بڕیگ لە نویسەرەیلمان لەجیاى قەڵەم چەقوو ها دەسیانەو!!

شفق نيوز

  لە دونیاى نویسانن و بوار ئەدەب رووشنهویرى و ماریفەت، بنەمایگ هەس ک وەپى ئویشن ریز و حورمەت و پابەندى وە یاسایەیل پیشەگەرى، ک جى داخە ئمڕوو لەى سەردەمە قەڵەم وەدەسەیل فریەیگ هەن تەنیا هەر ئەوە زانن لاپەڕەى چەرمگ وە وشەیل ناپوخت و نابەڵگەو ناوەجى و دویر لە بنەماى ئەخلاق رووشنهویریەت پڕەو بکەن.

ئمڕوو ئیمە لە رووژگاریگ ژیەیم ک نەخش نویسەر لەتى بایەسە هووکار چارەسەر گرفتەیل و ڕینیشاندەر و سەرچەوەى ئارامى و ئاسایش بوود، نەک گرژەوکردن و تویڕەکردن و ئەقڵیەت ئادەمیزادو دروسکردن ئاشووگەرى و کاڵین خوسەو کینەت و شیوانن شیرازەى کومەڵگاى ئنسانى و پشتکردن لەراسیەیل و خوەیبەختکردن ئەرا لایەنگیرى ناهەقەیل و لەکەدارکردن بار ژیان و هووکار پەیابوین کیشمەیکش و ناکووکى ناونى لایەنەیل بوود.

نویسەر راسکانى بایەسە حورمەت قەڵەم و پیشەگەى خوەى بگرید، چوینکە نویسانن و بڵاوکردنەوەى باوەت بیجگە ئەوەک خزمەت و پەرەداینیگە وە رادەى رووشنهیورى و ماریفەت خود ئەو نویسەرە، لە هەمان وەخت وەرپرسیارێتى گەورایگیشە لەوەردەم خوداو بەنەیش، ک هەر وەو خاتریشە بایەسە نویسەر هویر لە ناوەڕوک ئەو باوەتیە بکا وەرجە ئەوەک بڵاو بوود و تەڕ و وشک وەیەکەو بسزنید.

نەزار قەبانى شاعر ناودار عەرەب ئویشید: نویسەر راسکانى ئەو نویسەرەسە ک لە تایبەت بەرزەو ئەکا وەرەو گشتى، و لە بەشیگەو ئەرا گشت بەشەیل، و لە توو گووشە ماسیەو ئەرا ناو دەریاى وەرفراوان.

یەى راسییگ هەس ک بایەسە گشت نویسەریگ لەلى بڕەسنەو، ک ئەویش ئەوەسە ئمڕوو نویسەر ک چەنیگ خوەى وە رووشنهویر بزانید، تەنیا خوەنەوار رووشنهویر ئەتویەنید مەزەنەى رادەى رووشنهویریەگەى بکا، هەر وەو خاتریشە نەبایەد وەختەیلى گشتى وە گیرخواردن لەناو یەک گوڵەم گیژ و خنکنەر بوەیدە سەر و باوەڕ وەگشت دروو دەلەسەیگ بکا وەبى بەڵگەو ئسپاتکردن.

ئمڕوو دوینیم لەناو نیسەرەیل کورد خوەمان بڕیگ لەلیان لەجیاى قەڵەم چەقوو ها دەسیانەو، لەجیاى ئەوەک بوونە سەرچەوەیگ ئەرا ئارامى و هووکاریگ ئەرا ئاوەدانى فیشتر و خاستر و بتەوکردن بەن برایى و تەبایى لە ناونى لایەنەیل و حزب و تەنانەت ناوچەیل جیاجیاى کوردستانیش، دوینید وە چەواشەو بوینەسە بشیون و ئاگردان گڕ قرمزیگ ئەرا سزانن بەرژەوەندیەیل گشتى لەوەر خاتر مەرام و بەرژەوەندیەیل وەرتەنگ حزبى و تاکەکەسى!!

نویسەر کورد ئەگەر وە راسى ریز و حورمەت لە قەڵەم خوەى بگرید نەبایەد ریخوەشکەر بوود ئەرا دروسبوین گرفت و ئاژاوە، بایەسە خەم ئى مللەت ستەمدیدەى کوردە داشتوود و هەوڵ خاسسازى بیەید لەڕى شیواز رەخنەیل بنیاتنەر و دەرخستن شیوازەیل چارەسەر و رەسانن راسیەیل وە مەردم کومەڵگا، نەک لەباربردن متمانەى تاکەیل وە یەکترى وە خاتر ئامانجیگ کاولکەر.

ئیمە ئەگەر تەماشاى ماڵپەرەیل کوردستانى و ماڵپەرەیل پەیوەندى کومەڵایەتى بکەیم و لەوانەیش" فەیسبوک " ک لەساڵ 2004 دامەزریا، باوەتەیل ناشرین و پڕ لە شەرمەزارى فریەیگ لەتى دوینیم ک لەڕاسى مایەى شەرمەزاریە ئەرا ئەو نویسەرەیلە ک خەنەى وەر دید خوەنەوارەیل، چوینکە ئى نویسەرەیلە تەنیا کاریان ئەوەسە قسەى لەق و ناشرین وە ئەى و ئەو بکەن و حاشا لە ئەو دەسکەفت و خزمەتگوزرایەیل خاسە بکەن و هەوڵ ئەوەیش دەن کیشەى بویچگیگ بکەنە کارەسات گەورایگ و چەواشەى مەردم وەپى بکەن. بەڵى هیمان بڕیگ لە نویسەرەیل کورد هەن ک لەڕاسى حەیفە تاریفیان وە نویسەر بکریەید، چوینکە خوازیار ئەوەنە سەرلەنوو مللەت کورد بووەنەو ئەرا بان ساج عەلى و گشت ئەو ئەزموونەیل شرین کوردستانیە وە تاڵان بیەیدو بوینەسە داینەمۆ و جموجویلدەر مەردم کوومەڵگا وەرەو هەڵوژانن ریەیل چەفت و نادروس و گشت باوەت و نویساننەیلیان بوو خوین و ئاژاوە لەلى تیەید، ئنجا ئەڵڵاجەوییش ها لەورا بڕیگ لەلیان ئى رەفتار و هەڵسووکەفتە وەو ئازادیە داسە قەڵەم ک لە خوەى فیشتر کەسیگ تر ماناگەى نازانید.

جەماڵ ئەرکەوازى