نه‌خش ده‌زگاى بڵاوه‌وكردن كوردى

شفق نيوز

فره‌یگ له‌ ده‌زگایه‌یل بڵاوه‌وكردن و چاپ و ئه‌ڵه‌وگه‌ردانن له‌وه‌ر خاتر سازكردن فره‌یگ له‌ نمایشگاى كتاو له‌ناو هه‌رێم كوردستان و ده‌یشت هه‌رێم، ك وه‌گشت باوه‌ڕیگه‌وه‌ ئى جووره‌ نمایشگایگ جویر دیارده‌یگ رووشنهویریه‌و ئومید وه‌رفراوانیگ  دیریگ له‌وه‌ر خاتر بڵاوه‌وكردن هوشیارى جویر ئه‌وه‌ك هووكاریگ  مه‌یلكیش هاووڵاتیه‌یل و هانداینیان بووگ ئه‌را كتاوه‌یل و گووڤار و چشته‌یل تر چاپه‌مه‌نى. ئمجا ئى جووره‌ جموجویلیگیش بایه‌سه‌ بووگه‌ هووكار ئاماده‌یى ملله‌ت كورد له‌لایه‌ن رووشنهویریه‌وه‌ تا قه‌ره‌بوو ئه‌و ساڵه‌یل بیبه‌شیه‌ بكا ك له‌ده‌س نه‌وه‌یل یه‌ك له‌شوون چى، ك كورد هس وه‌ وسیان رووشنهویرى و سه‌ختى هویر كردیاگ، ئه‌ویش له‌وه‌ر ئه‌وه‌ك وه‌ زه‌حمه‌ت و سته‌م مه‌گه‌ر كتاوه‌یلیگ نه‌فدار په‌روه‌رده‌یى و كوومه‌ڵایه‌تى و سیاسى و زانستى و جووره‌یل تر ماریفه‌تى بكه‌فتیاگه‌ ده‌سیان، چوینكه‌ حكوومه‌ته‌یل یه‌ك له‌شوون یه‌ك وه‌رین گشت ئه‌و چاپه‌مه‌نیه‌یله‌ شاردیاگه‌وه‌ له‌ هاووڵاتیه‌یل ك جویر هووكار كارایگ بوین ئه‌را گه‌شه‌كردن هوشیارى و ئاست رووشنهویرى وه‌گشت شیوه‌یگه‌وه‌و له‌جیاى ئه‌وانه‌یش كتاوه‌یل شۆڤێنى په‌خشه‌و كردیاگ دویر له‌ باوه‌ته‌یل ئازادى و دیموكراسى.

وه‌لى له‌شوون قورتاربوین له‌ وه‌زعه‌یل ناخوه‌ش و شكانن وه‌ربه‌سه‌یل و نه‌مه‌ندن حوكم دكتاتۆریه‌ت و هه‌ناسه‌داین ملله‌ت ئازاد، دى ئه‌و دامه‌زریاگ و ده‌زگایه‌یل بڵاوه‌وكردنه‌ له‌ هه‌رێم ده‌ركه‌فت و هه‌ڵه‌په‌ڵه‌ ده‌سكرده‌ چاپكردن فره‌یگ له‌و كتاوه‌یله‌ ك تا دویه‌كه‌ قه‌یه‌غه‌ كریاویگ  له‌لایه‌ن رژیم سته‌مكار رمیاگه‌وه‌، ئمجا له‌ناونى ئه‌و دامه‌زریاگ و ده‌زگایه‌یل بڵاوه‌وكردنه‌ ده‌زگاى ئاراس بوى ك ئیسه‌ وه‌ڕیه‌وبه‌ره‌گه‌ى (به‌دران ئه‌حمه‌د حه‌بیب)ه‌و خاوه‌ن خاسى گه‌ورایگه‌ له‌ وه‌كارخستن ئه‌و پشتگیریه‌ ك حكوومه‌ت هه‌رێم كوردستان پیشكه‌شى كرده‌ ئى ده‌زگا. وه‌ل ئه‌وه‌یشا ده‌زگاو دامه‌زریاگه‌یل تر له‌ هه‌رێم كوردستان وجوود دیرن جویر ده‌زگاى گه‌لاوێژ و ده‌زگاى به‌درخان ك له‌لایه‌ن هه‌رێمه‌وه‌ پشتگیرى له‌لیان كریه‌یگ وه‌ تایبه‌ت سه‌ركردایه‌تى كوردستانى وه‌بى وه‌رانوه‌ر له‌ گشت باوه‌ڕیگه‌وه‌ له‌وه‌ر خاتر ئه‌وه‌ك ملله‌ت كوردستان هه‌وه‌جه‌ وه‌ رووشنهویرى و خوه‌ندنه‌وه‌و هوشیارى دیرن.

بیگومان ئه‌و ده‌زگایه‌یلیشه‌ ده‌سكردنه‌ سازكردن نمایشگایه‌یل فره‌یگ كتاوه‌یل بیجگه‌ بڵاوه‌وكردن و چاپكردنى و ئاسانه‌وكردن فرووشتنى له‌ڕوى ئه‌رزانى تا بووگه‌ هانداین مه‌ردم ئه‌را سه‌ندنى و بووگه‌ مایه‌ى بڵاوه‌وكردن رووشنهویرى له‌ناونیان و پڕه‌وكردن هه‌وه‌جه‌یلیان.

ده‌زگاى ئاراس یه‌كیگه‌ له‌ ده‌زگایه‌یل گه‌وراى په‌خش و چاپه‌مه‌نى و خاوه‌ن ناو خاسیگه‌و چاپه‌مه‌نیه‌یلى جوان و پاك و سه‌ده‌ها كتاوه‌یل عه‌ره‌بى و بڕیگ كتاوه‌یل تر وه‌ زووانه‌یل تریش په‌خش و چاپ كردگه‌. ئى ده‌زگا دیارى یا جایزه‌ى ساڵانه‌ دیریگ وه‌ناو دیارى(ئاراس)، ك ئه‌یه‌ دو ساڵه‌ له‌بان یه‌ك وه‌رده‌وامه‌و دریه‌یگه‌ په‌نج داهینه‌ركار یا موبدع كورد له‌وانه‌ك خزمه‌ت رووشنهویرى ملله‌ت كردنه‌و كتاوه‌یلیان له‌ ده‌زگاى ئاراس چاپكریاگه‌ وه‌ پشتگیرى حكوومه‌ت هه‌رێم كوردستان. بیجگه‌ ئه‌وه‌یش ئى ده‌زگا چه‌نه‌ها فیستیڤاڵه‌یل گه‌وراى رووشنهویرى ساز كردگه‌و له‌وانه‌یش فیستیڤاڵ (مه‌ستوره‌)ى ئه‌رده‌ڵانى ك شایه‌ت یه‌كه‌مین تاریخنویس بووگ له‌جه‌هان ك وه‌رجه‌ دو سه‌ده‌ تاریخ نویساگه‌و ئیسه‌یش گشت كتاوه‌یلى دوباره‌ چاپ كریانه‌وه‌ له‌ڕى ده‌زگاى (ئاراس)ه‌وه‌.