ته‌ڵاق خاستره‌ يا ژيانيگ پڕ هه‌ڕه‌شه‌؟

شفق نيوز

 

بيگومان گشت كه‌سيگ چ ژن چ پياو قه‌درو حورمه‌ت خوه‌ی ها خوه‌يه‌و، ك ئه‌ويش وه‌ گووره‌ی ره‌فتار و هه‌ڵسووكه‌فتی له‌ژيان و چوينيه‌تی مامڵه‌كردن وه‌ل كه‌سه‌يل وه‌رانوه‌ر و خواست رووژگار ده‌ركه‌فيد.

پيشينه‌يل وتنه‌"ئه‌گه‌ر زه‌مانه‌ وه‌لدا نه‌سازيا، ت وه‌ليا بساز" ئه‌يه‌ له‌ حاڵه‌تيگه‌ ئه‌گه‌ر چه‌رخ رووژگار وه‌ مه‌يل و ئاره‌زوو دڵ نه‌چه‌رخياو زوورد وه‌مليا نه‌شكيا، ك له‌ی حاڵه‌ته‌ ناچاريد وه‌ ئه‌قڵ و سه‌بووری له‌ژير سای داكراسيه‌يدو رازی بويد وه‌ رويداگه‌يلی، وه‌لی له‌ هه‌مان وه‌خت نه‌بايه‌د بی ئوميد بويد له‌ ئاينده‌و ئاكام ئه‌و سه‌بووری و نه‌خشه‌يله‌ ك كيشايده‌سه‌ی ئه‌را خاسسازی و ئاڵشتكردن شيواز ئه‌و ژيانه‌ ك وه‌ سه‌خت له‌ليد گوزه‌ريد وه‌ره‌و خاستر، چوينكه‌ يه‌كيگ له‌ بنه‌مايه‌يل ژيان ئاده‌ميزاد ئه‌وه‌سه‌ خوسه‌ی رووژگار گوزه‌يشته‌ نه‌كيشيدو نه‌خشه‌ دابنه‌يد ئه‌را ئاينده‌.

وه‌لی له‌يرا باس له‌ نه‌گونجيان ونه‌سازيان ناونی ژن و شوی و ده‌رده‌سه‌ری ئه‌و ژنه‌ كه‌يم ك له‌لايه‌ن باوانيه‌و ناچار كريه‌يد وه‌رگه‌ی زوڵم و سته‌م هاوسه‌ره‌ ناجووره‌گه‌ی بگريدو تا مه‌ندگه‌ له‌ ژيان هه‌ر وه‌و‌ ژان و حه‌سره‌ت كاڵه‌و بژيه‌يدو كليل چاره‌سه‌ر له‌لی زه‌فت بكريه‌يد!!

گه‌وراترين مه‌ترسی له‌ ژيان هاوسه‌رێتی ئه‌وه‌سه‌ ك ژن و شوی له‌يه‌كتری نه‌ڕسنه‌وه‌و وه‌ دريژايی ژيانيان له‌ژير ته‌وق ده‌مه‌قاڵ و جه‌نگ و مرافه‌ بژيه‌ن و نه‌تويه‌نن خوه‌شه‌ويسی و قه‌در و حورمه‌ت له‌ناونيان سه‌رفراز و سه‌قامگير بكه‌ن، ك بيگومان يه‌يش بووده‌ هووكار په‌لكيشكردن كاولكاری وه‌رده‌واميگ وه‌ره‌و ناهمی و بيبه‌شی له‌ ژيان ئاسووده‌يی، وه‌ تايبه‌ت ئه‌گه‌ر وه‌رده‌وام پياوه‌گه‌ دار زولَم و سته‌م وه‌ ده‌سيه‌و بوی و ژيان له‌و هاوسه‌ريه‌ كرده‌ ژه‌هر مار و گشت ده‌روازه‌يل خوه‌شی و به‌خته‌وه‌ری له‌ هه‌نای به‌ساو ماملَه‌ی سه‌خت و بی وژدانی وه‌ليا كرد و هه‌ميشه‌ ئه‌و ژنه‌ له‌ ناونی ماوه‌يگ و ماوه‌يگ تر له‌تاو كوشتن و سزاداين په‌نا بووه‌يده‌ ماڵ باوان و بتوريه‌يد. ئمجا ئايا له‌ی حاڵه‌ته‌ ته‌ڵاق خاستره‌ يا ژيانيگ پڕ له‌ مه‌ترسی وهه‌ڕه‌شه‌؟ يه‌يش له‌وه‌ختيگ ك ژنه‌گه‌ بڕه‌سيده‌ حاڵه‌تيگ دی توانای وه‌يه‌كه‌وژيان نه‌ياشتوود وه‌ل ئه‌و هاوسه‌ره‌و خوازيار بوود قورتار له‌ده‌س زوڵم و زووری.

له‌ی دونيا نه‌ ئايين موسڵمان و نه‌يش كتاوه‌يل تر ئاسمانی نين وه‌ل ئه‌نجامداين زوڵم و سته‌مكاری و ياسايه‌يل ئنسانيه‌تيش په‌سه‌ن ئيچنه‌ كرده‌وه‌يليگ نه‌كردگه‌ ك پياو هه‌قه‌يل شه‌رعی و كومه‌ڵايه‌تی ژن ژيرپا بكاو گشت كرده‌وه‌ی ناجووريگ ده‌رهه‌ق ژن وه‌ ڕه‌وا بزانيدو ژيان له‌ هاوسه‌ری بكاده‌ دووزه‌خيگ ئاگرين و له‌ هه‌ر وه‌ختيگ ئه‌قڵی بڕی تازيانه‌ی بيه‌يدو سووكايه‌تی وه‌پی بكا جوور ئه‌وه‌گ بويشيد"له‌ جيای قه‌رد درياسه‌پی"، نه‌خه‌ير ئيچنه‌ ره‌فتاريگ ناپه‌سه‌ن و ناڕه‌واس وه‌لای خوداو به‌نه‌وه‌، ك هه‌ر وه‌و خاتريشه‌ ئه‌رك باوان وه‌تايبه‌ت خيزان ئه‌و دويه‌ته‌ ئه‌وه‌سه‌ ك كليل چاره‌سه‌ر داشتوون و ناچاری نه‌كه‌ن وه‌رگه‌ی ئه‌و به‌دبه‌ختی و ماڵويرانيه‌ بگريد و له‌و زيندانه‌ بژيه‌يد ك بنه‌ڕه‌ت و بنته‌مه‌ڵی وه‌ غه‌ڵه‌ت نرياس، بايه‌سه‌ له‌بان ئه‌و باوگ و داڵگه‌ بگه‌ردنه‌ شوون ئاسووده‌يی و سه‌رفرازی ئه‌ڕای و له‌و گووشه‌ی ژان و سته‌مه‌ قورتاری بكه‌ن و ژيان تازه‌يگ ئه‌ڕای ده‌سه‌وه‌ر بكه‌ن.

جه‌ماڵ ئه‌ركه‌وازی