حكوومه‌ت هه‌رێم كوردستان و تازه‌گه‌رى ژیارى

شفق نيوز

وه‌رده‌وامیش له‌هه‌رێم ئه‌را ماوه‌ى 22سه‌عات و بیجگه‌ ئه‌وه‌یش سامانه‌یل سروشتى له‌شوون ئه‌وه‌ك ناوچه‌یلیگ له‌هه‌رێم دوینریاوه‌ ك پڕن له‌ى سامانه‌یل سروشتیه‌و هه‌ر یه‌یش له‌یوا كردگه‌ هویر سه‌رمایه‌دارى له‌تى بكریه‌یگ. هه‌ر له‌وه‌ر ئه‌وه‌یش هه‌رێم كوردستان له‌خه‌یاڵ كومپانیایه‌یل سه‌رمایه‌دار بوى و ڕوى له‌هه‌رێم كردن و له‌هه‌مان وه‌خت حكوومه‌ت هه‌رێمیش جواودانه‌وه‌ى خاسیگ نیشانداو گرنگى یائه‌همیه‌ت وه‌ى كومپانیایه‌یله‌ دا. وه‌ل ئه‌وه‌یشا بایه‌سه‌ ئشاره‌ت وه‌ هه‌وڵ و ته‌قلاى حكوومه‌ت فره‌نسى بكه‌یم ك هویر له‌ كلكردن گه‌وراترین شماره‌یگ له‌ كومپانیاى فره‌نسى كرد ئه‌را هه‌رێم. له‌لایگ تریشه‌و بریتانیا هه‌وڵ خاسه‌وكردن په‌یوه‌ندیه‌یلى ده‌یگ وه‌ل هه‌رێم كوردستانا له‌گشت لایه‌نه‌یل سیاسى و ئابوورى و رووشنهویرى. شایه‌ن باسه‌ بریتانیا پله‌ى سێیمه‌ وه‌ نسبه‌ت شماره‌ى ئه‌و كومپانیایه‌یل كاركه‌ره‌ له‌ هه‌رێم، ك ئه‌یانه‌ كار له‌بان وه‌دیكردن و دراوردن نه‌فت و مه‌یدان سه‌رمایه‌گوزارى كه‌ن له‌هه‌رێم كوردستان.

ئیسه‌ هه‌رێم كوردستان 20 قونسوڵخانه‌ى بیگانه‌ له‌تى واز كریاگه‌ بیجگه‌ دو قونسڵخانه‌ى عه‌ره‌بى مسرى و ئوردنى و پیشبینى ئه‌وه‌یش كریه‌یگ قونسڵخانه‌یل عه‌ره‌بى تر له‌وه‌خته‌یل نزیكیگ له‌تى واز بكریه‌یگ . یه‌یش نیشانه‌ى ئه‌وه‌سه‌ ك هه‌رێم روى له‌خاستر كردگه‌ وه‌گووره‌ى گامه‌یل وه‌رفراوان و تازه‌یگ ، هه‌ر له‌وه‌ر ئه‌وه‌یش ئویشیم: حكوومه‌ت هه‌رێم گشت ئى هه‌مگه‌ ئیراده‌ى خاسسازى و په‌ره‌داین و گه‌شه‌كردن و تازه‌گه‌رى ژیاریه‌ دیریگ ، دى ئه‌را ماته‌ڵ خوه‌ى بكا؟

سه‌رۆك هه‌رێم كوردستان مه‌سعود بارزانى دویاى ئه‌وه‌ك له‌بوونه‌یگ په‌یامیگ خوه‌نده‌و ئه‌را ملله‌ت كوردس كوردستان ك له‌تى وت: له‌هه‌رێم ده‌س كریه‌یگه‌ خاسسازى و ئیسه‌یش قوناغ یه‌كه‌مى له‌به‌رنامه‌ى خاسسازى ته‌واو بویه‌و له‌هه‌مان وه‌خت هه‌رێم كوردستان به‌رنامه‌و نه‌خشه‌یل سه‌رده‌میانه‌ وه‌خوه‌یه‌و دوینیگ له‌وه‌ر خاتر په‌ره‌داین وه‌ كار و چالاكیه‌یل ژن و جایه‌ڵه‌یل و هانداینیان ئه‌را مه‌شقكردن كاره‌یل، ك ئه‌ویش وه‌گووره‌ى هاتن ئه‌و كومپانیایه‌یل فره‌ ئه‌را كاركردن له‌هه‌رێم له‌ڕوى سه‌رمایه‌گوزارى و به‌شدارى جایه‌ڵ جوانه‌یل له‌وه‌رده‌وامى كار و مه‌شقكردن ئه‌را دروسكردن كادره‌یل خاس و شاره‌زا له‌وه‌ر خاتر بردن وڵات وه‌ره‌و ئاینده‌ى رووشنایگ ، ك هه‌رێم كوردستان خاوه‌ن سه‌روه‌رى خوه‌یه‌و بایه‌سه‌ له‌بان ده‌وڵه‌ته‌یل هاوسا ریز و حورمه‌تى بگرن نه‌ك جویر ئه‌وه‌ك توركیاو ئیران تووپواران ناوچه‌یل مه‌رزى هه‌رێم كه‌ن و  زه‌ره‌د ره‌سننه‌ ماڵ و حاڵ ئاده‌میزاد و هاووڵاتیه‌یل بیتاوان و كاولكردن له‌وه‌ڕگاو ئاوایه‌یل مه‌رزى هه‌رێم، هه‌ر له‌وه‌ر ئه‌وه‌یش بایه‌سه‌ له‌بان ئى دو ده‌وڵه‌ته‌ مقه‌یه‌تى له‌ قانوون هه‌ق هاوسایه‌تى بكه‌ن و ته‌ماشاى هه‌رێم كوردستان وه‌چه‌و سه‌روه‌ریه‌و بكه‌ن و ئیسه‌ هه‌رێم گه‌ردیگه‌ شوون په‌ره‌داین و گه‌شه‌كردن له‌وه‌ر خاتر خوه‌شگوه‌زرانى و به‌خته‌وه‌رى روڵه‌یل كورد ك هه‌ق دیرن له‌سایه‌ى سستمیگ دیموكراسى و فره‌یى و فیدراڵى بژیه‌ن.

 

محه‌مه‌د عه‌لى سه‌ماوى