كيشه‌ی كورد و چاره‌سه‌ره‌يل خراو

شفق نيوز

ئيمه‌ له‌وه‌ر وه‌ديكردن چاره‌سه‌ره‌يل خواستيگ هه‌وه‌جه‌ وه‌ ئحساس و ئه‌قڵ جه‌ميگ ديريم ك بايه‌سه‌ وه‌ ريڕه‌و خاسيگه‌و گوزه‌ر بكا دوير له‌ سه‌ختی و تارمايی، ك وه‌ل ئه‌وه‌يشا دروسكه‌ر ژيان پشت وه‌ چاره‌سه‌ره‌يل كويه‌ن ناوه‌سيدو تاقييشه‌و ناكا له‌بان كيشه‌و قه‌يرانه‌يل ئيسه‌، به‌ڵكوو خوازيار داناين چاره‌سه‌ره‌يل تازه‌و له‌ناكاويگه‌ تايبه‌ت وه‌ گشت كيشه‌يگ، ئمجا هه‌ر وه‌ختيگ ئه‌و چاره‌سه‌ره‌ راسی و تازه‌ نه‌دێ بيگومان كووتايی وه‌ قه‌يران نايه‌ريد، به‌ڵكوو قاپی ئه‌را كيشه‌يل تر خراو واز ئه‌كاو شوونه‌وار خراويش له‌لی ئه‌كه‌فيده‌و.

ملله‌ت كورد ك گه‌وراترين نه‌ته‌وه‌ن له‌ جه‌هان ناڵنن وه‌ده‌س نه‌وين قه‌واره‌يگ سياسی ك گوزارش له‌ ديد و ئيراده‌ی بكا، ك هه‌ر وه‌و خاتريشه‌ وه‌ دريژايی مێژوو قوربانی ده‌س چاره‌سه‌ره‌يل خراو بويه‌ ئه‌را كيشه‌و قه‌يرانه‌يلی و له‌وانه‌يش خراوتر قوربانی چاره‌سه‌ره‌يل كيشه‌يل ناوچه‌گه‌ بويه‌ وه‌گشتی، چوينكه‌ ئی كيشه‌يله‌ هاورده‌ بويه‌و پيكهاتگه‌ له‌ به‌رژه‌وه‌ندی و دويره‌ له‌ مه‌سه‌له‌ی ئيراده‌ی ئی ملله‌ته‌و هه‌ر له‌وه‌ر ئه‌وه‌يش خوين و ژان وه‌ل خوه‌يا هه‌ڵگرتگه‌و مه‌ردمان تر له‌بان كيشه‌گه‌يان بنيات به‌رژه‌وه‌ندی خوه‌يان نانه‌.

ئيمه‌ ئه‌گه‌ر ته‌ماشای سه‌ره‌تای سه‌ده‌ی گوزه‌يشت بكه‌يم و ئه‌و دو جه‌نگ جه‌هانی گه‌ورا ك له‌تی رويداو بڕيگ سه‌ركه‌فتن و شكه‌ست گرته‌ خوه‌ی وه‌ل ئاڵشتكردن خه‌ريته‌ی سياسی له‌ جه‌هان، دوينيم ده‌سڵات بڕيگ له‌تی كزه‌و بوی و بڕيگيش له‌ليان ده‌سڵاتی دريژه‌و بوی و له‌ليانيش بوی بوينه‌ قوربانی و نه‌ڕه‌سيه‌ هويچ ده‌سكه‌فتيگ بيجگه‌ كوشتن و سته‌م و كاولكاری، ك وه‌و خاتريشه‌ كيشه‌گه‌ی وه‌ خراو چاره‌سه‌ر كريا وه‌گووره‌ی خواست و به‌رژه‌وه‌ندی ده‌وڵه‌ته‌يل گه‌وراهيز، ك بنيات قه‌واره‌يگ سياسی له‌ی بيبه‌ش كرياو شوونه‌واره‌يل فريه‌ خراويگ هيشته‌جی ك تائيسه‌يش شوونه‌واری دياره‌ له‌بن ملله‌ت ئيمه‌و به‌شبه‌شه‌و كريا له‌ ناونی چه‌ن ده‌وڵه‌تيگ.

ئيسه‌يش وه‌ گووره‌ی رويداگه‌يل و ئالشتكاريه‌يل تازه‌‌ بايه‌سه‌ ئه‌وه‌ بزانيم ك ناوچه‌گه‌ روی له‌ ئاڵشتكاری كردگه‌ له‌ نه‌خشه‌ی سياسی و بڕيگ له‌ مه‌رز ده‌وڵه‌ته‌يل وجوود و سه‌روه‌ری نه‌يريد و مه‌يدان كيشمه‌كيش ناوده‌وڵه‌تی وه‌ مه‌هانه‌ی جوراوجوور ده‌س وه‌پيكردگه‌، ك هه‌ر يه‌كيگ له‌لی هوير و ئامانج خوه‌ی ديريدو پيشبينی يه‌يش ئه‌كريه‌يد له‌ ئاينده‌يش ئی ناوچه‌ به‌شبه‌شه‌و بكريه‌يد وه‌ گووره‌ی به‌رژه‌وه‌ندی ده‌وڵه‌ته‌يل گه‌وراهيز، ئمجا وڵاته‌يليگ هه‌ن له‌لی نه‌ف وه‌رگرن و وڵاته‌يليگيش وه‌ چه‌واشه‌، له‌ی ناونييشه‌ ملله‌ت كورد له‌ هه‌رێم كوردستان ك هه‌رچه‌نی نه‌ونه‌ وازيزان سه‌ره‌كييش له‌ی وازی ناوده‌وڵه‌تيه ئه‌وه‌ بيگومان هه‌ر نه‌خش گرينگ ئه‌يه‌رنه‌ ده‌س له‌وه‌ر هه‌ر هووكاريگ و له‌وانه‌يش له‌ مه‌سه‌له‌ی سياسه‌ت ناوخوه‌يی وه‌ گووره‌ی شيه‌وكردن واقع و بار ناوده‌وڵه‌تی له‌بان ئاست ده‌ره‌كی، ك حاڵ حازر كوردستان له‌جيای گشت جه‌هان جه‌نگ داعش ترۆر ئه‌كا.

ئيسه‌يش ده‌رفه‌تيگ ته‌ڵاييه‌، ك بايه‌سه‌ وه‌گشت توانايگه‌و هه‌وڵ بيه‌يم و نه‌ف له‌ی ده‌رفه‌ته‌ وه‌ربگريم و بايه‌سه‌ له‌بان ده‌وڵه‌ته‌يل په‌يوه‌نديداريش چاره‌سه‌ر گونجياگ دابنه‌ن ئه‌را كيشه‌ی ئی ملله‌ته‌ تا مه‌ويسی و چه‌وسيان گوزه‌يشته‌ دوباره‌وه‌ نه‌دێ و جاريگتر فيشتر خوين نه‌ڕشيه‌يد.

هه‌ر له‌وه‌ر ئه‌وه‌يش چاره‌سه‌ره‌يل خراو ك هه‌رچه‌نی تازه‌يش بوون ئه‌را ماوه‌يگ و له‌ به‌رژه‌وه‌ندی لايه‌نيگ بوون، وه‌لی بيجگه‌ خوين و كاولكاری هويچ تر له‌لی ناكه‌فيده‌و، وه‌و خاتريشه‌ بايه‌سه‌ له‌بان خاوه‌ن برياره‌يل ناوده‌وڵه‌تی چاره‌سه‌ر واقعی دابنه‌ن ئه‌را كيشه‌ی ئی ملله‌ته‌و دگان وه‌ قه‌واره‌ سياسيه‌گه‌ی بنه‌ن و ئه‌وه‌ بزانن ك ئی ملله‌ته‌ جوور جاران ده‌سبه‌سياگ نيه‌و گووش وه‌ مه‌ينه‌تی نيه‌يد له‌وه‌ر خاتر وه‌ده‌سهاوردن مافه‌يلی.

عه‌بدوڵڵا جه‌عفه‌ر كوفلی

ج . أ