عراق .. ناكووكيه‌يل سياسی

شفق نيوز

شوونيگ دونيا ئی جووره‌ نموونه‌يگ نه‌كه‌فيگه‌ وه‌رچه‌و ، وه‌لی گويڕانكاريه‌يل چه‌ن مانگيگ وه‌رجه‌ ئيسه‌ په‌رده‌ له‌بان ئه‌و راسيه‌ لاورد ك له‌ناو ستوينه‌يل سه‌ره‌كی ده‌سڵات سياسی له‌عراق كه‌لين خه‌ته‌رناك ديريگ و ئاست هاوكاری و هه‌وڵداين ئه‌را گوزارش يا ته‌عبيركردن له‌ستراتيجيه‌تيگ يه‌كگرتگ نيشتمانی هيمان وه‌و راده‌ نه‌ڕه‌سی ، نه‌ك له‌ناونی حكوومه‌ت و گرووپ و پارته‌يل چه‌كدار و معارزه‌يل ، به‌ڵكوو له‌ناو خود ئه‌نجوومه‌ن سه‌رووكايه‌تی كوومار و ، وه‌زيره‌يل و نوێنه‌ره‌يليش كاريگ له‌يوا كردگه‌ ك وه‌رده‌وام پرووسه‌ی سياسی له‌عراق له‌وه‌رده‌م هه‌ڕه‌شه‌ بووگ و پيكهاته‌يليش تويش گرفت و كيشه‌ بان .

له‌يرا ئويشيم ئايا له‌كام وڵاته‌يل دونيا له‌به‌رزترين پله‌ی ده‌سڵات ، دو جووره‌ هه‌ڵويست جياواز و دژ يه‌كتر كريه‌يگه‌ دی له‌باوه‌ت مه‌سه‌له‌يل ستراتيجی و نازگ ، وه‌لی ئه‌وه‌سه‌ كه‌مترين پرس وڕا له‌ناونی هه‌ردوگ ئه‌نجوومه‌ن سه‌رووكايه‌تی كوومار و خود سه‌رووك ئه‌نجوومه‌ن وه‌زيره‌يل نيه‌و شيويان په‌يوه‌نديه‌يل ناونی به‌غداو ديمه‌شق يه‌كيگه‌ له‌و ئشاره‌ته‌يله‌ ك وجوود دو ئاواز و دو هويره‌وكردن جياواز له‌ناوچه‌ی سه‌وز(الخضراء) وه‌رجه‌سه‌ ئه‌كا ، سه‌رووكايه‌تی ئه‌نجوومه‌ن وه‌زيره‌يل له‌ژير فشار ته‌قينه‌وه‌يل وه‌رده‌م وزاره‌ت خارجيه‌و دفاع و ده‌سكه‌فتن چه‌ن به‌ڵگه‌يگ له‌بان ده‌سوه‌رداين سووريا ئه‌وه‌ بوی قه‌يران گه‌ورايگ دروسكرد له‌وه‌ختيگ ك سه‌رووكايه‌تی كوومار و سه‌رووكايه‌تی ئه‌نجوومه‌ن نوێنه‌ره‌يل و فره‌يگ له‌پيكهاته‌يل گه‌وراو كاريگه‌ر ناو حكوومه‌ت و په‌رله‌مان عراقی وه‌ل ئه‌و كاردانه‌وه‌ی تون سه‌رووك ئه‌نجوومه‌ن وه‌زيره‌يلا نه‌وين و تائيسه‌يش ئه‌و مه‌سه‌له‌ له‌ناونی هه‌ردوگ سه‌رووكايه‌تی كوومارو سه‌رووكايه‌تی وه‌زيره‌يل ديد هاوبه‌شيگ له‌باوه‌تيانه‌وه‌ دروس نه‌ويه‌ ك گوزارش يا ته‌عبير بكا له‌هه‌ڵويست راسه‌قينه‌ی عراقيه‌يل له‌باوه‌ت چوينيه‌تی روی وه‌ڕوی بوينه‌وه‌ی ده‌سه‌يل ده‌ره‌كی له‌كاروبار ناوخود وڵات .

وه‌ل ئه‌وه‌يشا عه‌لی ده‌باغ قسه‌كه‌ر ره‌سمی حكوومه‌ت عراق له‌ ته‌سريحيگ رووژنامه‌نويسی له‌باوه‌ت دوياكه‌فتن جی وه‌جيكردن حوكم له‌سێداره‌داين تاوانباره‌يل سه‌ران به‌عس و گله‌يی له‌وه‌ كرد جياوازی فره‌يگ هه‌س له‌هه‌ڵويست سه‌رووكايه‌تی كوومارو ئه‌نجوومه‌ن وه‌زيره‌يل و ئه‌و جياوازييشه‌ كاريگه‌ی خراويگ داشتكه‌ له‌بان روخسارو پايه‌ی ده‌وڵه‌ت عراق له‌بان ئاست هه‌ريمايه‌تی و ناوده‌وڵه‌تی . ئمجا ئه‌وه‌ك مايه‌ی سه‌رده‌رنه‌كردنه‌ له‌سايه‌ی وجوود ئه‌نجوومه‌نيگ باڵای سياسی ك له‌تی سه‌رووكايه‌تی هه‌رسێ ئه‌نجوومه‌ن و سه‌رووك قه‌واره‌يل سه‌ره‌كی په‌رله‌مان و سه‌رووك هه‌ريمه‌يل گريگه‌ خوه‌ی بيگومان ئه‌و ئه‌نجوومه‌نه‌ له‌نه‌خشه‌ی سياسی عراق تائيسه‌ ديار نيه‌و شوون خوه‌ی وه‌رنه‌گرتگه‌ . وه‌لی ئه‌و كه‌لينه‌يل گه‌ورا ك له‌ديوار سستم سياسی كريه‌يگه‌ دی وه‌سه‌به‌ب جياوازی فره‌يگه‌وه‌ له‌سياسه‌ت و مه‌زه‌نه‌كردن جياواز ئه‌را به‌رژه‌وه‌نديه‌يل ستراتيجی و حزبی و تايفی بوينه‌سه‌ مايه‌ی خوه‌شكردن زه‌مينه‌ی زياتر ئه‌را كه‌لكردن ئه‌و ديواره‌ ، ئمجا ئه‌و كه‌ليه‌ ك باس له‌لی كه‌يم له‌قه‌يريگ مه‌سه‌له‌ی ناوخوه‌يی هسيار وه‌ك مه‌سه‌له‌ی له‌سێداره‌داين و حوكمداين تاوانباره‌يل وه‌ئاشكرا كريه‌يگه‌ دی له‌ناونی ئه‌نجوومه‌ن سه‌رووكايه‌تی كوومار وه‌ل ئه‌نجوومه‌ن وه‌زيره‌يلا .