رووژگاره‌یل خوه‌ش خوداحافزى كردن

شفق نيوز

چه‌ویان كه‌فتیه‌سه‌ ئى رووژگار ئیسه‌و هیمان له‌ ژیان مه‌ندنه‌.

 

ئى نه‌وه‌ ك له‌ رووژگاره‌یل خوه‌ش ژیان وه‌سه‌ر بردنه‌، وه‌یاد ئه‌و رووژه‌یله‌ ژیان به‌نه‌ سه‌ر و بڕیگ له‌ى كه‌سه‌یله‌ ك له‌و سه‌رده‌مه‌ ژیانه‌ په‌شیمانن و بڕیگیش له‌لیان نگه‌رانن، وه‌تایبه‌ت ك ئمڕوو ژیان وه‌ شیوازیگ تر و جیاواز دوینن، ك رووشنایه‌گه‌ى كزه‌و بویه‌و جوانى خوه‌ى له‌ده‌سداس و ئه‌زره‌تمه‌ن گله‌وخواردن رووژگار وه‌رینن ك ئى ئه‌زره‌تیشه‌ مه‌حاڵه‌.

 

ئه‌وه‌ك له‌ رووژگار ئمڕوو دوینریه‌ێد، ته‌نیا ئاڵشتكاریه‌یل سیاسى نییه‌، به‌ڵكوو لایه‌نه‌یل كومه‌ڵایه‌تى و رووشنهویرى ئاڵشتكارى گه‌ورایگ له‌تیان رویداگه‌، ئى ئاڵشتكارییشه‌ ته‌نیا كوومه‌ڵگاى ئیمه‌ نه‌گرتیه‌سه‌و، به‌ڵكوو كومه‌ڵگایه‌یل تر ناوچه‌گه‌یش گرتگه‌سه‌و.

 

ئمجا له‌ى باوه‌ته‌و پیاویگ له‌عومر شه‌س ساڵان له‌وه‌ختیگ له‌لى پرسین" ت كه‌سیگ  رووژگاره‌یل خوه‌شید؟" له‌جوواو ئى پرسیاره‌ وت: چوین زانین؟؟ وتن چوینكه‌ گووش له‌ گورانیه‌یل محه‌مه‌د عارف جزیرى و حه‌سه‌ن زیره‌ك و تایه‌ر ته‌وفیق گرید.

 

ره‌سانه‌یه‌تى ئه‌و رووژگاره‌یل دویه‌كه‌ ك جوانى وه‌پیه‌و دیار بوى جوور ره‌فتار خاس و هسه‌یل نه‌ته‌وایه‌تى و قه‌ناعه‌ت ئاده‌میزاد وه‌ ژیان و دووسداشتن و سووز ئه‌را وڵات و نیشتمان و رێزگرتن كه‌رامه‌ت مه‌ردم، چیه‌ سه‌ر و دى گله‌وخواردن نه‌یرێد. له‌ رووژگاره‌یل جوان گشت ئاده‌میزادیگ و هه‌ر تاكیگ وه‌ شیوه‌یگ ئاسایى ژیان بردیاده‌ سه‌ر و هه‌ر یه‌كیگ نه‌خش خوه‌ى داشت له‌چوارچیوه‌ى یاسا.

 

له‌رووژگاره‌یل خوه‌ش، په‌یوه‌ندیه‌یل كومه‌ڵایه‌تى فره‌ بته‌و بوین، سه‌رڕشته‌ فره‌ بوى، متمانه‌و ركابه‌ریه‌تى دووسانه‌ بوى له‌ناونى تاكه‌یل كومه‌ڵگا، به‌رژه‌وه‌ندى گشتى له‌بان به‌رژه‌وه‌ندیه‌یل تاكه‌كه‌سى بوى، جیاوازى نه‌وى له‌ناونى دینه‌یل، ژن پایه‌ى دیارییگ داشت له‌ناو كومه‌ڵگا.

 

ئه‌و رووژگاره‌ هویچ دابه‌شبوینیگ چینایه‌تى و مه‌زه‌وى له‌تى نه‌وى و هه‌ر ئاده‌میزادیگ مقه‌یه‌تى له‌ پایه‌ى خوه‌ى كردیاد له‌ناو كومه‌ڵگا، دیارده‌ى تون وتیژى وجوود نه‌یاشت له‌ناو چین و پێكهاته‌و مه‌زه‌وه‌یل و گشتیان جوور برا وه‌یه‌كه‌و له‌ناو كومه‌ڵگا ژیان بردیانه‌ سه‌ر.

 

بیجگه‌ ئه‌وه‌یش هه‌ر تاكیگ مه‌رز خوه‌ى زانستیادو ئاده‌میزاده‌یل ئاره‌زوو خوه‌ندنیان فره‌ بوى و دووس تازه‌گه‌رییش داشتن، هس ئاده‌میزاده‌یل زیاتر رۆمانسى بوى، ژینگه‌ى ئه‌و رووژگاره‌یله‌ زیاتر پاك و كویچه‌و جاده‌یلیش بى ده‌نگ بوین و ژیان زیاتر سه‌قامگیر بوى و خوه‌ندنگایه‌یل زیاتر گرنگى دیانه‌ په‌روه‌رده‌و هووكاره‌كردن و مامۆستایه‌یلیش زیاتر دڵسووز بوین له‌ كاره‌یلیان و خوه‌ندكاره‌یلیش وه‌ په‌رووشه‌و چیانه‌ خوه‌ندنگا مه‌گه‌ر ته‌نیا فه‌قیرى ریگر بویاتاد له‌لیان و نه‌تویه‌نستیان بچنه‌ وه‌ر خوه‌ندن.

 

هه‌ر له‌و رووژگاره‌یله‌ ڕێ وڕه‌سمه‌یل دینى یا هه‌ر بوونه‌یگ خێزانى تام و له‌زه‌تیگ تر داشت، ژن و پیاو وه‌یه‌كه‌و به‌شدارى بوونه‌یل كردیان و هه‌ر وه‌ل یه‌كا دانیشتیان وه‌بى ئه‌وه‌ك هویچ كێشه‌یگ یا گومانیگ بوود، گشتى جوور یه‌ك خیزان ئاسووده‌ بوین. كومه‌ڵگا له‌ رووژگاره‌یل خوه‌ش زیاتر هاوكارى وه‌پیه‌و دیار بوى و خوه‌ندنگاو زانكۆیه‌یل حورمه‌ت خوه‌یان داشتن و خوه‌ندكار حورمه‌ت مامۆستاگه‌ى خوه‌ى گرتیاد، وه‌لى ئه‌وه‌ك ئیسه‌ دوینریه‌ێد داب ونه‌ریته‌یل جوور ئه‌وسا نه‌مه‌ندگه‌و گشت چشتیگ ئاڵشت بویه‌و تام و له‌زه‌ت ئه‌وسا نه‌مه‌ندگه‌و قسه‌ى خوه‌ش و جوان گوم بویه‌و خوسه‌و كینه‌ت شوون وه‌یه‌كه‌و ژیان و هاوكارى گرتگه‌سه‌و.

 

سوهه‌یل تاهیر عه‌بدوڵڵا

 

ج. ا