سزا له‌ فه‌رهه‌نگ عراقی نيه‌!

شفق نيوز

 

ئيسه‌ عراق شماره‌ی فريه‌يگ له‌ سه‌ركرده‌يل جوراوجوور ديريدو هه‌وڵ ئه‌وه‌يش دريه‌يد سه‌ركرده‌ی فيشتريش دروس بدێ وه‌شيوه‌يگ ك بگونجيه‌يد وه‌ل نه‌زه‌ريه‌ی خواست په‌يوه‌سبوين وه‌ كه‌سه‌يليگ وه‌خاتر قورتاربوين له‌ بار ئيسه‌.

چشت تازه‌يگ نيه‌و مه‌سه‌له‌ی هه‌ڵوژاردنه‌يليگ په‌رده‌پووش كريا ك وزه‌ و وه‌خت و خه‌رج فريه‌يگيش كيشاو جيايی تازه‌يگ دروسكرد له‌ناونی پيكهاته‌يل ملله‌ت و سه‌رله‌نوو به‌يعه‌تيش ئه‌را رينمايه‌يل تايفه‌گه‌ری و ره‌گه‌زی تازه‌وه‌ كرد، وه‌لی ئاكامه‌گه‌يشی ئه‌و ئاماژه‌و هه‌واڵه‌يله‌سه‌ ك وه‌ ئوميده‌و چه‌وه‌ڕی كريا ئه‌را دراوردن عراق له‌ چاڵ قويل و خاسسازيكردن كاولكاريه‌يل و هه‌ر وه‌ی خاتريشه‌ وه‌ختيگ له‌ده‌س دريا ئه‌را ده‌نگداين له‌وه‌ر ئه‌و ئاڵشتكاری راسكانيه‌ ك خوسه‌و كينه‌ت نه‌يليد و دووسی و خوه‌شه‌ويسی له‌شوونی بكاڵيد.

ئه‌ڵڵاجه‌وی ئه‌وه‌سه‌ گشت لايه‌نه‌يل ئاهه‌نگ سه‌ركه‌فتن ساز ئه‌كه‌ن، ك يه‌يش ماف ره‌وايگه‌و گشت لايه‌نه‌يليش ماف ئه‌وه‌ ديرن لايه‌نه‌يل تر وه‌ ساخته‌كار و ده‌سكاريكه‌ر ته‌مه‌تبار بكه‌ن وه‌ گووره‌ی به‌ڵگه‌و نيشان و ئسپاتكردن، ئمجا له‌يرا كپ و بيده‌نگ و سه‌رگه‌ردان ته‌نيا رووڵه‌يل ئی ملله‌ته‌سه‌ ك خوه‌شاڵن وه‌ ئه‌وه‌گ ده‌نگده‌رن، هه‌ر وه‌و خاتريشه‌ ئاكامه‌يل ئی هه‌ڵوژاردنه‌يله‌ نيشانه‌ی ئه‌وه‌سه‌ ك ده‌نگ ئی ملله‌ته‌ له‌ مه‌ينه‌تيه‌يليان كه‌مه‌و ناكاو چاره‌سه‌ر كيشه‌يل ناكاو كووتايی وه‌ وه‌رده‌وامی تون وتيژی و گه‌ناته‌كاری نايه‌ريد له‌گشت بواره‌يل ژيان و له‌ ئاسته‌يل جياجيا.

حزبه‌يل سه‌ركه‌فتگ وه‌ گووره‌ی ده‌نگ ره‌وا يا ساخته‌، ماف خوه‌يانه‌ ئاهه‌نگسازی بكه‌ن، چوينكه‌ له‌ چوارساڵ ئاينده‌ ئه‌تويه‌نن گشت چشتيگ ئه‌نجام بيه‌ن وه‌بی هويچ هساو و سزايگ و ئی هه‌ڵوژاردنيشه‌ ئسپات ئه‌وه‌ كرد ك چشتيگ نيه‌ وه‌ناو سزا.

وه‌ل ئه‌وه‌يشا بار عراقی جوور بار مه‌ردمان تر نيه‌، چوينكه‌ له‌ بڕيگ له‌ ده‌وڵه‌ته‌يل هه‌ر رويداگيگ يا هه‌ر قه‌يران و كاره‌ساتيگ يا هه‌ر ناڕه‌زايی و دريغيكردنيگ شكه‌ست وه‌ حكوومه‌ت ئه‌يه‌ريد، وه‌لی له‌ی عراقه‌ مردن هه‌زاران مه‌ردم بيتاوان ته‌خت بويچگترين وه‌رپرسيش ناله‌قنيد. هه‌ر له‌وه‌ر ئه‌وه‌يش ماف سه‌ركه‌فتگه‌يله‌ بويشنه‌ ملله‌ته‌گه‌مان"نگه‌ران مه‌ون ئيمه‌ گرينگی وه‌پيدان ئه‌يه‌يم"جوور ئه‌وه‌ك زويتر ئه‌نجاميدان!..

عه‌لی حسێن فه‌يلی

ج . أ