منوچه‌رخان ...شاعریگ فه‌یلى

شفق نيوز

ناودار فره‌یگ دیرن له‌وانه‌ك خزمه‌ت وه‌ هونه‌ر و ئه‌ده‌ب نه‌ته‌وه‌یان كردنه‌و هه‌میشه‌ نك قه‌ڵه‌میان چشته‌یل جوانیگ  نویساگه‌و بیجگه‌ ئه‌وه‌یش له‌ لاپه‌ڕه‌یل تاریخ ناویان توومار كریاگه‌ وه‌تایبه‌ت له‌مه‌یدان شعر ك له‌تاریخ ئه‌ده‌ب كوردى شوون خوه‌یان دیارى كردنه‌، ئمجا یه‌كیگ  له‌و هونه‌ردووس و شاعره‌یله‌ ك وه‌ زووان شعره‌وه‌ خزمه‌تى ئه‌را ملله‌ت و نه‌ته‌وه‌گه‌ى له‌تاریخ مه‌نده‌سه‌وه‌، ئه‌ویش شاعر ناودار(منوچه‌رخان كوه‌یلیوه‌ند)ه‌، ئى شاعره‌ سه‌ر وه‌ هووز كوه‌یله‌وه‌نه‌ ك یه‌كیگه‌ له‌هووزه‌یل له‌ك فه‌یلى و نیشته‌جى كوردستان خوه‌رهه‌ڵات، مه‌نوچه‌ر یه‌كیگه‌ له‌و كه‌سایه‌تیه‌یل ناوداره‌ له‌وه‌خت قاجار و ناوى له‌ كتاو لاڵه‌ى نه‌مره‌یل(موناجات ئه‌لخالدین) له‌ ئه‌ده‌ب كوردى لاپه‌ڕه‌ى 103 هاتگه‌ ك محه‌مه‌د عه‌لى سوڵتانیه‌ دایناگه‌، وه‌ل ئه‌وه‌یشا قسه‌و باس فره‌یگ  له‌بانى نویسریاگه‌ له‌ناوچه‌ى لوڕستان.

میرزا شوكره‌ڵڵا دیناره‌وه‌ند فه‌یلى پشتكویه‌یى ك یه‌كیگه‌ له‌كه‌سایه‌تیه‌یل ناودار پشتكویه‌ له‌ ناوچه‌ى لوڕستان و له‌ساڵ 1259 كووچى له‌دونیا ده‌رچیه‌ له‌باوه‌ت ئى كه‌سایه‌تى و شاعره‌ ناوداره‌وه‌ ئویشیگ : مه‌نوچه‌ر خان یه‌كیگ بویه‌ له‌ شاعره‌یل پڕ له‌ تواناو هویر واز، ك شعره‌یل فره‌ جوانیگ دیریگ  و له‌وانه‌یش شعریگ  له‌ژیر ناونیشان(پیرى) ك په‌خشكریاگه‌ له‌و كتاوه‌یله‌ له‌بان ناوداره‌یل كورد نویسریانه‌و بیجگه‌ ئه‌وه‌یش له‌كتاو باوه‌ مه‌ردووخ روحانى ئشاره‌ت وه‌پى كریاگه‌.

منوچه‌رخان شاعر وه‌ك شاعره‌یل تر هاوزووان خوه‌ى له‌ كورده‌یل فه‌یلى له‌ نموونه‌ى (مه‌خزه‌ن كرماشانى و موشه‌فه‌ق كرماشانى و سه‌ى یاقوو مایه‌شتى و عه‌باس خان كوڕ ئه‌غاخان و... هتد) ده‌س باڵایگ  داشتگه‌ له‌داناین شعر وه‌شیواز ئه‌ده‌بیه‌وه‌، هه‌ر ئه‌وه‌یش دیاره‌ له‌یوا كردگه‌ مه‌ردم سه‌رسام بوون وه‌شعره‌یلى و قه‌درو حورمه‌ت له‌و شعره‌یلیه‌ بنریه‌یگ  و شوونى له‌تاریخ ئه‌ده‌ب كوردى بووگه‌وه‌.

به‌ڵى، بیجگه‌ مه‌نوچه‌رخان كوه‌یلیوه‌ند شاعره‌یل تر له‌ كورده‌یل فه‌یلى له‌سه‌رده‌م دویاى ئه‌و ناویان دیاره‌و له‌ى سه‌رده‌م تازه‌یشه‌ مه‌یدان هونه‌ر و ئه‌ده‌ب وه‌تایبه‌ت مه‌یدان شعر له‌لایه‌ن كورده‌یل فه‌یلیه‌وه‌ فه‌رامووش نه‌كریاگه‌و كه‌سایه‌تیه‌یل فره‌یگ  دیرن ك وه‌رده‌وام خزمه‌ت وه‌ ئه‌ده‌بیات كوردى و هونه‌ر شعر بكه‌ن.

 

عه‌لى چه‌وجوان