داخ ئه‌را پایته‌خته‌ مه‌ویسه‌گه‌ی عراق

شفق نيوز

شانازی وه‌پیه‌و كه‌ن و خوه‌یانیش دڵ ئه‌ڕای ناسزنن، یه‌یش له‌وه‌ختیگه جوور پایته‌خت رووشنهویری عه‌ره‌بی ناوی تیه‌رن و باس له‌و رووژگاره‌یل گوزه‌یشته‌ كه‌ن ك ژیان له‌ به‌غداو شانیه‌ت ئی شاره‌ له‌ناو شاره‌یل گشت وڵاته‌یل عه‌ره‌بی گرینگی تایبه‌ت داشتگه‌و مه‌ردمان فره‌یگ له‌وه‌رخاتر وه‌ده‌سهاوردن زانست و رووشنهویری و ماریفه‌ت روی له‌ به‌غدا كردنه‌و تاریف شوونه‌یل تاریخی و بازاڕ و موزه‌خانه‌و شوونه‌ گشتیه‌گه‌ی كردنه‌، وه‌لی وه‌ داخ فره‌یگه‌و ئیسه له‌سه‌رده‌م تازه‌و سه‌رده‌م ئاوه‌دانی و خزمه‌تگوزاری ته‌كنۆلۆجی و تواناداری زیاتر دوینیم ك به‌غدا هویچ روخساریگی له‌ پایته‌خت نیه‌چوودو شیواز و ناسنامه‌ی ئیسه‌ی دویره‌ له‌و پایته‌خته‌ ك ئه‌وسا تاریف كریا.

 

به‌غدا ئه‌گه‌ر وه‌دریژایی تاریخی هه‌میشه‌ مه‌ڵوه‌ن رووشنهویری و زانست بویه‌، وه‌لی ئیسه‌ جوورمه‌ویس و چه‌وسیاگه‌ له‌ چه‌و شاره‌یل تردونیا، هه‌ر له‌وه‌ر ئه‌وه‌یش ئه‌گه‌ر تا دویه‌كه‌ نویسه‌ر و رووژنامه‌نویس و تاریخنویسه‌یل ناوخوه‌یی و ده‌ره‌كی وه‌ چه‌و گرینگی و پایه‌ی به‌رزیگه‌و ته‌ماشای ئی شاره‌ كردنه‌و قه‌ڵه‌میان وه‌شانازیه‌و باس كویچه‌و جاده‌و باغچه‌و شوونه‌واره‌یلی كردگه‌، ئیسه‌ وه‌ قه‌یزه‌و باس پیسی و نه‌وین خزمه‌تگوزاری و كاولكاری ئی شاره‌ كریه‌ید.

 

له‌وه‌یش زیاتر ئه‌وه‌ بوی له‌ ئامار ساڵانه‌ی ریكخریاگه‌یل ناوده‌وڵه‌تی ئه‌را شاره‌یل جه‌هان، له‌ ساڵ ٢٠١٢ به‌ش پایته‌خته‌گه‌ی عراق پله‌ی سێیه‌م بوی له‌ ویرانه‌و ناسه‌قامگیری و خراوترین شوون ئه‌را ژیان ئاده‌میزادو هاووڵاتیه‌یلی.

 

جاران كویچه‌ی موته‌نه‌بی، په‌رسگای شاعرو ئه‌دیب و رووشنهویره‌یل عراق و ده‌وڵه‌ته‌یل تر عه‌ره‌بی بوی و له‌گشت شارو شوونیگه‌و روی له‌لی كردیان و ریز و حورمه‌ت تایبه‌تیگ داشت له‌لای گشت خاوه‌ن ماریفه‌ت و نویسه‌رو ئه‌دیبه‌یل، وه‌لی ئیسه‌ كه‌س وه‌ حاڵی نیه‌و ده‌س خزمه‌تگوزاری له‌لی بڕیاگه‌و بویه‌سه‌ كه‌لاوه‌ كویه‌نه‌ی هه‌زار ساڵه‌و ئه‌و روخسار جارانیه‌ ك دروشم زانست و زانیاری له‌خوه‌ی گرتوید بویه‌سه‌ به‌یداخ سیه‌و وه‌رگ ئازیه‌تی له‌وه‌ر پووشاگه‌و پرسه‌ی وجاخ كووری و ته‌نیایی ناگه‌!!

 

ئه‌وسا لیوار ئه‌بی نوئاس و گرێعات، شوون سه‌یرانگاو چه‌مه‌نگای خیزانه‌یل و شوون شادی و به‌خته‌وه‌ری بوی، وه‌لی ئیسه‌ بویه‌سه‌ زه‌لگاو چه‌قه‌ڵه‌یل و گیانله‌وه‌ره‌یل ورسگ و گشت ویاریگی زه‌لپووشه‌و بویه‌سه‌ پاشمه‌نده‌و پیسی نه‌خوه‌شخانه‌یل.

 

دی نیه‌زانیم چوین باس پایته‌ختیگ بكه‌یم ك له‌گشت لایگه‌و جاده‌یلی بڕیاگه‌و پڕه‌ له‌ چاڵ و كه‌ندڕ، پڕه‌ له‌ دیوار كۆنكریت و پیه‌ڵه‌یلی ره‌نگ بی‌ توانایی و كه‌مهیزی وه‌پیانه‌و دیاره‌و زوورم باڵه‌خانه‌و ماڵه‌یلی ته‌ره‌كیانه‌و نیشانه‌ی رمیان وه‌پیانه‌و دیاره‌.

 

(باب شێخ)ك ناوه‌ند شاره‌گه‌سه‌و‌ شوون ژیان پڕ یادگاری و تاریخیه‌، دوینید حاڵ حازر ئه‌را به‌خت خوه‌ی گیرید و پاوه‌مووری چڕید، (كفاح وسه‌دریه ‌و ده‌هانه و فه‌زڵ و ئه‌بو ده‌وده‌و)‌یش شه‌وی‌ جوان مه‌خمه‌ڵین له‌وه‌ر كه‌نینه‌و سیه‌ی قه‌ترانی له‌وه‌ر پووشانه‌و هه‌ردوگ(كه‌ڕاده)‌ی ده‌یشتین و ناوینیش مه‌ل ئومیدیان داسه‌ شه‌قه‌ی باڵ و ناوچه‌ی(جه‌میله ‌وحه‌یولئه‌كراد وحه‌ی ئور و شه‌عب و بنوك و تالبیه)‌یش لافاو زمسان سه‌ر كیشاسه‌‌ گشت ماڵه‌یلیان و دیم(رسافه)‌یش ناڵنن وه‌ده‌س هه‌مان به‌دبه‌ختی و نائومیدی و زنهارن وه‌ده‌س ژیان مه‌رگه‌سات و بار ناسه‌قامگیری و نه‌وین ئاسایش و ئاسووده‌یی.

 

ته‌قینه‌وه‌و رویداگه‌یل رووژانه‌ له‌ پایته‌خت مه‌رگ هه‌زاران روڵه‌ی ئی ملله‌ته‌ خه‌ڵتان خوین كردو جه‌رگ داڵگه‌یلیان سزان، زه‌نگ خوه‌شی له‌تی بڕیاگه‌و ته‌پڵ نائومیدی له‌لی دریه‌ید و ساز مه‌ینه‌تی ژه‌نیه‌یدو كاره‌سات دڵته‌زن مه‌رز ئارامی و ئاسووده‌یی شكانگه‌و هاڕه‌ی هه‌مه‌ر و قیژه‌ی ئه‌مپوڵانس خه‌و له‌چه‌و مه‌ردم بیتاوان زڕاننه‌و ته‌قه‌و تووقه‌ی لویله‌ی تفه‌نگ و جه‌نگ ترۆریست ژیان مه‌ردم تیه‌ڵ كردگه‌و داخ ئه‌را پایته‌خته‌ مه‌ویسه‌گه‌ی عراق ك هویچ خوه‌شییگ له‌تی نه‌مه‌ندگه‌و زه‌نگی زڕیاگه‌.

 

جه‌ماڵ ئه‌ركه‌وازی