ژیان هووز باوه‌

شفق نيوز

 

ئى هووز باوه‌ هه‌رچه‌نى زمسانان له‌ ئاوایه‌یل خوه‌یان نه‌چینه‌سه‌ شوونه‌یل تر، وه‌لى وه‌خاتر وه‌سه‌ربردن گه‌رماى تاوسان و دابینكردن له‌وه‌ڕگا ئه‌را په‌سه‌یلیان به‌شیگ له‌لیان روى كردنه‌سه‌ كویه‌ى شاهۆ و ناوچه‌یل سه‌ریاس و ده‌ورگرد ناوچه‌ى پاوه‌و به‌شیگیانیش چینه‌ وه‌ره‌و"ته‌په‌ڕه‌ش زه‌هاو، باخ سه‌یخان، مله‌ى سه‌رته‌ك، خه‌ركنێ و چواركڵاو".

بیجگه‌ ئه‌وه‌یش چه‌ن خیزانیگیش له‌لیان له‌ ناوچه‌ى ده‌روه‌ن ده‌هووڵ ژیه‌ن له‌نزیك قه‌سر شرین، ك ئویشنه‌پیان بنه‌ماڵه‌ى عه‌بدوڵڵا خدر دو تۆیى.

هووز باوه‌ پیكهاتنه‌ له‌ چه‌ن بنه‌ماڵه‌یگ جوور" بابایى، قازى، ئه‌ڵماسى، جه‌مشیرى، باوه‌لێ، داودى، قویخا فه‌تاح، نه‌ویجانى، وارانى ، قادرى و جه‌لیله‌". ئمجا ئه‌یانه‌ بڕیگ ئوساى سه‌رڕشته‌كار و ده‌سڕه‌نگین داشتنه‌ له‌ بوار دروسكردن ده‌سهاڕ و ئاسیاو و كه‌ره‌سه‌و هه‌وه‌جه‌يل تر. جیا له‌وه‌یش گرینگى فره‌یگیش دانه‌سه‌ كاره‌يل ره‌سین و چنین و چشته‌یل تر ده‌سكرد و له‌ هه‌مان وه‌خت شاره‌زایى خاسیگیش داشتنه‌ له‌ دروسكردن قالى كوردى و جووره‌يلی.

ئمجا ئى هووزه‌ گشت وه‌ختیگ وه‌ل كیشه‌ى ره‌واى ملله‌ت كورد بوینه‌و له‌ شووڕش تازه‌ى كوردیش نه‌خش مه‌ردانه‌یگ داشتنه‌، ك وه‌رده‌وام ناوچه‌گه‌یان شوون وچانداین پێشمه‌رگه‌یل بویه‌، ك یه‌یش خزمه‌ت فریه‌یگ داشتگه‌ ئه‌را شووڕش و هه‌ر وه‌و خاتریشه‌ یه‌كه‌مین ناوچه‌یگيش بویه‌ ك كه‌فته‌سه‌ وه‌ر په‌لامار رژيم سته‌مكار به‌عس له‌وه‌خت جیوازكردن ئاوايه‌يل كوردنشين ئه‌را شوونه‌يل تر، ك هه‌ر له‌وه‌ر ئه‌وه‌يش مه‌ردمه‌گه‌ى له‌ ئۆردگاى زووره‌ملى"زه‌ڕایه‌ن" نیشته‌جى كریان‌.

ره‌نجده‌ر ئاواره‌

ج . أ