خوین وه‌ خوین!

شفق نيوز

 

یه‌یش ئه‌لف وباى سیستم دیموكراسیه‌ ك بایه‌سه‌ مقه‌یه‌تى له‌ سه‌روه‌خوه‌یى دادگا بكریه‌یدو هویچ كه‌سیگ ده‌س نه‌خاده‌ كاروبار دادگا، وه‌تایبه‌ت له‌لایه‌ن ده‌سڵاته‌و.

وه‌لى له‌ى وڵاته‌ ك وه‌پى ئویشن عراق و ئیسه‌ وه‌ناو سیستم دیموكراسى و فرییه‌و پیاده‌ ئه‌كریه‌ید و په‌رله‌مان و هه‌ڵوژاردن له‌تى وجوود دیرید، نوڕید تازه‌ سه‌رۆك وه‌زیره‌یلى وه‌ ئه‌قڵیه‌ت هووزایه‌تى هویره‌و ئه‌كاو له‌بان بنه‌ماى هووزانه‌ ره‌فتار و هه‌ڵسووكه‌فت ئه‌كا.  

ئه‌ى مه‌گه‌ر ئه‌وه‌ نیه‌ ئویشید"خوین وه‌خوین" یه‌یش ماناى ئه‌وه‌سه‌ هویچ قه‌در و ده‌سڵاتیگ ئه‌را دادگا نه‌یشتگه‌و ئه‌كه‌فیده‌ نواى دادگا له‌ بڕیارداین.

له‌و وڵاته‌یله‌ ك وه‌ راسى په‌یڕه‌و دیموكراسى له‌تیان ئه‌كریه‌ید، ئیچنه‌ كاره‌یلیگ ته‌نیا خریه‌یده‌ لاى دادگا، ئه‌را نموونه‌: له‌ساڵ 1986 ئۆلف پالمێ سه‌رۆك وه‌زیره‌یل سوید له‌ ناوڕاس شار ته‌قه‌ له‌لى كریاو كوشیا، دویاخریش تومه‌تباریگ ده‌سگیر كریاو ئه‌را ماوه‌ى ساڵیگ په‌یجوورى وه‌لیا كریا، یه‌یش له‌وه‌ختیگ ك خیزان پالمێ ده‌سنیشان تومه‌تباریگیش كرد، وه‌لى دادگا بڕیار خوه‌ى داو تومه‌تباره‌گه‌ ئازاد كرد چوینكه‌ به‌ڵگه‌ى ته‌مامیگ له‌بانى نه‌یاشت، ئمجا نه‌ سه‌رۆكایه‌تى حزب سۆشیالیست دیموكرات و نه‌ ده‌سڵاتداره‌یل و نه‌یش لایه‌نگره‌یل ئه‌و حزبه‌ ك شماره‌یان ملیۆنه‌ها كه‌س بوى هویچكامیان باس توڵه‌ یا هه‌قه‌وكردن نه‌كردو كه‌سیش ره‌خنه‌ له‌ دادگا نه‌گرت.

نه‌ك ته‌نیا ئه‌وه‌، به‌ڵكوو دادگا بڕه‌ پویلیگیش جوور قه‌ره‌بوو پیشكه‌ش كرده‌ تومه‌تباره‌گه‌، دى ئه‌وه‌ بوى نه‌ كه‌سیگ باس خوین وه‌ خوین كرد و نه‌ كه‌س خوه‌ى گیڤه‌و كرد و نه‌یش سیاسه‌تمه‌داریگیش خوه‌ى گیل كرد.

ئیسه‌یش تومه‌تبار بكوش محه‌مه‌د بدێوى دریاسه‌ ده‌س یاساو دى یاسا بڕیار شیوه‌ى سزاگه‌ى ئه‌یه‌ن نه‌ك كه‌سه‌یل تر، هه‌ر وه‌و خاتریشه‌ بایه‌س بوى سه‌رۆك وه‌زیره‌یل عراق ئه‌وه‌نه‌ سه‌بر بكردیاد تا تومه‌تباره‌گه‌ دریا دادگا نه‌ك باس خوین وه‌ خوین بكاو له‌بان ئه‌و یاساى چه‌فته‌ ك ئویشید:: چه‌و وه‌ چه‌و و دگان وه‌ دگان...هتد، هه‌ر له‌ ئیسه‌وه‌ بریار بیه‌ید.

سه‌لام عه‌بدوڵڵا

ج . أ