جه‌واد كازم فه‌يلی: راديۆ شه‌فه‌ق نه‌خش چالاكيگ له‌ چه‌سپانن رووشنهويری برايه‌تی و ڕێكخستن ماڵ عيراقی داشتگه‌

شفق نيوز

برايه‌تی و دووسی له‌ عێراق داشتگه‌، وه‌تايبه‌ت ك راديۆ شه‌فه‌ق تويه‌نست نه‌خش چالاكيگ داشتوود ئه‌را يه‌ك خستن وته‌ی عيراق و ڕێكخستن ماڵ عێراقی له‌بان بنه‌وای ئنسانيه‌ت و ئازادی و ديموكراسی و ماف ئاده‌ميزاد.

وه‌ڕێه‌وبه‌ر راديۆ شه‌فه‌ق له‌ وته‌يگ وه‌بوونه‌ی هه‌فتمين ساڵڕووژ دامه‌زرانن راديۆ شه‌فه‌ق و‌ت: له‌شوون ئه‌و ئاڵشتكاريه‌ ك له‌ ساڵ 2003 ئه‌نجام گرت و خوه‌ر ئازادی و ديموكراسی له‌ گشت لايگ عێراق ده‌رچی و وه‌ل ئه‌و خراويه‌يله‌ ك وه‌ليه‌و هات و ئه‌و سه‌ختيه‌يله‌ ك له‌دريژه‌ی هه‌يشت ساڵ وه‌رين كيشايم، تويه‌نستيم گرنگترين چشت له‌ ژيان هاووڵاتی عيراقی وه‌ده‌س باريم ك ئه‌وه‌يش ئازادی كار سياسی و ئازادی رووژنامه‌نويسی و ئازادی به‌يان بوی.

جواد كازم فه‌يلی هه‌ميش وت: وه‌ختيگ يه‌كمين موم شه‌فه‌ق ده‌م دايم ته‌قالای فره‌يگ كرديم ئه‌را خزمه‌تكردن وه‌ هاووڵاتی عيراقی له‌ بوار رووشنهويری و ئعلامی و ئاڵشته‌وكردن ديدگايل غه‌ڵه‌ت ك له‌لايه‌ن ده‌سه‌ڵات سه‌دامی په‌خشه‌و كرياويد وه‌ل ديدگا و باوه‌ڕه‌يل ئه‌ی سه‌رده‌مه‌ تا وه‌ل عيراق نوو بگه‌نجيه‌يد. وه‌لی هه‌ر له‌سه‌ره‌تاوه‌ وه‌زعه‌گه‌ ژيربانه‌و بوی و وڵات چيه‌ناو جه‌نگ وه‌ل تيرۆر و هێزه‌يل شه‌ڕ ك له‌بان گشت لايه‌نه‌يل ژيان له‌ عێراق و له‌وانه‌يش ئعلام كاريگه‌ری نا.

ناوبرياگ هه‌ميش ئاشكرا كرد: راديۆ شه‌فه‌ق له‌دريژه‌ی دو ساڵ گوزه‌يشته‌ و له‌ بارووه‌زع سه‌خت وڵات نه‌خش گه‌ورايگ له‌ بوار په‌خشه‌وكردن و بته‌وكردن رووشنهويری برايه‌تی و يه‌كتره‌ك وه‌خشين جيوه‌جی كرد و له‌ڕيگه‌ی ئعلام ئازاد و بی لايه‌نيگ له‌دژ توندوتيژی وساس و راسيه‌يل وه‌شيوه‌ی بی لايه‌ن و دادوه‌رانه‌يگ په‌خشه‌و كرد، و تويه‌نست گشت ملله‌ت عيراق وه‌ گشت نه‌ته‌وه‌يل و تايفه‌يلی له‌ده‌ور خوه‌ی گرده‌و بكا.

وه‌ڕێه‌وبه‌ر راديۆ شه‌فه‌ق هه‌ميش ئاشكرايه‌و كرد: شه‌فه‌ق تويه‌نست وه‌هاوكاری گووشته‌كنه‌يلی نه‌خش گرنگيگ له‌ گرده‌وكردن وته‌ی عيراق و ڕێكخستن ماڵ عێراقی و له‌بان بنه‌وای ئازادی و ديموكراسی و ماف ئاده‌ميزاد داشتوود.

فه‌يلی له‌دريژه‌ی وته‌گه‌ی ئعلان كرد: ئيمه‌ هه‌يشتمن موم خوه‌مان ده‌م ده‌يم و گشتمان ئوميده‌واريم ك وه‌ل يه‌كه‌و دريژه‌ بيه‌يمنه‌ ڕيگه‌مان ئه‌را سه‌رخستن ئامانجه‌يلمان و گله‌وداين شوون به‌رز و ژيار عيراق له‌ناونی نه‌ته‌وه‌يل و گله‌وداينی ئه‌را باوش خێزان ناوده‌وڵه‌تی و دامه‌زرانن عيراق ديموكراسی ئازاد و سه‌روه‌خوه‌ی ك قانوون و ده‌زگايه‌ل ده‌ستووری وه‌ره‌و نوای به‌ن و ئه‌يه‌ له‌ گرنگترين داواكاريه‌يل ملله‌ت و گرنگترين بنه‌وايل ئه‌من و سه‌قامگيری و له‌ناوبرد‌ن گه‌ناته‌كاریه‌ و ئه‌ی ئامانجه‌ سه‌رنيه‌كه‌فێ مه‌گه‌ر وه‌ يه‌كخستن وته‌ و هاوكاری و قه‌بوول كردن ديدگای يه‌كتره‌ك و هه‌ست كردن وه‌ وه‌رپرسايه‌تی.

وه‌ڕێه‌وبه‌ر راديۆ شه‌فه‌ق له‌كووتايی وته‌گه‌ی له‌بان پێشكه‌فتن و سه‌ربه‌رزی له‌ بوار راگه‌ياندن عێراقی ئازاد جه‌خت كرد و له‌ گشت كارمه‌نده‌يل راديۆ شه‌فه‌ق ده‌سخوه‌شی و پيرۆزبايی كرد.

جی باسه‌ راديۆ شه‌فه‌ق ك له‌ ساڵ 2004 دامه‌زريا يه‌كمين راديۆ وه‌ شيوه‌زووان فه‌يلی له‌ تاريخ عيراقه‌ و به‌رنامه‌يلی وه‌ دوو زووان عه‌ره‌بی و كوردی و وه دو شيوه‌زووان سورانی و فه‌يلی بڵاو ئه‌كا و به‌رنامه‌يلی له‌بان باوه‌ته‌يل سياسی و كومه‌ڵايه‌تی و رووشنهويری و باوه‌ته‌يل گرنگ شه‌قام عيراقی ته‌ركيز ئه‌كا.