هه‌ڵویست حكوومه‌ت عراقى له‌ مه‌سه‌له‌ى په‌نابه‌ره‌یل سورى غه‌ڵه‌تیگه‌و هساو ئاقبه‌تى نه‌كریا

شفق نيوز

له‌ ته‌قینه‌وه‌یل ده‌زگاى ئاسایش و سه‌ربازى سورى و، وه‌ل نزیكه‌وبوین جه‌نگه‌یل دیمه‌شق پایته‌خت سورى و به‌رزه‌وبوین ئاگره‌گه‌ى له‌ پاریزگایه‌یل تر سوریا، شماره‌ى په‌نابه‌ره‌یل سورى زیاتره‌و بوى و به‌ش فره‌یان مه‌ده‌نیه‌ وه‌تایبه‌ت ژن و مناڵ و پیرو گه‌ورا.

 

وه‌ل ئه‌و په‌نابه‌ره‌یل مه‌ده‌نییشه‌، بڕیگ له‌ سه‌ربازیه‌یلیش وجوود دیرن ك نه‌تواسن بچنه‌ ناو هویچ لایه‌نیگ كیشمه‌كیش، ك په‌نا بردنه‌ وه‌ر ده‌وڵه‌ته‌یل هاوساى سورى، له‌وانه‌یش: توركیاو لوبنان و ئوردن له‌سه‌ره‌تاى هاتن په‌نابه‌ره‌یل سورى و پیشوازیكردنیان له‌ ده‌روازه‌یل مه‌رز، ئنجا مه‌سه‌له‌ى ئنسانى له‌یوا وه‌ئاده‌میزاد ئه‌كا ده‌س یارمه‌تى دریژه‌و بكه‌ید ئه‌را ئه‌وانه‌ك بار سه‌خت ناچاریان كرد وڵات خوه‌یان بیلنه‌جى.

 

هه‌ر له‌وه‌ر ئه‌وه‌یش دوینیم ئعلان حكوومه‌ت عراقى ك پیشوازى له‌ په‌نابه‌ره‌یل سورى ره‌ته‌و كرد، له‌وه‌ر مه‌سه‌له‌ى سیاسى بوى و ئه‌و هه‌ڵویست په‌یوه‌س نیه‌ وه‌مه‌سه‌له‌ى هه‌قه‌یل ئاده‌میزادو مقه‌یه‌تیكردن رووح ئاده‌میزاد، ك ناچار بوین وڵاتیان بیلنه‌جى له‌ترس گیان خوه‌یان و روڵه‌یلیان، ك یه‌یش وه‌رده‌وامیه‌ له‌بان هه‌ڵویست غه‌ڵه‌ت ك حكوومه‌ت عراقى نیشانیدا له‌سه‌ره‌تاى راپه‌ڕین مه‌ردمى دژ رژیم دیكتاتۆرى نیشته‌جى سورى. یه‌یش بووده‌ پشتگیرى له‌ رژیم سورى و ئى هه‌ڵویستیشه‌ بوده‌ بایس مه‌ترسى له‌بان بار په‌نابه‌ره‌یل عراقى له‌ سوریا ك هیمان مه‌ردمان فره‌یگ له‌لیان له‌ورا وجوود دیرن، ك وه‌ل ئه‌وه‌یشا فره‌یگ له‌لیان كه‌فته‌سه‌ وه‌ر كوشتن و رواكانن.

 

وه‌ل ئه‌وه‌یشا هه‌رچه‌نى شماره‌یگ له‌ شاره‌زایه‌یل ئامووژگارى په‌نابه‌ره‌یل سورى كردن ك دویره‌و بكه‌فن له‌هه‌وڵ داواكردن په‌نابه‌رى له‌عراق، چوینگه‌ دویاخر په‌شیمانه‌و بوون له‌لى له‌وه‌ر بار سه‌خت عراق و ئامووژگارى ئه‌وه‌یان كردن بچن وه‌ره‌و لوبنان و توركیاو ئوردن و ده‌وڵه‌ته‌یل تر ك بتویه‌نن له‌تیان مقه‌یه‌تى له‌ ئنسانیه‌تیان بكه‌ن، وه‌لى وه‌ل ئه‌وه‌یشا حكوومه‌ت عراقى نه‌بایه‌د قاپى له‌ڕوى بیتاوانه‌یل بووه‌سید له‌ روڵه‌یل ملله‌ت سورى ك له‌تاو ئاگر جه‌نگ هه‌یواینه‌.

 

مه‌سه‌له‌ ئه‌وه‌سه‌ ك فره‌یگ له‌ پیاوه‌یل پرووسه‌ى سیاسى عراقى ك ئیسه‌ له‌لیان ده‌سڵاتدارن له‌ حكوومه‌ت، وه‌ دریژایى ساڵه‌یل فره‌یگ ك رژیم دیكتاتۆرى له‌عراق حوكم كردیاد په‌نابه‌ر بوینه‌ له‌ سوریاو به‌ڵگه‌یل فره‌یگ باس له‌وه‌ كه‌ن ك ملله‌ت سورى وه‌ خوه‌شه‌ویسیه‌و باوه‌ش ئه‌ڕایان واز كردنه‌، ئنجا هه‌ر له‌وه‌ر ئه‌وه‌یش ره‌ته‌وكردن پیشوازى سوریه‌یل حاشاكردنیگه‌ له‌و هه‌ڵویست ملله‌ت سوریه‌ ك پیشكه‌شى كردنه‌ په‌نابه‌ره‌یل عراقى له‌و سه‌رده‌مه‌یله‌.

 

حكمه‌ت و په‌ند سیاسى له‌یرا ئه‌وه‌سه‌ ك ره‌فتار و گفت سیاسى خاس چشت خواستیگه‌ ئه‌را وه‌رپرسه‌یل سیاسى عراقى ك بایه‌سه‌ مقه‌یه‌ت بوون له‌بان به‌رژه‌وه‌ندى ملله‌ت عراقى و دویر بگرن له‌و كیشه‌یله‌ ك كه‌فتنه‌ تى وه‌دریژایى ساڵه‌یل فره‌یگ و له‌دویاى رمیان رژیم وه‌رینیش.

 

ئنجا له‌یرا ئه‌وه‌ ئه‌ڕامان ده‌ركه‌فید، ك چوین ملله‌ت عراق خه‌بات كردن دژ دیكتاتۆریه‌ت ك وه‌ پشتگیرى ناوده‌وڵه‌تى رمیا، هه‌ر وه‌و جووریشه‌ بایه‌سه‌ سیاسیه‌یل عراق وه‌ل ئه‌و ملله‌ته‌یله‌ بووسیه‌ن ك ڕى ئازادى گرنه‌وه‌ر و له‌وانه‌یش ده‌وڵه‌ته‌یل هاوساو هه‌رێمى ك تویش رژیم سته‌مكار هاتنه‌و بار سیاسى سه‌ختیگ دیرن، هه‌ر له‌وه‌ر ئه‌وه‌یش ئویشیم ئه‌گه‌ر سیاسیه‌یل و حكوومه‌ت عراقى هه‌ڵویست خاسیگ نیشان نه‌یه‌ن ئه‌وه‌ بیگومان كاره‌سات له‌شوون كاره‌سات روى له‌ى عراقه‌ ئه‌كاو دویاخریش بایه‌سه‌ بگه‌ردیمنه‌ شوون چاره‌سه‌ر.

 

سادق ئه‌زره‌قى

 

 

ج. ا