جه‌نگ كينه‌ت

شفق نيوز

ساڵه‌يل فريه‌يگه‌ جه‌نگ چه‌كدارى و خه‌بات سه‌خت دژ رژيم ديكتاۆريه‌ت كووتايى وه‌پى هات و كورد له‌ قوناغيگ تر ژيه‌ێد له‌ پيشكه‌فتن وه‌ره‌و دونياى مۆدێرن، وه‌لى جى داخه‌ ئمڕوو دوینیم له‌جیاى جه‌نگ چه‌ك جه‌نگ كينه‌ت ده‌سوه‌پيكردگه‌و يه‌يش له‌ به‌رژه‌وه‌ندى بڕيار چاره‌نويس ملله‌تمان نيه‌ وه‌ره‌و سه‌روه‌خوه‌يى و دامه‌زرانن ده‌وڵه‌ت كوردى، چوينكه‌ ئى جه‌نگ كينه‌ته‌ له‌ جه‌نگ چه‌كدارى سه‌ختتره‌و هويچ خه‌رجيگ له‌بان دوشمنه‌يلمان نه‌يرێد و ته‌نيا ئه‌وه‌ نه‌ود ك له‌ دويره‌و ته‌ماشا بكه‌ن و وه‌پيمان بخه‌نن و هه‌ناسه‌ى ئووخه‌ى هه‌ڵكيشن.

بیگومان مه‌سه‌له‌ى كينه‌ت و یه‌كترى رسواكردن حزب و لايه‌نه‌يل كوردستانى بيجگه‌ له‌ده‌سداين ئه‌زره‌ته‌ گه‌وراگه‌، له‌ هه‌مان وه‌خت به‌رپاكردن ئاگر جه‌نگ گه‌وراتر و كاره‌ساته‌ وه‌ل ئه‌و دوشمنه‌يله‌ ك ئيسه‌يش خوازيارن زه‌فه‌ر له‌ كورد بارن و خاكه‌گه‌ى داگير بكه‌ن.

ئاشكراو دياره‌ ك قه‌يران ئابوورى و جه‌نگ روى وه‌ڕوى بوينه‌وه‌ى داعش و مه‌ینه‌تیه‌یل كورد دى وه‌رگه‌ى فیشتر ناگریدو ئيسه‌يش مه‌رام زوورم هاووڵاتيه‌يل كورد له‌ساى چه‌وه‌ڕیكردن چاره‌نويسيگ ژيه‌ێد وڵات ئازاد و ده‌وڵه‌تيگ نه‌ته‌وه‌يى ئه‌ڕاى له‌تى بارێده‌ به‌رهه‌م، هه‌ر له‌وه‌ر بايه‌سه‌ حزبه‌يل كوردستانى يه‌ك ده‌نگ و يه‌ك ره‌نگ بوون و واز له‌ كينه‌ت و مه‌رام خراو بارن و هاوكار يه‌كترى بوون له‌وه‌ر سه‌رخستن كیشه‌ ره‌واگه‌يان و به‌رژه‌وه‌ندى باڵاى ملله‌ت نه‌خه‌نه‌ وه‌رمه‌ترسى و له‌ناوبردن و مێز گفتگوو و دانيشتن ڕى چاره‌سه‌ر گشت گرفته‌يل ناونيان بوود و له‌يه‌ فيشتر وه‌خت له‌ده‌س نه‌يه‌ن.

عه‌لى غه‌فور گه‌رميانى