به‌شیگ له‌ شیتى ئاده‌میزاد

شفق نيوز

  ئه‌و ره‌فتار و هه‌ڵسووكه‌فته‌یله‌ فریه‌ن ك جى مه‌یلكیشانن و له‌ هه‌مان وه‌خت ئه‌تویه‌نیم ناو "شیتى" هه‌میشه‌یى له‌لى بنه‌یم، ئنجا ئیوه‌ ته‌ماشا بكه‌ن و خوه‌دان بڕیار بیه‌ن.

ئاده‌میزاد له‌وه‌ختیگ ك مناڵه‌، هه‌میشه‌ ئاره‌زوو گه‌ورابوین ئه‌كاو جارجاریگیش له‌وه‌ختیگ ك پرسیار عومرى له‌لى ئه‌كریه‌ید چه‌ن ساڵیگ ئه‌خاده‌ بان عومر راسكانى خوه‌ى، هه‌ر له‌وه‌ر ئه‌وه‌یش نوڕید سه‌رجه‌م قوناغ مناڵى بازداینه‌ وه‌ره‌و قوناغ هه‌رزه‌كارى و گه‌ورایى.

ئنجا وه‌ختیگیش ك عومرى پا وه‌ره‌و گه‌ورایى نا، دوینید هه‌میشه‌ ته‌ماشاى گوزه‌یشته‌ ئه‌كاو ئومید و ئاره‌زوو گله‌وخواردن قوناغ مناڵى خوه‌ى ئه‌كا، دى نوڕید وه‌و جووره‌ نه‌ له‌ مناڵى خوه‌ى و نه‌یش له‌ گه‌ورایه‌گه‌ى هویچ تامیگ وه‌رناگرید.

ئاده‌میزاد، وه‌تایبه‌ت مه‌ردم ناوچه‌یل خوه‌رهه‌ڵات ك كوردیش به‌شیگه‌ له‌لى، دوینیده‌ى شه‌و ئه‌یاده‌ ده‌م رووژ وه‌بى ئه‌وه‌ك گووش بیاده‌ ته‌ندروسى خوه‌ى، هه‌ر له‌وه‌ر ئه‌وه‌یش دوینید هه‌میشه‌ خه‌ریك گرده‌وكردن پویله‌!

بیگومان یه‌یش له‌یوا ئه‌كا ك له‌ عومریگ نه‌ فریه‌ گه‌ورا نه‌یش فره‌یه‌ بویچگ دوچار جووره‌ها نه‌خوه‌شى باید، ئنجا ئه‌و پویلیشه‌ ك گردیه‌و كردگه‌ دوینیده‌ى گشتى له‌ڕى پزیشك و نه‌خوه‌شخانه‌یل خه‌رج ئه‌كا.

ئاده‌میزاد تام له‌و رووژه‌ وه‌رناگیرد ك له‌تى ژیه‌ید، به‌ڵكوو هه‌میشه‌ چه‌وى ها دویاڕووژ و هه‌ر ئه‌را ئه‌و دویاڕووژیشه‌ هه‌وڵ ئه‌یاد، ك وه‌گووره‌ى ئى فكره‌یشه‌ هه‌م ئیسه‌و هه‌م ئاینده‌یش له‌ده‌س ده‌ن.

هه‌ر وه‌و خاتریشه‌ دوینید ئاده‌میزاد وه‌تایبه‌ت مه‌ردم خوه‌مان له‌وه‌ختیگ ژیه‌ید هه‌رگز هویر له‌وه‌ ناكه‌ن ك ویستگایگ هه‌س له‌وه‌رده‌مى ك وه‌پى ئویشن ویستگاى مه‌رگ، دى نوڕید وه‌ختیگیش مرن جوور ئه‌وه‌سه‌ ك ته‌نیا رووژیگیش له‌ جه‌هان نه‌ژیانه‌، ئنجا ئایا رووژیگ تیه‌ید ئاده‌میزاد وه‌ڕاسى هویر له‌ى حاڵ بیحاڵه‌ بكا،، من گومان دیرم له‌وه‌.

تابلۆ حه‌سه‌ن

ج . أ