كوردستان سه‌ر عيراقه‌

شفق نيوز

عيراق، هێمان كوردستان يا خوو ئه‌و وه‌خته‌ وڵايه‌ت موسل نه‌خرياويده‌ بان ئه‌و مه‌مه‌له‌كه‌ت تازه‌ى ك وه‌ ناو عيراق دروس كريايود.

له‌ نامه‌ى ئه‌را وه‌زيرى ئه‌و وه‌خت موسته‌عمرات به‌ريتانيا، پرسيار له‌ سنوور وڵاته‌گه‌ى ئه‌كا!. ئه‌وانيش جواوێ ئه‌ده‌نه‌و ئێژن: سنوور وڵاته‌گه‌د له‌ باكوور زنجيره ته‌پوڵگه‌يل كويه‌يل حه‌مه‌رين و شاروچكه‌ى هيت ئه‌و ئيلا تر نايه‌يد. ئه‌وه‌يش وه‌ى جواوه‌ فره‌ دڵته‌نگه‌و ئه‌ده‌ێ و ئويشێ: وه‌ى مانا ئويه‌ وڵاتێ داينه‌س پيم ك چوى له‌ش بێ سه‌رێگه‌ ك ته‌نيا له‌ش داشتوودو بێ سه‌ره‌!.

ئه‌را يه‌ له‌ وه‌ختێ ده‌وڵه‌ت عيراق دروس بويه‌، هه‌ميشه‌ كوردستان چوى سه‌رێ بويه‌، له‌ وه‌ر عه‌قل شۆڤينى و نه‌يون باوه‌ڕ وه‌ ماف و هه‌قه‌يل ملله‌ت كورد، هه‌ميشه‌ ئه‌ى سه‌ره‌ له ناو‌ گێچه‌ڵ و ئاژاوه‌ و جه‌نجاڵ و شه‌ڕ وه‌ دوير نه‌ويه‌. وه‌ى مه‌مه‌ريشه‌ عيراق هويچ وه‌ختێ ئارام نه‌ويه‌، دياره‌ مه‌مه‌ره‌يل فره‌ى هه‌ن ك ئيچنه‌ كرديه‌ ك كوردستان وه‌ سه‌ر له‌ش وڵات عيراق بزاننه‌ى، له‌وانه‌: يه‌كم: بوين سه‌رچه‌وه‌يل نيمه‌ى ئاو وڵات عيراق فێشتر ها له‌ كوردستان وه‌ تايبه‌ت ئاو به‌غدا پايته‌ختيش، دويم، جياوازى جوگرافياو كه‌لتور كوردستان وه‌ل به‌شه‌يل تر له‌ عيراق وه‌ تايبه‌ت ئه‌را گه‌شتوگوزار. سێم، بوين مه‌ياخڵ فره‌ى له‌ باوه‌ت كشتوكاڵه‌و، هه‌رچه‌ن ئيسه‌ وه‌ مه‌مه‌ر بوين وه‌ نه‌ته‌وه‌ گرنگى ئه‌وقره‌ى نه‌مايه‌، وه‌لى جاران شاده‌مار ئابوورى وڵات بوى، هاوه‌ختيش ئيرنگه‌ نه‌فت فره‌ى كوردستان جى ئه‌و مه‌ياخڵه‌ گرتيه‌.

ئه‌وه‌گ مه‌به‌سه‌، ئه‌ى دويا گێچه‌ڵ و قرمقاڵه‌ له‌ ناونى به‌غداو كوردستان، دوياى سه‌رهێزدان ئه‌ى تنه‌وبوينه‌يل وه‌ل حكومه‌ت نورى مالكى و كۆوه‌وبوين سه‌ركرده‌يل كورد، ته‌ماميان ئيچنه ‌كرد ك هه‌رێم كوردستان بووده‌ مه‌ڵوه‌ندێ گرنگ و فێشتر سياسه‌تمه‌داره‌يل وه‌ هساو ئمڕوو، (دوير له‌ لايه‌نگره‌يل نورى مالكى سه‌رۆك وه‌زيره‌يل و ئه‌وانه‌گ ناخوازن وه‌ هويچ شێوه‌ى وه‌ر بكه‌نه‌ كوردستان) كۆوه‌وبوينه‌يل خوه‌يان له‌ێره‌ وه‌ل كورد گه‌رم بكه‌ن و چاره‌نويس حكومه‌ت به‌غدا له‌ێره‌ بخريه‌يده‌ وه‌ر ره‌حه‌مت نه‌شته‌رگه‌رى، ئمجا ئه‌ى نه‌شته‌رگه‌ريه‌ ئه‌وه‌سه‌ ك هه‌ ئه‌را خود نورى مالكى ئه‌كه‌ن يا خوو ده‌رزى ره‌حم و به‌زه‌ى هاتن ده‌ن له‌ مالكى و نه‌نه‌يه‌و لا.

له‌ ماوه‌ى چه‌ن ساڵ گوزه‌يشته‌، دوياى پرۆسه‌ى ئازادى، كورد لايه‌نێگ گرنگ هاوكێشه‌يل سياسى عيراق بويه‌و هويچ حكومه‌تێ وه‌ بێ ليست كورد سه‌رنه‌گرتيه‌. چوين ك له‌ قه‌ديمه‌و جمشت چه‌كدارى كورد، حكومه‌ته‌يل شمولى لاواز ئه‌كرد يا يه‌گ رێ وه‌ پيان نيا تا سه‌قامگيره‌و بوون.

ئيرنگه‌يش ك وڵات له‌ بان بنه‌ماى هاوبه‌ش بوين و سيسته‌م ديمۆكراسى بنيادنريايه‌، كورد فاكته‌رێگ وه‌ هێزه‌ له‌ ناو كايه‌ سياسى ئه‌ى وڵاته‌. ليسته‌يل عيراقى ناو هاوته‌ريف شيعه‌يش ك حكومت دامه‌زرانن، خاس زانن چشت فێشترێ له‌ پاودانگ سياسى وه‌ پيان ره‌سيه‌ له‌ ئه‌و به‌شه‌گ هه‌ق خوه‌يانه‌، وه‌ هاوپه‌يمانى وه‌ل كورد وه‌ ده‌سيان ئه‌ياد. ئه‌را يه‌، هاتن سه‌ركرده‌يل شيعه‌و سوننى وه‌ گه‌رمى‌ ته‌مامه‌ ئه‌را هه‌ولێر و كوردستان، نيشانه‌ى له‌ پاودانگ جوگرافى و سياسى كوردستانه‌.

ئه‌وه‌گ دوينريه‌يد له‌ى قه‌يران ئيسه‌ له‌ ناونى هه‌رێم و به‌غدا، سه‌ركرده‌يل سياسى كورد، وه‌ سه‌ر يه‌گ ئه‌راچينه‌يل و جياوازيه‌يل وه‌ل يه‌كا ديرن، وه‌لى قسيه‌و گوفتاريان له‌ وه‌رايوه‌ر به‌غدا وه‌ يه‌ گوفتار ئه‌خوه‌نيه‌يده‌و.

هه‌ر سه‌ريش هوير له‌ يه‌ بكاو نه‌خشه‌ رێ ئه‌را ئاينده‌ بڕشنێد، ئه‌را ئه‌و كه‌سه‌ ك له‌ به‌غدا له‌ بان كورسى نێشێد، ئمجا هه‌ر كه‌سێ ك تواێد بوود، بايه‌د هه‌ميشه‌ وريايى سه‌ر بكاو ئه‌وقه‌ره‌ نه‌كفێده وه‌ر سوز دڵ و تواناو درێژى قوڵه‌يل!. چوين ك ته‌مام هويره‌و كردن ئايه‌م ها له‌ ناو سه‌رێ و ئه‌ندامه‌يل تر له‌ش، ته‌نيا وه‌ ئشاره‌ وه‌رگرتن له‌ سه‌ر جويليه‌نه‌و. گرنگ بوين هه‌رێم ها‌ له‌يه‌ ك ئيسه‌ ئه‌وقه‌ره‌ له‌ هه‌ولێر جويله‌ى وه‌فدو كۆوه‌وبوينه‌يل سياسى ها له‌تێ ك به‌غدا ئه‌و هويچ لاى ديار نيه‌. قه‌دردار مالكيش، ئه‌گه‌ر گامێگ له‌وه‌رايوه‌ر عه‌روه‌يل سوننى سه‌ركه‌فتێ وه‌ره‌و نوا‌، زامه‌ته‌ له‌ وه‌رايوه‌ر كورد وه‌ ئاسانى ئه‌راى بچووده‌و سه‌ر!./ش