مقه‌یه‌ت ده‌سكه‌فته‌یل ملله‌ت كوردستان بوون

شفق نيوز

كویچه‌و شاره‌یل كوردستانى، خوه‌ر ئازادى له‌ كوردستان هه‌ڵهات و مه‌ردم هه‌ناسه‌ى خوه‌شى هه‌ڵمژین و ڕویكردنه‌ كاروان بنیاتناین و چه‌سپانن بنیات سیاسى له‌بان بنه‌ماى ژیارى پیشكه‌فتگ، ك به‌ره‌گه‌ى له‌ گه‌شه‌كردن فراوانیگه‌وه‌ ده‌ركه‌فت تا ڕه‌سیه‌ ئه‌وه‌ك كوردستان له‌و ماوه‌ تا ئیسه‌ له‌چه‌و هه‌رێمه‌یل تر له‌ تاریخ ملله‌ته‌یل فره‌ خاستر و ئاوه‌دانتره‌، یه‌یش شانازییگه‌ ئه‌را كورد وه‌تایبه‌ت و ئه‌را گشت عراقیه‌یل وه‌گشتى.

ئى په‌ره‌سه‌ندن و پیشكه‌فتنه‌ له‌ڕوى ئاسایشه‌وه‌، ئه‌را كه‌سه‌یلیگ نیه‌ت پیس له‌ناو و ده‌یشت كوردستان خوه‌ش نیه‌، هه‌ر له‌وه‌ر ئه‌وه‌یش دویر نیه‌ ئه‌و نه‌خوه‌شیه‌ په‌خش بكه‌ن له‌ناونى ڕوڵه‌یل كوردستان وه‌گووره‌ى ئه‌وه‌ك هه‌وڵ به‌یگ ئه‌و فتنه‌ى سیاسى بكاڵیگ له‌ناونى ئه‌و قه‌واره‌یله‌ ك تا دویه‌كه‌ گشتیان له‌ یه‌ك سه‌نگه‌ر بوین له‌ ڕووژگار شووڕش رزگاریخواز و سینگیان قه‌ڵغان ئاگر دوشمن بوى تا خوینیان تیكه‌ڵ بووگ و بڕشیه‌یگه‌ یه‌ك چه‌م له‌وه‌ر خاتر ئاوداین دار ئازادى.

جى داخه‌ ئمڕوو ئه‌وانه‌ سه‌نگه‌ر له‌ یه‌كترى بگرن و بڕیگ له‌لیان هه‌وڵ ئه‌وه‌ بیه‌ن روى كه‌وان بكه‌ن سینگ بڕیگ تر و گشت ئه‌و به‌ڵگه‌و یادگاریه‌یل جارانه‌ بخه‌نه‌ كنار. نیشانداین ناڕه‌زایه‌تى و جیاوازى له‌ڕاده‌رخستن، كاریگ ئاساییه‌و یه‌كیگه‌ له‌بنه‌ماى په‌ره‌سه‌ندن و پیشكه‌فتن، وه‌لى وه‌ مه‌رجیگ ئه‌و مه‌سه‌له‌ ئاڵشت نه‌وگ ئه‌را ویرانكردن دارایى گشتى و كوشتن هاووڵاتیه‌یل، ئى كاره‌یلیشه‌ نه‌ك هه‌ر ته‌نیا كاولكارى، به‌ڵكوو ئامانجیش له‌لى ئه‌وه‌سه‌ كوردستان بووه‌نه‌وه‌ ئه‌را چوارگووشه‌ى یه‌كم و مه‌سه‌له‌ى براكوشى و گله‌وخواردنه‌ ئه‌را ئاسایشه‌ قرمزه‌گه‌ دویاى ئه‌وه‌ك ملله‌ت كورد فڕه‌ ده‌نه‌ ناو زبڵدان تاریخه‌وه‌. ئنجا وه‌هه‌ل زانین خودنشانداین ئاشتیانه‌ ئه‌را داناین پلان گومانلیكریاگ خیانه‌تیگه‌ وه‌ هه‌ق ملله‌ت كوردستان و ئه‌و ده‌سكه‌فته‌یلیه‌ ك وه‌ خوین ڕوڵه‌یلى هاته‌سه‌ ده‌س و ئاقبه‌ت خراویگ له‌لى كه‌فیگه‌وه‌و یه‌كسه‌ره‌ كاریگه‌رى دیریگ له‌بان وه‌زع ئاسایش و دویاخریش بووگه‌ مایه‌ى خودكیشاننه‌وه‌ى سه‌رمایه‌داره‌یل بیگانه‌ و دویاكه‌فتن و په‌ككه‌فتن په‌ره‌سه‌ندن.

كه‌س ئنكار ئه‌وه‌ ناكا ك ناكوكیه‌یل جیاوازیگ له‌ هه‌رێم هه‌س، وه‌تایبه‌ت ئه‌گه‌ر ته‌ماشاى ئه‌و وه‌زع ناخوه‌ش كوردستانه‌ بكردایم ك ساڵه‌یل گوزه‌یشت وه‌پیا گوزه‌ر كرد، هویچ وه‌ختى نه‌بایه‌د له‌هه‌ڵكه‌فت یا واقع بهه‌یوایم و گشت ناكوكیه‌یلیگ چاره‌سه‌ر بكریه‌یگ و گشت ناهه‌قییگ بخریه‌یگه‌ كنار، هه‌ر له‌وه‌ر ئه‌وه‌یش بایه‌سه‌ له‌بان گشت قه‌واره‌یل سیاسى گله‌و بخوه‌ن ئه‌را حوكم ئه‌قڵ له‌ خوه‌ندنه‌وه‌ى وه‌زعه‌گه‌و نه‌بایه‌د به‌راورد یا مقارنه‌ى وه‌زع كوردستان وه‌ مسر یا تونس و ئه‌و وڵاته‌یله‌ ك گرفتارن وه‌ده‌س دكتاتۆریه‌ت بكریه‌یگ، چونكه‌ ئه‌و ده‌وڵه‌ته‌یل خاوه‌ن رژیم سته‌مكاریه‌ ئه‌را ماوه‌ى دویرو دریژیگ وه‌ئاگر و ئاسن حوكم ملله‌ته‌یلیان كردنه‌، وه‌لى كوردستان سستمیگ دیموكراسى په‌رله‌مانیه‌و له‌گشت قه‌واره‌و لایه‌نه‌یلیگ گرته‌سه‌ خوه‌ى و نوێنه‌رایه‌تى گشت چین و دین و مه‌زه‌وه‌یل وه‌بى جیاوازى له‌تى ڕه‌نگه‌وداگه‌و گشت بڕیاره‌یلیش وه‌ زوورمى ده‌نگ ده‌رچووگ، بیجگه‌ ئه‌وه‌یش ده‌ستووریگ هه‌س گشت ملله‌ت كوردستان ده‌نگ ئه‌ڕاى دان و هه‌ق گشت كه‌سیگ له‌تى دیاره‌، له‌وه‌ر ئه‌وه‌ هه‌ر ویرانكارى و مقه‌یه‌تى نه‌كردن له‌ ده‌سكه‌فته‌یل ملله‌ت كورد خیانه‌ت تاریخییگه‌و كه‌س له‌لى خوه‌ش نیه‌وگ.

 

فه‌ره‌یدون كه‌ریم مه‌لك