سه‌ده‌ى له‌ده‌سداین جوانه‌یل

شفق نيوز

له‌ده‌سداین و له‌ناوبردن جوانیه‌یله‌. وه‌هه‌ر شیوه‌یگ بنوڕیمنه‌ پیه‌و، دوینیم دویاى چه‌نه‌ها هه‌وڵ فكرمه‌نه‌یل و فه‌یله‌سووفه‌یل زاناى مه‌یدان جوانكردن ژیان هیمان هه‌ر وه‌خته‌یل ئیسه‌مان نیگه‌رانى و سه‌ختى ده‌روینى و شیوازیگه‌ ئه‌را وه‌رنه‌گرتن تام وله‌زه‌ت له‌ جوانیه‌یل ژیان، یه‌یش په‌وه‌ندى وه‌ پرووسه‌یگ دویرو دریژ كاركردنه‌و دیرێد ئه‌را ناشرینكردن ژیان له‌لایه‌ن دین و سیاسه‌ت و ئایدۆلۆژیایه‌یل جیاوازه‌و، ئه‌ویش وه‌ ئه‌وه‌ك هویچ ئایدۆلۆژیاو مه‌زه‌ویگ شك نیه‌وه‌یم ك خوه‌ى تاقیه‌و نه‌كردوید وه‌هه‌وڵداین ئه‌را جوانكردن ژیان و دویاى ئه‌وه‌یش بیجگه‌ خوین و ماڵویرانى و دوزه‌خ هویچ تر له‌لى نه‌كه‌فته‌سه‌و. ئنجا سه‌ده‌ى گوزه‌یشت به‌ڵگه‌ى ته‌واویگه‌ ئه‌راتاقیكردنه‌وه‌ى گشت ئایدۆلۆژیاو مه‌زه‌وه‌یل له‌شوون و كوومه‌ڵگایه‌یل جیاواز.

 

راپه‌ڕینه‌یل جه‌هان عه‌ره‌بى و ناڕه‌زایه‌یل دونیاى ئیمه‌ وه‌گشتى، ده‌ره‌ئه‌نجام ئى ته‌قینه‌وه‌ى گه‌وراسه‌ ك سستم ئه‌را كوومه‌ڵگاى ئنسانى دروس كردگه‌. گشت خودنیشانداین و ناڕه‌زایه‌یل و كوچگ وه‌شانن و مانگرتنه‌یل په‌یوه‌ندى وه‌ى ناشرین بوینه‌وه‌ى كوومه‌ڵگاى ئنسانیه‌ دیرێد له‌لایه‌ن ئایدۆلۆژیاو مه‌زه‌وه‌یله‌و ك خوین فره‌یگ وه‌ل خوه‌یانا ڕشاننه‌.

به‌شیگ فره‌ى نیگه‌رانى و مه‌رگ و خودكوشى و كاره‌یل ترۆریستى، ده‌رئه‌نجام ئى جووره‌ بار سه‌ختیگه‌ ك سستم ده‌سڵات ئمڕوو جه‌هان له‌گشت كوومه‌ڵگایه‌یل ئنسانى جوراوجوور جووریگ له‌ به‌نایه‌تى تازه‌ له‌شوون خوه‌ى هیشته‌سه‌ جى.

ژیان ئنسانیه‌ت ها له‌وه‌رده‌م قه‌یران فره‌ قورسیگ ، كیشه‌یل فره‌یگیش هه‌ن ك له‌وه‌ر خه‌ریكبوینمان وه‌مه‌سه‌له‌ى ژیان و گوزران هویر له‌لیان ناكه‌یم. ئیسه‌ ئیمه‌ى ئاده‌میزاد، ناشۆین زه‌وى كردیمنه‌، گه‌رمبوین زه‌وى له‌ڕى كارخانه‌و سه‌یاره‌یله‌و ك ده‌سكرد هویر ئاده‌میزادن چه‌نیگ خوه‌شگوزرانى هاوردوید، ئه‌وه‌نه‌یش باریگ ئه‌را قورسبوین گه‌ردوون و پیسكردن سروشت و ناشرینكردن زه‌وى دروس كردگه‌.

ئیمه‌ له‌یرا هایمنه‌ وه‌رده‌م هویره‌و كردن، ك یه‌یش قه‌یران له‌شوون خوه‌ى هیلێده‌ جى ئه‌را گه‌ردوون.

ئیسه‌ گشت كوومه‌ڵگاى ئیمه‌ خوه‌ى له‌وه‌رده‌م مه‌ترسیه‌یل فره‌یگ دوینێده‌و. ئه‌وه‌ك چاره‌سه‌ر كیشه‌یل كوومه‌ڵگاى ئیمه‌ ئه‌كا نه‌ ئایدۆلۆژیاو نه‌یش مه‌زه‌وه‌یله‌، به‌ڵكوو گله‌وخواردنه‌ ئه‌را بنه‌مایه‌یل ئه‌خلاقى ئنسانیه‌ت، گله‌وخواردنه‌ ئه‌را ئنسانیه‌ت بوین ك ئه‌گه‌ر ئاده‌میزاد ئیمه‌ نه‌ڕه‌سنه‌ خوه‌یانا له‌ئنسانیه‌ت كه‌فن، ئنجا له‌وه‌ر ئه‌وه‌ك خه‌م هاوبه‌ش داشتویم، بایه‌س ڕى له‌ ناشرینكردن ژیانمان بگریم، ئه‌و ژیانه‌ ك توایم ئه‌را خاستركردن گوزرانمان خوه‌شترى بكه‌یم، وه‌لى بیجگه‌ خه‌م و دڵه‌ڕاوه‌كى و نه‌خوه‌شى هویچ تر له‌لى نیه‌دوینیم.

 

عه‌زیز ره‌ووف

ج