عبدالكریم زیدان فه‌تواى حه‌رامكردن فیدرالى ده‌ید

شفق نيوز

دامه‌زرانن هه‌رێم ئه‌نبارن، وه‌لى عبدالكریم زیدان ئه‌میندار گشتى زانایه‌یل مسڵمان فه‌توایگ ده‌ركرد وه‌ حه‌رامكردن دامه‌زرانن هه‌ر فیدرالییگ و وسیان دژ وه‌ هه‌ركه‌سى داواى فیدرالى كه‌ید... په‌رله‌مانتار صباح محمد نجیب ئه‌ندام لوجنه‌ى ئه‌وقاف له‌ په‌رله‌مان كوردستان له‌ په‌یوه‌ندییگى وه‌ل ماڵپه‌ڕ شه‌فه‌ق له‌ى باوه‌ته‌ ئویشید:"من هیمان خه‌وه‌رم له‌ى فه‌توا نیه‌، وه‌لى له‌ راى خوه‌م فیدرالى له‌ شیوه‌ ئسلامیه‌گه‌ى وه‌چه‌واشه‌ى شه‌رع نیه‌، چوینكه‌ موسڵمانه‌یل وه‌ دریژى تاریخ ئیجووره‌ شیوه‌یگ ئیداره‌ى وڵات و ئیداره‌ى حوكم و وه‌ سسته‌م ویلایات وه‌كارهاوردیان وه‌گووره‌ى سسته‌م خلافه‌ت ئسلامى، یه‌یشه‌ جووریگه‌ له‌ فیدرالى چوینكه‌ هه‌ر ملله‌تیگ له‌ ملله‌ته‌یل هه‌ق خوه‌یه‌ ئیداره‌ى خوه‌ى بكه‌ید نه‌ك له‌ ژیر حوكم مه‌ردمیگ تر بوون وه‌ هه‌ر مه‌هانه‌یگ".

زیاتریش وت ك :"ئه‌گه‌ر ڕاسه‌ زیدان ئى فه‌توا دایه‌ یا هه‌ركه‌سى ئیجووره‌ فه‌توایگ بیه‌ید؛ ڕه‌ته‌وكریه‌ید چوینكه‌ نه‌ وه‌ل بنه‌مایه‌یل دادپه‌روه‌رى و یه‌كسانى گونجیه‌ید و نه‌یش وه‌ل بنه‌ماى شوورا؛ و هویچ تاوانیگ وهویچ سزایگ نیه‌ وه‌بى وجوود ده‌قیگ دینى و مادام هویچ ده‌قیگ دینى نیه‌ ئه‌وه‌ حه‌رام كردوید ك هه‌ر ملله‌تیگ هه‌قه‌یل سیاسى و ده‌ستوورى خوه‌ى داشتوود ، ئى فه‌توا ڕه‌ته‌وكریه‌ید".

ئاماژه‌یش وه‌وه‌دا ك :" ڕاسییگ نه‌گۆڕ هه‌س ئویشید:هویچ ملله‌تیگ منا نیكریه‌ید شیوه‌ى په‌یوه‌ندیى وه‌ل ئه‌و ده‌وڵه‌ته‌و ك له‌تى ژیه‌ید  هه‌ڵوژنید،و ملله‌ت كوردیش له‌ كوردستان عیراق ئه‌وه‌ هه‌ڵوژان ك وه‌ل برایه‌یل عه‌ره‌بیه‌و له‌ چوارچیوه‌ى سستمیگ فیدرالى یه‌كگرتى بژیه‌ید و یه‌یشه‌ شیوه‌یگ ئیداریه‌ ك وه‌ل بنه‌ماى دادپه‌روه‌رى و یه‌كسانى و بنه‌ماى شوورا و ئه‌و بنه‌مایه‌یل ئسلامیه‌و گونجیه‌ید".

له‌ كووتایى قسه‌گانى جه‌خت كرد له‌بان سسته‌م فیدرالى و ڕه‌ته‌وكردن تابعیه‌ت و وصایه‌ت و خواردن هه‌ق مه‌ردم وه‌ مه‌هانه‌ى شه‌رعى.

نوێنه‌ر محمود الصمیدعى جیگر سه‌رۆك وه‌قف سوننى له‌ په‌یوه‌ندییگ ته‌له‌فۆنى وه‌ل ماڵپه‌ڕ شه‌فه‌ق له‌ى باوه‌ته‌ ئویشى:"من وه‌ل مه‌سه‌له‌ى فیدرالیه‌و نیم و لایه‌نگر ئه‌و ده‌نگه‌یله‌ نیم ك توان هه‌رێمیگ فیدرالى له‌ ناوڕاس و یه‌كیگتر له‌ باشوور و له‌ ئه‌نبار و یه‌كیگتر له‌ باكوور دروس بكه‌ن ك وه‌سه‌ره‌تایگ ئه‌را به‌شبه‌شه‌وكردن عیراق زانمه‌ى، وه‌لى له‌هه‌مان وه‌خت من دژ فه‌تواى كوشتن داواكه‌ره‌یل فیدرالییم، چوینكه‌ ئیمه‌ تویه‌نیمن وه‌شیوه‌یلیگتر مه‌ردم قانع بكه‌یمن، نه‌ك وه‌ كوشتن، چوینكه‌ فه‌توا بایه‌ته‌ ڕاسه‌و بكه‌ید له‌ جیاتى ئه‌وه‌ ك بكوشید و بایه‌ته‌ ئه‌وانه‌گ فیدرالى توان، حالى بكریه‌ن ك عیراق یه‌كیگه‌ و ملله‌ته‌گه‌یشى یه‌كیگه‌ و ئى وڵاته‌ وه‌ گشت تاریخ و مه‌ردم و خاكیه‌وه‌ نه‌بایه‌د به‌شبه‌شه‌وبوود و ئیمه‌ بایه‌ته‌ په‌نا بووه‌یمنه‌ زووان له‌یه‌كحالى بوین".

نوێنه‌ر ته‌لال زۆبه‌عى وه‌یه‌كجارى مه‌سه‌له‌ى فیدرالى ڕه‌ته‌وكه‌ید و وه‌ به‌شبه‌شه‌وكردن وڵات شماره‌ى كرد و وه‌په‌تایگ شماره‌ى كرد ك تواید به‌ده‌ن عیراقیه‌یل داڕزنید، وداوایشكرد باس مه‌سه‌له‌ى دووسه‌وبوین بكریه‌ید چوینكه‌ بایه‌ته‌ ملله‌ته‌گه‌مان یه‌كگرتى بوود دویر له‌ به‌شبه‌شه‌و بوین و ئه‌وه‌یشه‌ ڕه‌ته‌وكرد ك فیدرالى له‌ عیراق وه‌ل ئمارات و ئه‌مریكا به‌راورد بكریه‌ید؛ چوینكه‌ ناوچه‌یل عیراق جیاجیان و فیدرالى ده‌رانه‌یگه‌ ئه‌را به‌شبه‌شه‌وكردن تایه‌فى نه‌ك فیدرالیه‌ت ئیدارى و یه‌یشه‌ گشتى هاله‌ به‌رژه‌وه‌ندى ئه‌مریكیه‌یل یا هاله‌ به‌رژه‌وه‌ندى ئه‌و كه‌سه‌یله‌ ك توان عیراق بووده‌ وڵاتیگ كز و لاواز چوینكه‌ هێز و قه‌وه‌ت عیراق هاله‌ یه‌كه‌وگرتنى.