هاوسه‌رگيری وه‌ل بيگانه‌

شفق نيوز

  پرووسه‌ی هاوسه‌رگيری وه‌ مانای دروسكردن و پيكهاوردن خيزانه‌ له‌شوون ئه‌وه‌ك كوڕ و دويه‌ت جوور يه‌ك خوازيارن بچنه‌ ناو ژيانيگ تازه‌و له‌سای ئه‌و ژيانه‌ ماڵ و مناڵ داشتوون و خوه‌يان ئه‌رك وه‌رپرسيارێتی وه‌ڕيه‌وبردن ئه‌و ژيانه‌ بگرنه‌ مل و له‌ خوه‌شی و ته‌نگی هاوبه‌ش و هاوكار يه‌كتری بوون، ك يه‌يش يه‌كيگه‌ له‌و نعمه‌ته‌يل گه‌ورا ك خودای په‌روه‌ردگار وه‌ په‌تی به‌خشيه‌سه‌ی ئاده‌ميزاد.

هاوسه‌رگيری وه‌ مانايگ تر په‌يوه‌سبوين دو ره‌گه‌ز "نير و ما" وه‌ يه‌كتری له‌بان بنه‌مای شه‌ريعه‌ت و نه‌ريته‌يل په‌يڕه‌وكرياگ ئايينی ك هه‌ر له‌ سه‌ره‌تای وجوود ئاده‌ميزاد له‌ ژيان و له‌بان ئی گووشه‌ی زه‌ويه‌ وجوود داشتگه‌و نموونه‌ی ئی هاوسه‌رگيرييشه‌ سه‌ره‌تای چووده‌و ئه‌را په‌يوه‌سبوين و يه‌كه‌وگرتن"حه‌وا و ئاده‌م" ك باوه‌گه‌ورا و دايه‌گه‌ورای سه‌رجه‌م ئاده‌ميزادن و هه‌ر له‌ ئه‌وانيشه‌و زڕيوه‌ت كه‌فته‌و تا رووژ ئمڕوو، مانای ئه‌وه‌سه‌ ئی مه‌سه‌له‌ راسه‌وخۆ په‌يوه‌سه‌ وه‌ ئيراده‌ی خودايی له‌وه‌ر زاوزيكردن و زيايبوين زڕيوه‌ت نه‌وه‌ی ئاده‌م و حه‌واو دروسكردن ژيان تايبه‌ت و ئاشنابوين وه‌ يه‌كتری.

وه‌ل ئه‌وه‌يشا دياره‌ ژيان هاوسه‌رگيری ته‌نيا هه‌ر ئه‌وه‌ نيه‌ ك پڕه‌وكردن هه‌وه‌جه‌يگ بوود له‌ژيان ئاده‌ميزاد جوور مه‌سه‌له‌يگ باو له‌ناو كوومه‌ڵگا، به‌ڵكوو هاوسه‌رگيری بايه‌سه‌ په‌يوه‌سبوينيگ رووحی بوود له‌بان بنه‌مای سووز و خوه‌شه‌ويسی له‌وه‌ر ئه‌وه‌ك شادی و به‌خته‌وه‌ری له‌سای ئه‌و ژيانه‌ ئه‌ڕايان بووده‌ گه‌نجينه‌يگ ئه‌را روی وه‌ڕوی بوينه‌وه‌ی مه‌ينه‌تی و سه‌ختيه‌يلی، ك هه‌ر وه‌و خاتريشه‌ خودای په‌روه‌ردگار له‌ قورئان له‌ سوره‌ی" رووم" له‌ ئايه‌ی ٢١ فه‌رمايش كردگه( ومن آياته أن خلق لكم من انفسكم أزواجا لتسكنوا اليها وجعل بينكم مودة ورحمة ان في ذلك لأيات لقوم يتفكرون )، يه‌يش وه‌و مانا ك خودا هه‌ر له‌ خوه‌دان هاوسه‌ر ئه‌رادان دروسكرد تا له‌سای بنيشين و سووز و خوه‌شه‌ويسی خسته‌سه‌ ناونيدان.

له‌يرا مه‌رام له‌ی هاوسه‌رگيری وه‌ل بيگانه‌ وه‌و كه‌سه‌يله‌ ئويشيمنه‌ی ك كووچ كه‌ن وه‌ره‌و ولاَته‌يل خوه‌رئاواو شوونه‌يل تر ئی جه‌هان ده‌رينده‌يشته‌ و ژيانيان تيكه‌ڵ وه‌ ره‌گه‌زه‌يل بيگانه‌ كه‌ن و هاوسه‌رگيری وه‌ل دويه‌ته‌يل بيگانه‌"اجنبي"ئه‌نجام ده‌ن، ك ئايا تاچه‌نيگ ئی هاوسه‌رگيريه‌ سه‌ركه‌فتگه‌و ئامانج له‌ هه‌ڵوژاردن دويه‌ته‌يل بيگانه‌و هاوردنيان ئه‌را وڵات و زێدو ماوای دوير خاك نيشتمانيان چه‌س، وه‌تايبه‌ت ئه‌وانه‌ ئاينيان له‌ ئايين ئسلام جياوازه‌و ته‌نانه‌ت داب ونه‌ريت و ره‌فتار و هه‌ڵسوكه‌فتيانيش جياوازه‌ له‌ ره‌فتار مه‌ردم خوه‌رهه‌ڵاتی؟ ئايا جايه‌ڵ جوانه‌يلمان هوير له‌وه‌ كردنه‌ ك دروسكردن ژيان هاوسه‌ری وه‌ل بيگانه‌ زه‌مانه‌تی چه‌ بوود ئه‌را گرده‌وكردن ئه‌و هاوسه‌ره‌ وه‌ل خيزان و بنه‌ماڵه‌يان؟ ئايا ئه‌و دويه‌ت بيگانه‌ ئاماده‌س له‌وه‌ر خاترد وڵات خوه‌ی بيليده‌ جی و باقی عومری له‌ غوربه‌ت بووه‌يده‌ سه‌ر؟

بيگومان جايه‌ڵ جوانه‌يل فريه‌يگ هه‌ن ك چينه‌سه‌ ناو له‌يوا پرووسه‌يگ و هاوسه‌ر ژيانيان بيگانه‌س، ك يه‌يش له‌لايگه‌و جی داخه‌ پشت له‌ دويه‌ته‌يل وڵاته‌گه‌ی خوه‌يان كه‌ن و له‌لايگ تريشه‌و چاره‌نويس و ئاينده‌ی خوه‌يان وه‌ ته‌واوی له‌وه‌رچه‌و ناگرن و نيه‌زانن مه‌وج ئاقبه‌ت وه‌ره‌و كاملا ده‌ڵه‌كيان ئه‌ياد.

ئمڕوو دوينيم بريگ له‌ جايه‌ڵ جوانه‌يلمان وه‌ گشت شانازييگه‌و په‌نا بردنه‌سه‌ وه‌ر ئيچنه‌ هاوسه‌رگيرييگ و دويه‌ته‌يل بيگانه‌ فه‌رز كردنه‌سه‌ بان قه‌وم وخيش، ك يه‌يش وه‌ باوه‌ڕم كاريگه‌ری خاسيگ نه‌يريد له‌بان به‌ن خيشايه‌تی و دويای ئه‌وه‌يش فره‌جار مناڵ ئه‌و هاوسه‌رگيريه‌ نيه‌وده‌ هووكار په‌يوه‌سكردن داڵگه‌گه‌ وه‌ خيزان باوانه‌و، يا دوينيد له‌ شوون ماوه‌يگ له‌وه‌ر هه‌ر هووكاريگ بوود ئه‌و هاوسه‌رگيريه‌ شيويه‌يدو جياجيايی كه‌فيده‌ ناونی ژن و پياوه‌گه‌، ك له‌ی حاڵه‌تيشه‌ ئه‌و مناڵه‌يله‌ بوون يه‌كه‌م قوربانی ئه‌و ته‌ڵاقداينه‌و سه‌رگه‌ردان بوون له‌ناونی هه‌ڵوژاردن باوگ يا داڵگ، هه‌ر وه‌و خاتريشه‌ تويه‌نيم بويشيم ئه‌و مناڵه‌يله‌ نيه‌ونه‌ زه‌مانه‌ت سه‌رخستن ئه‌و پرووسه‌، ئه‌را نموونه‌: له‌ حاڵ حازر كه‌سه‌يليگ هه‌ن دويه‌ت بيگانه‌ خوازينه‌ جوور رووسی، بريتانی، ئه‌ڵمانی، نه‌رويجی...هتد و ته‌نانه‌ت جايه‌ڵ جوان له‌يوايش هه‌ن له‌بان تووڕ ئه‌نته‌رنێت ئاشنای خوه‌يان وه‌ل دويه‌ته‌يل بيگانه‌ كردنه‌و خوازينه‌سه‌ی، وه‌لی ئايا تا چه‌نيگ ئه‌و دويه‌ته‌يله‌ ئاماده‌ن مقه‌يه‌تی له‌و خوه‌شه‌ويسی و پرووسه‌ی ژيانه‌ بكه‌ن و وه‌رگه‌ی ته‌نيايی و دويری كه‌سوكاريان بگرن و بتويه‌نن خوه‌يان وه‌ داب ونه‌ريت جيا له‌داب ونه‌ريته‌يله‌يل خوه‌يان رابارن و ئه‌وزه‌ڵ بكه‌ن تا هانه‌ دونيا؟ بيگومان ئمڕوو شماره‌ی فريه‌يگ له‌ جايه‌ڵ جوانه‌يل هه‌رێم كوردستان ئيچنه‌ هاوسه‌رگيريه‌ وه‌ل بيگانه‌يلا هه‌ڵوژاننه‌و فريه‌يگيش له‌ليان شكه‌ست هاوردو له‌وه‌خت گله‌وخواردنيان ئه‌را هه‌رێم واز له ژنه‌يليان هاوردن و ژيانيان وه‌ يه‌كه‌و تاسه‌ر نه‌وی.

ج . أ