گیرستن دایگ له‌وه‌خت ئاهه‌نگ شویكردن دویه‌ته‌گه‌ى

شفق نيوز

دویه‌ته‌گه‌ى جیواز كریه‌یگ گیریگ؟ یه‌كیگ له‌و هووكاره‌یله‌ فاكته‌ر كلتووریه‌، وه‌گووره‌ى كلتوور كورده‌وارى و په‌روه‌رده‌كردن دویه‌ت له‌بان مقه‌یه‌تیكردن له‌لى تا ئه‌و ڕووژه‌ ك بووگه‌ ژن ئه‌رك سه‌ختیگه‌و نیشانه‌ى پاكى و بیگه‌ردى ئه‌و دویه‌ته‌سه‌، وه‌لى وه‌ل ئه‌وه‌یشا له‌وه‌خت شویكردنیشى مایه‌ى ترس و دڵه‌ڕاوه‌كى دایگیه‌، چوینكه‌ توایگ دڵنیا بووگ له‌ په‌روه‌رده‌كردن دویه‌ته‌گه‌ى و پابه‌ندبوین وه‌ داب و نه‌ریت كومه‌ڵگاوه‌ له‌بان ئاست په‌رده‌ى دویه‌تایه‌تى، ك ئه‌ویش چووگه‌وه‌ ئه‌را خاس په‌روه‌رده‌كردن دایگ.

هووكاریگ تر ئه‌و گیرستنه‌ ئه‌وه‌سه‌، ك دایگ و باوگ هویچ وه‌ختى هس ناكه‌ن ك مناڵه‌یلیان گه‌ورا بوون یا گه‌ورا بوینه‌، به‌ڵكوو وه‌رده‌وام هه‌ر وه‌ چه‌و مناڵیه‌وه‌ ته‌ماشاى مناڵه‌یلیان كه‌ن، وه‌لى له‌یرا دایگ هس وه‌ ئه‌وه‌ ئه‌كا ك دى دویه‌ته‌گه‌ى جویر جاران وه‌رده‌وام نیه‌وینیگه‌ى، به‌ڵكوو گه‌ورا بویه‌و خاوه‌ن كه‌سایه‌تى خوه‌یه‌، ك هه‌رچه‌نى زویتر په‌روه‌رده‌كردن دویه‌ته‌گه‌ى و دابینكردن گشت هه‌وه‌جه‌یل دویه‌ته‌گه‌ى خوه‌ى ئه‌نجامیان دیاگ، وه‌لى له‌یرا خس وه‌ ئه‌وه‌ ئه‌كا ك دویه‌ته‌گه‌ى گه‌ورا بویه‌و خوه‌ى بووگه‌ بڕیارده‌ر ژیان خوه‌ى و كه‌سیگ تر خوه‌شه‌ویسى به‌خشیگه‌ دویه‌ته‌گه‌ى ك ئه‌ویش هاوسه‌ره‌گه‌یه‌. بیگومان یه‌یش هسیگ دولایه‌نى ئه‌را دایگ وه‌وى یا بووك دروس ئه‌كا، ك له‌لایگه‌وه‌ وه‌پى خوه‌شه‌و له‌لایگ تریشه‌وه‌ بیتاقه‌ت بووگك كه‌سیگ تر هه‌س به‌شدار بویه‌ له‌وه‌پیداین ئه‌و سووزه‌ ئه‌را دویه‌ته‌گه‌ى. هووكار سێیم ، ك شایه‌ت ئى هووكاره‌ له‌ كومه‌ڵگایگه‌وه‌ ئه‌را كومه‌ڵگایگ تر جیاواز بووگ، ئه‌را نموونه‌: ئه‌گه‌ر هات و خود دایگه‌گه‌ له‌ پرووسه‌ى هاوسه‌رگیرى تویش كیشه‌ هاتویگ  و هاوسه‌ره‌گه‌ى كه‌سیگ خراو بویگ و مامڵه‌ى وه‌لیا خاس نه‌ویگ و شایه‌ت هه‌ر له‌ سه‌ره‌تاى هاوسه‌رگیریه‌وه‌ روى وه‌ڕوى تون و تیژى لاشه‌یى و ده‌روینى بویگه‌وه‌ له‌لایه‌ن هاوسه‌ره‌گه‌یه‌وه‌، ئه‌وه‌ شایه‌ت دایگ له‌یرا چه‌نیگ ئه‌را خوه‌ى گیریگ، ئه‌وه‌نه‌یش ئه‌را دویه‌ته‌گه‌ى بگیریگ، ماناى ئه‌وه‌سه‌ ترس له‌ روى وه‌ڕوى بوینه‌وى دویه‌ته‌گه‌ى وه‌ل تون وتیژى هاوسه‌ره‌گه‌یا دیریگ له‌ ئاینده‌.

هووكاریگ تر ئه‌وه‌سه‌ ك وه‌رده‌وام ئویشن دویه‌ت دڵسووزه‌ ئه‌را دایگ وباوگ، ئنجا وه‌ختى دویه‌ت پرووسه‌ى هاوسه‌رگیرى پیك تیه‌ریگ، له‌یرا دایگ ئه‌و سووزه‌ ك چه‌وه‌ڕیى كردیاگله‌وه‌خت عومر پیرى دى له‌لایه‌ن دویه‌ته‌گه‌یه‌وه‌ له‌یوا هس ئه‌كا له‌ده‌سى ده‌یگ و دى دویه‌ته‌گه‌ى نه‌تویه‌نیگ ئاگادار ئه‌و بووگ.