عراق و راپه‌ڕین وڵاته‌یل عه‌ره‌بى

شفق نيوز

بووڕن و داواى ئازادى و خاسسازى و گویڕیان بكه‌ن له‌ رژیمه‌یلیان، وه‌ل ئه‌وه‌یشا عراقیه‌یل له‌یوا نوڕنه‌ ئه‌زموون خوه‌یان ك چشت خاسیگه‌و قوربانى له‌وه‌ر خاترى دانه‌و به‌دبه‌ختى فره‌یگ دینه‌سه‌ چه‌و تا ڕه‌سینه‌سه‌ ئى ئازادیه‌، له‌هه‌مان وه‌خت روى وه‌ڕوى تیرۆر وسیان ك ئامانجیان كوشتن مناڵه‌یل و ته‌قینه‌وه‌ى خوه‌ندگاو بازاڕه‌یل مللى و زوڵمكردن له‌ مه‌ردم بیتاوان بوى، وه‌لى هیمان ئه‌زموون عراقى تا ئیسه‌یش مایه‌ى گومانه‌ له‌لاى بڕیگ له‌ عه‌ره‌به‌یل ك گوایا ئه‌وه‌ك له‌ عراق ڕویدا ته‌نیا گویڕیانیگه‌ له‌ ده‌یشته‌وه‌ ك ئه‌ویش وه‌بوونه‌ى سوپاى بیگانه‌یله‌وه‌و ملله‌ت عراق هویچ نه‌خش یا ده‌وریگ له‌لى نه‌یاشت! بیگومان یه‌یش ناوژدانى و خراوییگه‌ ده‌رهه‌ق وه‌ عراقیه‌یل كریه‌یگ ك تویش گه‌وراترین سته‌مكارى بوینه‌وه‌، وه‌لى ژانه‌گه‌ ها له‌ورا ئه‌و قسه‌و باسه‌یل هه‌رێمیه‌ له‌باوه‌ت نه‌خش ملله‌ت عراقه‌وه‌ له‌ وه‌رجه‌ رمیان رژیم و دویاى رمیان تائیسه‌ نامه‌نته‌قیه‌و هویچ راسییگ وه‌پیه‌وه‌ دیار نیه‌و هه‌ر له‌بان ئه‌و بنه‌مایشه‌ بڕیگ  له‌ سه‌ركرده‌یل و حزبه‌یل عه‌ره‌بى تاوانبار ملله‌ت عراق كردن ك گوایا وه‌رپرسن له‌بان داگیركارى خاك و رژیم سه‌دام دكتاتۆریش وه‌بیتاوان دانان، وه‌لى ئه‌وه‌ك بڕیگ  له‌ عه‌ره‌به‌یل نیه‌زاننه‌ى ئه‌وه‌سه‌ ك عراقیه‌یل روى وه‌ڕوى رژیم دكتاتۆر بوینه‌وه‌ وه‌گشت ئازایه‌تى و جورئه‌تیگه‌وه‌، ك هه‌رچه‌نى ده‌وڵه‌ته‌یل هاوپه‌یمان و ریكخریاگه‌یل نه‌ته‌وه‌ى یه‌كگرتگ  ترس خستنه‌ دڵ عراقیه‌یل ك گوایا ملله‌ت ورسگ  و ده‌سبه‌سیاگ نیه‌تویه‌نن ڕوى وه‌ڕوى رژیم ترسناك بوونه‌وه‌ له‌وه‌ر ئه‌وه‌ك گشت جووره‌ چه‌كه‌یل كوشنده‌یگ  دیریگ  و ده‌ربه‌س نیایگ ئه‌گه‌ر له‌ دژ هاووڵاتیه‌یل خوه‌ى باریگه‌ى كار، چوینكه‌ رژیم رمیاگ ئه‌و فكره‌ له‌وه‌ په‌یاكرد وه‌ختى چه‌ك كیمیاوى له‌شار هه‌ڵه‌بجه‌ هاورده‌ كار دژ هاووڵاتیه‌یل و چه‌كه‌یل قورس هاورده‌ كار ئه‌را سه‌ركوتكردن راپه‌ڕینه‌ شه‌عبانیه‌ گه‌وراگه‌ى عراقیه‌یل و ئه‌و هه‌ڕه‌شه‌یل وه‌رده‌وامه‌ ك وتیاگ عراق بووگه‌ خاكیگ  بى ملله‌ت ئه‌گه‌ر بایگ  و ئۆپۆزسیۆن سیاسى حوكم وڵات بگرنه‌ ده‌س.

وه‌ل ئه‌و هه‌مگه‌ هه‌ڕه‌شه‌و مه‌ترسیه‌وه‌، ملله‌ت عراق خوه‌ى نه‌یا ده‌سه‌وه‌و له‌دژ رژیم وه‌رده‌وام بوى و ئه‌وه‌ بوى ملله‌ت عراق رژیم دكتاتۆر رمانن. هه‌ر له‌وه‌ر ئه‌وه‌یش ئاسو سیاسى له‌یوا نیشانده‌یگ  ك ئه‌و وڵاته‌یل عه‌ره‌بى گومانلیكریاگه‌ وه‌ نزیكترین وه‌خت تاڕاده‌یگ  گویڕیه‌یگ  ئه‌را رژیم سیاسى دیموكراسى و كار ئه‌كا له‌وه‌ر خاتر تاواننه‌وه‌ى حزبه‌یل ته‌قلیدى ك رژیمه‌یل كوومارى سه‌رپیچكار دامه‌زرانن، ئمجا ئه‌زموون عراقى یارمه‌تیده‌ر بوى ئه‌را كووتاییهاوردن قوناغ كوده‌تاى سه‌ربازى و ئاڵشتى كرد ئه‌را راپه‌ڕینه‌یل مه‌ردمى ك ریگه‌یگه‌ وه‌ره‌و دامه‌زرانن ده‌وڵه‌ت دیموكراسى.

ئه‌و راپه‌ڕینه‌یله‌ ك ئیسه‌ وه‌رده‌وامن له‌ ده‌وڵه‌ته‌یل عه‌ره‌بى مایه‌ى بته‌وكردن ئه‌زموون عراقیه‌ له‌مه‌یدانه‌یل سیاسى و ئاسایشه‌وه‌، هه‌ر له‌وه‌ر ئه‌وه‌یش ئومیده‌واریم راپه‌ڕینه‌یل عه‌ره‌بى رژیم و حوكم تازه‌یگ  دیموكراسى له‌لیان بكه‌فیگه‌وه‌و ده‌سڵات دكتاتۆریه‌ت له‌ناو بووه‌یگ  و ئیسه‌یش ئاڵشتكردن رژیم له‌ مسر هووكار گرینگ  یا موهمیگه‌ ئه‌را خاسسازى رژیم عه‌ره‌بى و دامه‌زرانن قه‌واره‌یگ  دیموكراسى عه‌ره‌بى كار بكا له‌بان سستم ئابوورى ئازاد و له‌هه‌مان وه‌خت عراقیش بووگه‌ خاوه‌ن پایه‌ى گه‌وراترین ئابوورى و نه‌خش یا ده‌ور گرینگ  و گه‌ورایگ  ئه‌ڕاى په‌یا بووگ له‌ پشتگیریكردن ئابوورى ده‌وڵه‌ته‌یل عه‌ره‌بى خاوه‌ن رژیم دیموكراسى.