‌وه‌ر مه‌ندنه‌وه‌ له‌ ژيان ئه‌كه‌ن هه‌وه‌جه‌ وه‌ په‌يوه‌ندى ناونى يه‌كترى و وه‌ل كه‌سه‌يل تريش ديرن له‌ سه‌رده‌م ئالشتكاريه‌يل زانيارى، وه‌ ماناى وه‌رده‌وامى پشتگيرى و سه‌رمايه‌ وه‌خاتر ره‌سين وه‌ ئامانجه‌يل و دوياخريش پشت وه‌ خود به‌سانن.

ئيمه‌ ئه‌وساو تا رووژ ئمڕوويش باوه‌ڕمان ئه‌وه‌ بوى ك بوار كاره‌ ره‌ساننه‌گه‌مان زه‌مينه‌يگ گونجياگ ئه‌رامان ره‌خسنێد وه‌خاتر ره‌سانن كيشه‌ى فه‌يليه‌يل ئه‌را راى گشتى و فراوانكردنى، ئمجا له‌ده‌سداين له‌يوا ده‌زگايه‌يليگ له‌ ده‌رفه‌ت په‌يوه‌نديمان و له‌ وجوود سياسى و كومه‌ڵايه‌تى و گشت بواره‌يل ترمان كه‌مه‌و ئه‌كا.

له‌يرا ئه‌پرسيم: به‌ديل فه‌يليه‌يل چه‌س ئه‌را ره‌سانن خواست و مه‌ينه‌تيه‌يليان له‌ساى پشتگووشخستن ئاشكراو بيده‌نگى وه‌رده‌وام؟ له‌ گووشه‌يگ تريشه‌و له‌ ئاينده‌ ئه‌گه‌ر مێژوو و رووشنهويرى و ناسنامه‌ نه‌ياشتوويد چوين ئه‌تويه‌نێد مێژوود بخوه‌نێده‌و؟ ئمجا له‌ى دونياى پڕ ده‌ورانه‌ ئاده‌ميزاد هس وه‌ ئه‌وه‌ ئه‌كا ك چاره‌نويس له‌ناونى مه‌ردم كومه‌ڵگا رووژ له‌ دوياى رووژ نزيكه‌و ئه‌دێ و گشت كه‌سيگيش هس وه‌ ئه‌وه‌ ئه‌كا له‌ ئه‌وسا فيشتر هه‌وجه‌ وه‌ ئه‌واكه‌ى تر ديرێد.

دويرى ناونى فه‌يليه‌يل ماناى چه‌س؟ ئيمة قسه‌ وه‌ل نه‌وه‌يليگ ئه‌كه‌يم نه‌ خوه‌ندنگا نه‌يش يانه‌يگ ديرێد و جوور ئه‌وه‌گ ريكخرياگه‌يل جه‌هانى ئويشن بى نيشتمان مه‌نديمنه‌، ئايا بايه‌سه‌ چه‌ پيشكه‌ش بكه‌يم؟ ئيسه‌يش راسييگ تيه‌ڵ خوه‌ى ده‌رئه‌خا ك ئيمه‌ تواناى ئه‌وه‌ نه‌يريم مقه‌يه‌تى له‌وه‌ بكه‌يم ك مه‌نده‌سه‌و، جوور ئه‌وه‌كيش ئويشن ئاينده‌ هبه‌تيگ نيه‌ ئه‌را گشت، به‌ڵكوو ئه‌را ئه‌وانه‌سه‌ ك وه‌رگرى ئه‌كه‌ن و جيهاد ئه‌كه‌ن له‌ كاره‌يليان، ئمجا بيلا بپرسيم ئيسه‌ هانه‌ كوو جيهادكاره‌يل فه‌يلى؟ بيگومان گشت كه‌سيگ و تا ئه‌وه‌گ من بزانم ئاگادار بوين له‌و مه‌ينه‌تيه‌يلمانه‌ وه‌ دريژايى ماوه‌ى گوزه‌يشت، ك دوياخريش هه‌وه‌جه‌ وه‌ ئه‌وه‌ نيه‌ كه‌س ده‌سپيچگ باريدو منامان بكا.

عه‌لى حسێن فه‌يلى