ئه‌و كورده‌ ك خوه‌ى نيه‌وه‌سێده‌و

شفق نيوز

هێمانيش له‌ لايه‌نه‌يل كوردى ك ديرێم، پاوه‌گه‌زدان يا هه‌ڵوێستێگ رووشن له‌ وه‌رايوه‌ر ئه‌ى گێچه‌ڵه‌يل عيراق و هه‌رێم كوردستان نيه‌و خوه‌يان وه‌ هويچ ئستراتيژى نيشتمانى نه‌وه‌سينه‌سه‌و.

 

كورد ئيرنگه‌ ها له‌ هه‌ستيارترين ده‌م ژيان سياسى خوه‌ى و پسا له‌تێ ژيه‌يدو نه‌وين هه‌ڵويستێ رووشن و ئاشكرا حزبه‌يل كوردى، وه‌ راسى له‌ جى خوه‌ى نيه‌و جى پرسيار كردنه‌!.

عيراق چوى پرۆژه‌ى وه‌ يه‌كه‌ونان ده‌وڵه‌تێ شكست خواردگه‌. جووخ(ته‌مه‌ن) داستان ئه‌ى شكست خواردنه‌، چشتێ نه‌مه‌نيه‌ بڕه‌سيده‌ سه‌ده‌ى و ئيسه‌يش هه‌ر وه‌رده‌وامه‌.

سه‌ره‌تا وڵاته‌يل زووردار فره‌ ته‌قڵا كردن تا هه‌ر جوور بوود ئه‌ى ده‌وڵه‌ته‌ بخنيه‌و سه‌رپا، ئمجا دوياتريش ديكتاتۆرى خوازى له‌ رێ زه‌بروزه‌نگه‌و ترسانن و سه‌ركوت كارى، ئينتماو سه‌ر وه‌ وه‌ته‌ن بوين له‌ ناو رزاره‌يل مه‌ردم و نه‌ته‌وه‌يل عيراق دروس بكا.

رميان ديكتاتۆرو ته‌قڵا ئه‌را سه‌پانن دموكراسى له‌ لاى ئه‌مريكايشه‌و، نه‌تويه‌نست به‌رگ راسگانى ده‌وڵه‌ت‌ بكاده‌ وه‌ر عيراق. چوين ك له‌ بنه‌ڕه‌ته‌و عيراق پرۆژه‌ێگ ده‌سكرده‌و بێڕووحه‌و كاره‌كته‌ره‌يل ئستبداديش له‌ى سه‌رزه‌مينه‌ فره‌ وه‌ هێزو توانان.

ئه‌وه‌گ ئيسه‌ له‌ عيراق حوكم ئه‌كاو سه‌رچه‌وه‌ى گرفته‌يله‌، جوورێگ له‌ نيشاندان ناشرينترين شێوازه‌يل حوكمڕانى و ده‌روازه‌ى ئه‌را فاشيزم و مليتاريزم له‌ فره‌مانڕه‌واييه‌‌.

شايه‌د يه‌ ئه‌و په‌ڕ ساده‌بينى بوود ك هيواو ئاوه‌ختيمان له‌ بان ته‌وافوق و پارسانه‌يل هێزو پابه‌ندبوين وه‌ ده‌ستوور بچنيمن. چوين ك له‌ دوياى رميان رژيم ته‌مام رێ چاره‌يل سياسى و ده‌ستوورى دپيه‌كه‌و كريان و ئه‌نجامگيش له‌ليان وه‌ ده‌س نات.

ئيرنگه‌ له‌ مه‌يدان سياسى عيراق، نه‌به‌رد ئه‌را مه‌نن و نه‌مه‌نن به‌رقه‌راره‌. سه‌ركه‌فتن هه‌ركاميان وه‌ ماناى نه‌مه‌نن ئه‌وكه‌گه‌ ئه‌ياد.

هه‌ ئه‌را يه هه‌رسێ لايه‌ن سه‌ره‌كى ئه‌را يه‌گ له‌ى جه‌نگه‌ سه‌ربكه‌فن، له‌ وه‌ كارهاوردن هويچ كارتێ ده‌س ناخانه‌ لاو دويريش نيه‌ وه‌ره‌ شه‌ڕيش بچن!.

هێمان مه‌رجه‌عييه‌ت شيعه‌ له‌ باوه‌ت ئه‌ى په‌ريشانى سياسى و له‌يه‌كترازن ناوماڵ شيعه‌ بێده‌نگه‌، وه‌لى هناى كار ره‌سيه‌ وه‌رگرى كردن له‌ بانده‌س بوين و مه‌نن شيعه‌، ئه‌و وه‌خت چوين ئاخرين كارته‌ تا بووده‌ مه‌مه‌رێ ئه‌را يه‌كه‌وگرتن شيعه‌.

مه‌سه‌له‌ى كه‌ركوك و پاراستن يه‌كيه‌تى خاك عيراق و ئه‌جێنداى ده‌ره‌كى، ئه‌و باوه‌ته‌يلێگن ك سونى وه‌ل يه‌كا كۆوه‌و كرديه‌و شايه‌ديش له‌ بڕێ هاڵه‌تيش خاڵ هاوبه‌ش ناونى شيعه‌و سونيش بوون. له‌ ئيچنه‌ هاڵه‌تێگ ته‌رازوى هێز له‌ به‌رژه‌وه‌ندى كورد نيه‌.

وه‌ هێزترين خاڵ كورد له‌ مامڵه‌ كردن وه‌ل ئه‌ى قه‌يرانه‌، يه‌كگرتێ بوين گوفتار سياسى و  پشتى كردن له‌ سه‌رۆك هه‌ريم له‌ باوه‌ته‌يل سيادى و جوهه‌رييه‌.

چوين ك كۆمه‌ێگ خاڵ هاوبه‌ش شيعه‌و سونى له‌ ده‌ور يه‌كتر كۆوه‌و ئه‌كا، ئيچنه‌يشه‌ هه‌وه‌وجه‌ هه‌سه‌ به‌رژه‌وه‌نديه‌يل نه‌ته‌وه‌يى، لايه‌نه‌يل كورد بوه‌سيده‌ يه‌كه‌و. پشتێوانى كردن له‌ سه‌رۆك هه‌رێم كوردستان له‌ وه‌رايوه‌ر ده‌يشت ‌كوردستان، بايه‌د بووده‌ ئه‌وله‌ويه‌ت سياسى حزبه‌يل كوردى نه‌ خوه‌ى له‌لێ ئه‌و لادان و خويه‌و‌دزين له‌ پابه‌ند بوين نه‌ته‌وه‌يى.

هه‌وه‌جه‌يه‌، حزبه‌يل كوردى به‌هاى ئه‌ى ده‌قه‌يله‌ بزانن و نه‌كه‌نه‌ى قوراوانى دپيه‌كه‌و كردن. چوين ك ده‌قه‌ى يه‌كلاوبوينه‌يل ها له‌ وه‌رده‌م و مه‌ردم كورديش وه‌ هويچ شێوه‌ێگ وه‌ر دووباره‌و بوين مێژوو و غه‌ڵه‌تيه‌يل نيه‌گرن./ش

زكــرى مـووسـا