سوارخاسه‌گه‌ى شوون گومكرياگ

شفق نيوز

  گشتمان ئاگاداریم له‌وه‌ك حكوومه‌ته‌یل داگیركه‌ر بیجگه‌ ئه‌وه‌گ گشت وه‌ختیگ له‌ هه‌وڵ زه‌فتكردن و به‌شبه‌شه‌وكردن خاك كورد بوینه‌، وه‌لى وه‌ل ئه‌وه‌یشا متمانه‌ وه‌ كه‌سایه‌تى و ناودار و سوارخاسه‌یل كوردیش نه‌یاشتنه‌، ك وه‌رده‌وام له‌ هه‌وڵ فه‌وتانن و له‌ناوبردنیان بوینه‌ وه‌ شیوازه‌یل جواروجوور.

ئیمه‌ ئه‌گه‌ر روى بكه‌یمنه‌ تیره‌ى نێرژى سه‌ر وه‌ ئێڵ جاف له‌ناوچه‌ى زه‌هاو، ناو یه‌كه‌ یه‌كه‌ى ئه‌و سوارخاسه‌یله‌ تیه‌یده‌ هویرمان ك گشت وه‌ختیگ له‌ سه‌نگه‌ر مه‌ردایه‌تى و زرنگیه‌و جواو نه‌یاره‌یل و داگیركاره‌یل دانه‌سه‌و جوور: سه‌فه‌ر وه‌یس سوڵتان، یاروه‌یس سوڵتان، ئه‌كبه‌ر خان، ره‌زاخان نێرژى و...هتد.

بیگومان نێرژیه‌یل وه‌ شیوه‌زووانیگ جافانه‌ى ره‌سه‌ن قسه‌ كه‌ن و زوورمیانيش له‌ ناوچه‌ى زه‌هاو و به‌شیگیش له‌لیان له‌ناوچه‌یل شائاباد و روانسه‌ر و ده‌ورگردی ژیه‌ن. له‌ناو ئى تیره‌ جوور ئه‌وه‌ك ئاماژه‌ وه‌پى كردیم روڵه‌یل سوارخاسیگ هه‌ڵكه‌فتگه‌و  یه‌كیگ له‌وانه‌يش" ره‌زاخان" نێرژیه‌ ك خاوه‌ن كه‌سایه‌تییگ ئێڵیاتى و كوومه‌ڵایه‌تى بویه‌.

ره‌زاخان نێرژى سه‌ره‌تا جوور سه‌رۆك تیره‌ى نێرژى ده‌ركه‌فتگه‌و كه‌سایه‌تییگ دیار و خاوه‌ن تواناو دیواخاندار بویه‌، له‌هه‌مان وه‌خت خاوه‌ن زه‌وى و زار فراوانیگیش بویه‌ له‌ ناوچه‌ی هه‌ڵوڵ و نێرژ.

ئى كه‌سایه‌تى ناودار كورده‌ له‌دویاى نه‌مه‌ندن قاجاریه‌یل و هاتن بنه‌ماڵه‌ى په‌هله‌ویه‌یل ئه‌را بان ته‌خت فه‌رمانڕه‌وایى و گرتنه‌ده‌س جڵه‌و ده‌سڵات، سوارخاسیگ فریه‌ زرنگ و هه‌ڵكه‌فتگ بویه‌ له‌ناوچه‌گه‌ی ژير ده‌سڵات خوه‌ی.

ئنجا سه‌رده‌مانیگ ك كه‌ڵهوڕه‌یل نه‌خش فراوانیگ داشتنه‌، چه‌ويان كه‌فته‌سه‌ ئازایه‌تى و چه‌ونه‌ترسى ره‌زاخان كوڕ سه‌فه‌رخان نێرژى و  كردنه‌سه‌ی سڵادار ئه‌و ناوچه‌ى زه‌هاوه‌ وه‌گشتى و دویاخریش ره‌زاخان ناوچه‌یل قه‌سر و سه‌رپیه‌ڵیش وه‌ ته‌واوى خسته‌سه‌ ژیر كۆنترۆڵ خوه‌ى و هه‌میشه‌ یاخى بویه‌ له‌ فه‌رمان ده‌سڵاتداره‌یل ئیران.

ره‌زاخان نێرژى جوور ئه‌وه‌ك مه‌ردم تیره‌گه‌ى باسى كه‌ن و ئویشن: پیاویگ داناو فامیده‌و ماریفه‌تداریش بویه‌و خوه‌شه‌ویس بویه‌ له‌لاى تیره‌و كه‌س و كاره‌ى، ئنجا گشت وه‌ختیگ حوكم ره‌زاخان نگه‌ران ده‌سڵاتداره‌یل ئیرانى كردگه‌و هه‌ر له‌ هه‌وڵ ئه‌وه‌ بوینه‌ رووژیگ له‌ رووژان زه‌فه‌ر له‌لى بارن، تا ئه‌وه‌ بوى دویاجار له‌ جه‌نگیگ وه‌ل هیزه‌یل ئیران ره‌زاخان یه‌خسیر كریاو خریا زیندان له‌ ته‌هران و ئه‌را ماوه‌ى 11 ساڵ له‌ زیندان مه‌ندو دویاخر ئازاد كریا.

وه‌لى له‌ دویا سه‌ردانى ئه‌را ته‌هران، ره‌زاخان له‌ناكاو دوباره‌ ده‌سگیر كریاو شوونگوم كریاو تائیسه‌یش چاره‌نویس سوارخاسه‌گه‌ى نێرژى ئه‌را هویچ كه‌سیگ ئاشكرا نه‌وى و كه‌س نه‌زانست رژیم په‌هله‌وى وه‌ چ ده‌ردریگ فه‌وتانه‌ى و له‌ناوى برد.

جه‌ماڵ ئه‌ركه‌وازى