هاوار بيده‌نگيمان بژنه‌فن..!

شفق نيوز

وه‌بوونه‌ی سێيه‌مين ساڵڕووژ كاره‌سات كوچ وه‌پيكردن زياترله‌ ٥٠٠ هه‌زار هاوزوان كورد فه‌يلی ، وه‌ ئاماده‌ بوين ژماره‌يگ له‌ ڕووشنهويره‌يل و كه‌سايه‌تيه‌يل كورد فه‌يلی و نوێنه‌ر ده‌زگايل ڕه‌سانن شه‌وه‌كی ئمڕوو شه‌ممه‌ ١٠/٤/٢٠١٠ ڕێكخرياگ ماڵ كورد وه‌هاوكاری ده‌زگای ڕه‌سانن و ڕووشنهويری كورده‌يل فه‌يلی–شه‌فه‌ق سمينار‌يگ له‌ ژير ناوونيشان ( گشت دڵه‌يل‌ هاوه‌لمان وه‌لی سته‌م وه‌كورد فه‌يلی هه‌وه‌ردوامه‌) به‌رپا كرد. سه‌ره‌تای سميناره‌گه‌ وه‌ ده‌قيقه‌يگ وسيان ئه‌را گيان پاك شه‌هيده‌يل وه‌تايبه‌ت شه‌هيده‌يل كورده‌يل فه‌يلی ده‌س وه‌پی كرد.دوياتر ساميه‌ عه‌زيز ئه‌ندام وه‌رين په‌رله‌مان عيراقى باوه‌تيگ ده‌رباره‌ی كيشه‌وگرفته‌يل كورده‌يل فه‌يلی پيشكه‌ش كردو وت: عه‌قڵيه‌ت شۆفێنی تا ئيسه‌يش بويه‌سه‌ وه‌ربه‌سيگ له‌ڕی سه‌ندنه‌وه‌ی مافه‌يل كورد فه‌يلی. عه‌زيز زياتر وت: له‌ وه‌زاره‌ت ناوخۆی حكوومه‌ت به‌غدا گه‌ناته‌كاری دارايی وئيداری و عه‌قڵيه‌ته‌يل شۆفێنی فه‌ره‌يگ هه‌ن ك نيه‌يلن ياسايه‌يل تازه‌ جيوه‌جی بكريه‌ن له‌وانه‌يش ياسای دانه‌وه‌ی ڕه‌گه‌زنامه‌ی عيراقى وه‌كورده‌يل فه‌يلی. ساميه‌ عه‌زيز له‌به‌شيگتر قسه‌يله‌گه‌ی وت: تائيسه‌ هويچ كورد فه‌يلييگ قه‌ره‌بوو نه‌كرياگه‌ و لايه‌نه‌يل كاروه‌ده‌س ، وه‌رپرسيار دوياكه‌فتن قه‌ره‌بووكردن زه‌رده‌يل كورد فه‌يلين. عزيز له‌ كوتايی قسه‌يله‌گه‌ی ئاماژه‌ كرده‌ ئه‌را كاره‌يل و ڕاسپارده‌يل كۆمسيون باڵای سه‌روه‌خوه‌ی هه‌ڵوژاردنه‌گان تايبه‌ت وه‌ هاووڵاتيه‌يل نيشته‌جای وڵاته‌يل بيگانه‌ و وت : ئه‌وكار و فه‌رمانه‌يل كۆمسيون باڵا بوينه‌سه‌ ڕيگر له‌ به‌شداری كردن كورده‌يل فه‌يلی له‌ هه‌ڵوژاردنه‌يل په‌رله‌مانی مانگ ئادار.

له‌شوون ئه‌وه‌ ماموستا سه‌تار نه‌وروز جيگر وه‌ڕه‌يه‌ووه‌ر گشتی كاروبار مروڤايه‌تی له‌ وه‌زاره‌ت كوچ و كوچ وه‌پيكرياگه‌يل حكوومه‌ت به‌غدا له‌ وتار يا كه‌ليمه‌يگ ئاماژه‌ وه‌يه‌ كرد ك سه‌رجه‌م ده‌زگايل ڕه‌سانن و لايه‌نه‌يل سياسی عيراقى بيجگه‌ ده‌زگای ڕه‌سانن و ڕووشنهويری (شه‌فه‌ق) ، كاره‌سات جينۆسايد كورده‌يل فه‌يلی خستنه‌سه‌ پشت گوش و وت : ئاماده‌ بوين ئمڕوومان له‌ باره‌گای ده‌زگای شه‌فه‌ق و به‌رپا كردن ياد كاره‌سات كورده‌يل فه‌يلی له‌ی باره‌گا نيشانه‌ی ئه‌وه‌سه‌ ك ئی ده‌زگا تاچه‌نی گرنگی ده‌ێده‌‌ كاره‌سات ئی به‌شه‌ له‌ملله‌ت كورد و خستنه‌ ڕوی كيشه‌و گرفته‌يليان ئه‌را ڕای گشتی ناوخوه‌يی و جه‌هانی. ناوبرياگ زياتر وت: له‌شوون ڕميان ڕژيم به‌عس ته‌پ وتووز له‌بان فه‌ره‌ له‌ دوسيه‌يل و ڕاسيه‌يل تايبه‌ت وه‌كورده‌يل فه‌يلی لاوريا ، وه‌لی تائيسه‌ چاره‌نويس زياتر له‌ ١٥ هه‌زار جوان كورد فه‌يلی ئاشكرا نه‌كرياس ؛ نه‌وروز وه‌يه‌يش ئشاره‌ كرد ك يه‌هووديه‌يليش جوور كورده‌يل فه‌يلی دوچار سياسه‌ت كوچ وه‌پيكردن وه‌زوور هاتنه‌ ، وه‌لی ئه‌وان جوور هاوزوانه‌يل ئيمه‌ ، له‌وه‌خت ده‌ركردنيان له‌ وڵات تويش ئه‌و كيشه‌وگرفته‌يله‌ ناتن ك كورد فه‌يلی تويشيان هات. ماموستا سه‌تار نه‌وروز له‌ به‌شيگتر قسه‌يله‌گه‌ی وت: كه‌س نيه‌تويه‌نی حاشا له‌ نه‌خش كورده‌يل فه‌يلی له‌ خه‌بات سياسی حزب و لايه‌نه‌يل كوردستانی و عيراقى بكا و ڕاسيه‌يل ئه‌وه‌ نيشان ده‌ن ك كورده‌يل نه‌گ ته‌نيا وه‌هوكاره‌يل نه‌ته‌وه‌يی و ‌مه‌زه‌بی له‌ وڵاتيان ئاواره‌ كريانه‌ ، به‌ڵكم به‌شيگ له‌ كينه‌ی به‌عس له‌ كورده‌يل فه‌يلی وه‌خاتر نه‌خش چالاكيان له‌ حزب و لايه‌نه‌يل نيشتمان په‌روه‌ر عيراقى بويه.

له‌باوه‌ت كار و چالاكی وه‌زاره‌ت كوچ و كوچ وه‌پيكرياگه‌يليش وتگه‌ : وه‌زارته‌گه‌ له‌شوون ڕميان ڕژيم به‌عس و تائيسه‌يش مه‌سه‌له‌ی چاره‌سه‌ركردن كيشه‌وگرفته‌يل كوچ وه‌پی كرياگه‌يل ناسه‌ نوای به‌رنامه‌يل كاری خوه‌ی و وه‌ل ئه‌و توانايی دارايی كه‌مه‌ ك ئه‌ڕای دياری كرياگه‌ په‌يجوری كيشه‌و گرفته‌يل كورده‌يل فه‌يلی كردگه‌و وه‌گوره‌ی توانا به‌شيگيان چاره‌سه‌ر كردگه‌ ، له‌وانه‌يش ته‌قالا كردن ئه‌را لاوردن و نه‌هيشتن بڕيار شماره‌ ٦٦٦ رژيم به‌عس.

نويسه‌ر و ياسا ناس كورد فه‌يلی (رياض فيلی )يش له‌ وتاريگ له‌ كاروه‌ده‌سه‌يل حكوومه‌ت به‌غدا تواست وه‌گوره‌ی ده‌ستوور دايم عيراقى سياسه‌ت ئاشكراو شه‌فافيگ ئه‌را چه‌سپانن و زامن كردن ماف كورده‌يل فه‌يلی بگريگه‌ وه‌ر و گرنگی به‌يگه‌ ميرات ژياری و ميژوويی كورده‌يل فه‌يلی و ئه‌ده‌ب و هونه‌ر و فۆلكلور ڕووشنهويری ئی به‌شه‌ له‌ملله‌ت كورد زينگه‌و بكا. ناوبرياگ له‌بان زينگه‌وكردن ياد ناوداره‌يل كورده‌يل فه‌يلی و خه‌ڵات كردن داهێنه‌ره‌يل ئی به‌شه‌ له‌ ملله‌تگه‌مان له‌ بوونه‌يل گشتی جه‌خت كرد و خوازيار ئه‌وه‌ بوی ك سه‌راپای سيستم ئيداری و وه‌ڕيه‌وبردن و خزمه‌تگوزاری ده‌زگايل ده‌وڵه‌تی وه‌شيوه‌یگ ئاڵشت بكريه‌ن ك وه‌ل ئسول حقوق ئنسان و مانای عيراق تازه‌ بگونجيه‌ی ئه‌را ئه‌وه‌گ شوينه‌وار عه‌قڵيه‌ت شۆفێنی بسڕيه‌يگه‌و و كورده‌يل فه‌يليش جوور هه‌ر هاووڵاتی عيراقييگ له‌ ماف ئنسانی بی به‌ش نه‌كريه‌ن. ناوبرياگ له‌كوتايی قسه‌يله‌گه‌ی له‌حكوومه‌ت عيراقى تواست مافه‌يل ئی به‌شه‌ له ‌ملله‌ت عراق زامن بكا، له‌وانه‌يش دانه‌وه‌ی ڕه‌گه‌زنامه‌ی عيراقى  و موڵك وماڵه‌يليان ك نزيكه‌ی سی ساڵه‌ له‌ليان زه‌فت شايان باسه‌ سميناره‌گه‌ وه‌به‌شداری و پرسيار چه‌ن ئاماده‌ بوييگ كوتايی وه‌پی هات.