ده‌ستوور و یاسا له‌ عراق جوانه‌مه‌رگ بوینه‌!

شفق نيوز

بكه‌فنه‌ بار ئازادى و هه‌ڵوژاردن ئازاد، هه‌میشه‌ وه‌ دریژایى زیاتر له‌ 35 ساڵ ملله‌ت عراق وه‌ كورد و عه‌ره‌ب و توركمان و كلدو ئاشوورى و كه‌مینه‌یل تر له‌ناو مه‌رگه‌سات و ژیانیگ پڕ له‌ ترس و له‌رز رووژگار بردیانه‌ سه‌ر، وه‌لى دویاى رمیان رژیم به‌عس و په‌یابوین نه‌خش ئۆپۆزسیۆنه‌یل عراق  و هاتن هیزه‌یل ئه‌مریكا ئه‌را ناوچه‌گه‌، سه‌ره‌تا دڵنیایى فره‌یگ به‌خشا مه‌ردم وه‌گشتى، هه‌ر له‌وه‌ر ئه‌وه‌یش وه‌ ره‌زامه‌نى زیاتر له‌ 85% ملله‌ت عراق ده‌ستوور تازه‌ى هه‌میشه‌یى دانریاو حوكم دیموكراسیه‌ت هاته‌ بان ته‌خت ده‌سڵات له‌بان ئه‌و بنه‌ما ك عراقیگ یه‌كێتى فیدراڵى فره‌لایه‌نى بوود و گشت هیزو لایه‌نه‌یل له‌تى به‌شدار بوون و حوكم ملله‌ت له‌تى په‌سه‌ن بكریه‌ید.

 

ساڵ 2005 سه‌ره‌تاى سه‌ركه‌فتگیگ بوى له‌وه‌ختیگ یه‌كه‌م هه‌ڵوژاردن ئه‌نجام دریاو زوورم خه‌ڵك عراق وه‌ ژن و پیاگ و جایه‌ڵ جوانه‌یله‌و له‌بان خواست و ئاره‌زوو خوه‌یان روى كردنه‌ سه‌ندووقه‌یل ده‌نگداین و نوێنه‌ره‌یل خوه‌یان هه‌ڵوژانن، وه‌لى جى داخه‌ ئه‌و پیشبینیه‌یله‌ ك ملله‌ت داشته‌ى و ئه‌و ئومیدو ئاره‌زووه‌ ك ساڵه‌هاى ساڵه‌ مه‌ردم بیچاره‌ وه‌ ته‌ماى بوین بایده‌ دى، هیمان هه‌ر وه‌و ژان و زه‌خمه‌و مه‌ندگه‌و  ساڕیژ نه‌كریاگه‌.

 

قه‌یرانه‌یل عراق هه‌میشه‌ یه‌ك له‌شوون یه‌كه‌و هویچ بواریگ ئه‌را گونجیان و ره‌سینه‌وه‌و دانیشتن و گفتوگوو نه‌یشتنه‌سه‌و، جه‌نگ ده‌سڵات و به‌رژه‌وه‌ندى خودى و حزبى كاولكارى فره‌یگ هاورده‌سه‌ وجوود، ته‌قینه‌وه‌و رویداگه‌یل رووژانه‌ له‌لایه‌ن ریكخریاگ قاعیده‌و پاشمه‌نده‌ى به‌عس ئاسایش و سه‌قامگیرى له‌ عراق مه‌حاڵ كردنه‌و ده‌وڵه‌تیش له‌وه‌ر ئه‌وه‌ك سه‌رقاڵه‌ فه‌وتانن دارایى ملله‌ت و دروسكردن قه‌یران زیاتر  وه‌ل هیزه‌ و لایه‌نه‌یل تر، دى تواناى كۆنترۆڵكردن ئى بار سه‌خته‌ له‌ده‌س داگه‌و هه‌ر ها فكر عرووبه‌گه‌ى جاران و داگیركردنه‌گه‌ى ئه‌وساى سه‌رده‌م رژیم به‌عس و نیه‌زانیم چاره‌سه‌ر ئى قه‌یران سه‌خته‌ چه‌س؟

 

پرووسه‌ى سیاسى ره‌سیه‌سه‌ ئه‌و راده‌ ك هویچ بنه‌مایگ راسى وه‌پیه‌و نه‌مه‌ندگه‌و جى متمانه‌ نیه‌ له‌لاى زوورم خه‌ڵك عراق، یه‌یش ماناى ئه‌وه‌سه‌ كیشمه‌كیش سیاسى هه‌ر وه‌رده‌وامه‌و زه‌ره‌دمه‌ن یه‌كه‌میش له‌ى رویه‌و ته‌نیا ملله‌ته‌ ك ساڵه‌یلیگه‌ چه‌وه‌ڕى ئاسووده‌یى و ئاسایش و به‌خته‌وه‌رى كه‌ن، وه‌لى دیاره‌ حوكم و ئیراده‌ى ملله‌ت یه‌خسیر ده‌س حوكم ته‌كڕه‌وى و ته‌كلایه‌نیه‌و به‌رنامه‌یگ په‌سه‌ن و گونجیاگ له‌ وجوود نیه‌ ئه‌را پشت به‌سانن وه‌ بنه‌ماى ده‌ستوورى و جیوه‌جیكردن یاسا، ئنجا یاسایش له‌گشت وه‌ختیگ سه‌روه‌ر و باڵاترین ده‌سڵاته‌، وه‌لى هیمان كه‌مترین به‌شیگیش له‌لى په‌یڕه‌و نه‌كریاگه‌و مه‌حاڵیشه‌ په‌یڕه‌و بكریه‌ید، ئه‌وه‌سه‌ یاساو ده‌ستووریش جوانه‌مه‌رگ بوینه‌و هه‌ق پیكهاته‌و مه‌ردم فه‌قیریش ژیرپا بوودو زوڵم و قه‌یرانیش هه‌ر وه‌رده‌وامه‌.

 

جه‌ماڵ ئه‌ركه‌وازى